မန်စီးတီးအသင်းအပေါ် စွဲဆိုထားတဲ့ စွဲချက် ၁၁၄ ခု ထွက်ပေါ်လာပြီးနောက် အန်ဇိုဖာနန်ဒက်ဇ်က မီဒီယာတွေနဲ့ ပထမဆုံးအကြိမ် တွေ့ဆုံလိုက်ပါတယ်။

၂၀၀၉-၂၀၁၀ ဘောလုံးရာသီမှ ၂၀၁၇-၂၀၁၈ ဘောလုံးရာသီအကြား ဘဏ္ဍာရေးဆိုင်ရာ စည်းမျဉ်းချိုးဖောက်မှုစွဲချက်အားလုံးအတွက် မန်စီးတီးအသင်း အပြစ်ရှိတယ်လို့ ပရီးမီးယားလိဂ်က အင်္ဂါနေ့မှာ ထုတ်ဖော်ကြေညာခဲ့ပါတယ်။

ဒီစွဲချက်တွေအတွက် ချမှတ်မယ့်ပြစ်ဒဏ်အပေါ် မူတည်ကာ ပရီးမီးယားလိဂ်မှ ထုတ်ပယ်ခံရနိုင်လို့ ကလပ်အသင်းအတွင်း စိုးရိမ်မှုတွေ ကြီးထွားလာချိန် ဒွန်နာရမ်မာလိုကစားသမားတွေလည်း မန်စီးတီးမှထွက်ခွာမယ်ဆိုတဲ့ သတင်းတွေနဲ့ ချိတ်ဆက်ခံနေရပါပြီ။

ကလပ်အသင်းဘက်ကတော့ စီရင်ချက်အပေါ် အယူခံဝင်သွားမယ်လို့ အတည်ပြုထားပြီး အောက်တိုဘာ ၂ ရက်(သောကြာနေ့)အထိ အယူခံဝင်ခွင့် ရှိပါတယ်။

ပရီးမီးယားလိဂ်မှ ထုတ်ပယ်ခံရနိုင်ခြေရှိနေတဲ့ ကလပ်တစ်ခုမှာ ကစားသမားတွေကိုယ်တိုင် သူတို့ရဲ့အနာဂတ်အတွက် တွေးတောနေကြချိန် ပြီးခဲ့တဲ့နွေရာသီကာလအတွင်း၊ ချဲလ်ဆီးမှ ပေါင် ၁၂၅ သန်းဖြင့် ရောက်ရှိလာတဲ့ အန်ဇိုဖာနန်ဒက်ဇ်ကတော့ လက်ရှိအချိန်အထိ သူရရှိထားတဲ့ နွေးထွေးတဲ့ကြိုဆိုမှုတွေနဲ့ပတ်သက်လို့ ထုတ်ဖော်ပြောဆိုခဲ့ပါတယ်။

"နွေးထွေးစွာ ကြိုဆိုပေးကြတဲ့ မန်စီးတီးပရိသတ်တွေကို ကျေးဇူးတင်ပါတယ်"

"ရိုးရိုးသားသား ပြောရရင် ကျွန်တော့်စိတ်ထဲမှာ ကိုယ့်အိမ်ကိုယ့်ရာလို ခံစားရပြီး ဒါက ကစားသမားတစ်ဦးရဲ့ ယုံကြည်မှုအတွက် အလွန်အရေးပါပါတယ်"

"ဒီကလပ်အသင်းရဲ့ တစ်ရာသီလုံးစာ ရည်မှန်းချက်အားလုံးကို အောင်မြင်အောင် စွမ်းဆောင်နိုင်ဖို့၊ ချန်ပီယံဆုဖလားအများအပြားကို အတူတကွရယူနိုင်ဖို့နဲ့ ပျော်ရွှင်မှုတွေ ခံစားနိုင်ဖို့အတွက် နေ့ရက်တိုင်း၊ လေ့ကျင့်ရေးအစီအစဉ်တိုင်းနဲ့ ပွဲစဉ်တိုင်းမှာ ကျွန်တော့်ဘက်က ရာနှုန်းပြည့်ပေးဆပ်သွားမယ်ဆိုတာကို ပရိသတ်တွေဆီ ပြောပြချင်ပါတယ်" လို့ သူက ဆိုပါတယ်။

ပရီးမီးယားလိဂ်ရဲ့ ထုတ်ပြန်ချက်ထဲမှာတော့ ဒီလုပ်ငန်းစဉ်ကို "တတ်နိုင်သမျှ အမြန်ဆုံး အပြီးသတ်လိုတယ်" လို့ ဖော်ပြထားပေမဲ့ ဆုံးဖြတ်ချက်တစ်ခု ထွက်ပေါ်လာဖို့ နှစ်ပေါင်းများစွာ ကြာမြင့်နိုင်တယ်ဆိုတဲ့ သတင်းတွေလည်း ရှိနေလို့ ကလပ်အသင်းမှ အလျှင်အမြန်ထွက်ခွာဖို့ဆိုတာ အရေးတကြီးလိုအပ်နေတဲ့ပုံစံမျိုး မဖြစ်လာသေးတာကိုလည်း တွေ့နေရပါတယ်။

ချဲလ်ဆီးကစားသမားဘ၀နောက်ဆုံးဘောလုံးရာသီမှာ ၁၅ ဂိုး သွင်းယူခဲ့တဲ့ မန်စီးတီးကစားသမားသစ် အန်ဇိုဖာနန်ဒက်ဇ်က အခုနိုင်ငံတကာသီတင်းပတ်အပြီး၊ လီဗာပူးနဲ့ ရင်ဆိုင်ရတဲ့ပွဲစဉ်မှာ ပါဝင်ကစားလာဖွယ် ရှိပါတယ်။