အသက် ၂၀ နှစ်အရွယ် ကစားသမားဟာ ၂၀၂၃ ခုနှစ် ဇူလိုင်လမှာ ဖီနာဘာချီကနေ ရီးရဲလ်မက်ဒရစ်သို့ ကနဦး ယူရို သန်း ၂၀ (ပေါင် ၁၇ သန်း) နဲ့ ပြောင်းရွှေ့ခဲ့ပါတယ်။ အာဒါဟာ ရီးရဲလ်မက်ဒရစ်ရှိ သူ့ရဲ့ ပထမဆုံးရာသီမှာ ၁၂ ပွဲ ပါဝင်ခဲ့ပေမယ့် ပြီးခဲ့တဲ့ နွေရာသီ ယူရို ၂၀၂၄ မှာ တူရကီအတွက် အထင်ကြီးလောက်စရာ စွမ်းဆောင်ရည်ပြသပြီးနောက် ကွင်းလယ်ကစားသမားဟာ ဒီရာသီ နည်းပြ အန်ဆယ်လော့တီ လက်အောက်မှာ ပိုပြီး အခွင့်အရေးတွေ ရရှိမယ်လို့ ခန့်မှန်းထားပါတယ်။

ဒါပေမယ့် အခုအချိန်အထိ အာဒါဟာ လက်ရှိရာသီအတွင်း ရီးရဲလ်မက်ဒရစ်ရဲ့ ပွဲပေါင်း ၄၇ ပွဲမှာ ၁၀ ပွဲတွင်သာ ပါဝင်ခဲ့ပါတယ်။ အာဆင်နယ်ဟာ အာဒါကို ခေါ်ယူဖို့ ချိတ်ဆက်မှုတွေ ရှိနေပြီး စပိန်ရှိသတင်းတွေအရ အာတီတာရဲ့ အသင်းဟာ ရီးရဲလ်မက်ဒရစ်ရှိ ကွင်းလယ်ကစားသမားရဲ့ အခြေအနေအကြောင်း ပိုမိုသိရှိနိုင်ဖို့ ချဉ်းကပ်မှုတစ်ခု ပြုလုပ်ခဲ့တယ်လို့ ဒီရာသီအစောပိုင်းမှာ ဖော်ပြပါတယ်။

ဒါပေမယ့် အာဒါက ဖီနာဘာချီကနေ ထွက်ခွာခဲ့ချိန်မှာ ရီးရဲလ်မက်ဒရစ်က သူ့ကို ပေးခဲ့တဲ့ ကစားသမားဘဝ စီမံကိန်းကို ယုံကြည်မှု ရှိနေဆဲဖြစ်ကြောင်း ခိုင်မာစွာ ပြောကြားခဲ့ပါတယ်။ "ကျွန်တော်တို့ဟာ ရာသီအကုန်အထိ ဆုဖလား ၃ ခုလုံးအတွက် တိုက်ပွဲဝင်ဖို့ အဆင်သင့်ဖြစ်နေပြီး အဲဒါဟာ စိတ်လှုပ်ရှားစရာ ဖြစ်လာမှာပါ" 

"ရီးရဲလ်မက်ဒရစ်ဟာ ပွဲတိုင်းနဲ့ ဆုဖလားတိုင်းကို အနိုင်ရဖို့ အမြဲတမ်း တိုက်ပွဲဝင်ပါတယ်" "ကိုယ်ရေးကိုယ်တာအနေနဲ့ ကျွန်တော့်ရဲ့ တစ်ခုတည်းသော ဆန္ဒက ပွဲတိုင်းမှာ ကစားပြီး ကျွန်တော့်အသင်း ဆုဖလားတိုင်းကို အနိုင်ရဖို့ ကူညီဖို့ပါ" လို့ တနင်္ဂနွေနေ့မှာ ဟန်ဂေရီကို ၃-၀ ဂိုးနဲ့ အနိုင်ရရှိပြီးနောက် အာဒါက Marca ကို ပြောကြားခဲ့ပါတယ်။

ကစားချိန် နည်းပါးနေပေမယ့် ရီးရဲလ်မက်ဒရစ်မှာ ပျော်ရွှင်ရဲ့လားလို့ မေးတဲ့အခါ အာဒါက "ရီးရဲလ်မက်ဒရစ်က ကျွန်တော့်ကို စီမံကိန်းတစ်ခု ပေးခဲ့ပြီး ကျွန်တော်က အဲဒါကို ယုံကြည်မှု ရှိနေဆဲပါ" "ရီးရဲလ်မက်ဒရစ်မှာ အောင်မြင်မယ်လို့ ကျွန်တော် သေချာပါတယ်။ မက်ဒရစ်မှာ အိမ်တစ်လုံးတောင် ဝယ်ထားပါတယ်"

"ကျွန်တော်က အလွန်ကြိုးစားပြီး ကစားဖို့ အမြဲတမ်း အဆင်သင့်ဖြစ်ပါတယ်။ ဟန်ဂေရီနဲ့ ဒီပွဲမှာ အားလုံးမြင်တဲ့အတိုင်းပါပဲ" "ရီးရဲလ်မက်ဒရစ် ပရိသတ်တွေကို ကျွန်တော် ချစ်မြတ်နိုးပြီး သူတို့ရဲ့ အားပေးမှုဟာ ကျွန်တော့်အတွက် အဓိပ္ပာယ် အများကြီး ရှိပါတယ်။ ကျွန်တော် သူတို့ကို အများကြီး ကျေးဇူးတင်ပါတယ်"

"ရီးရဲလ်မက်ဒရစ်ကို ကျွန်တော် ရောက်လာတာက ကစားဖို့နဲ့ ဒီအသင်းရဲ့ အရေးကြီးတဲ့ အစိတ်အပိုင်းတစ်ခု ဖြစ်ဖို့ပါ။ အဲဒါကို မအောင်မြင်မချင်း တိုက်ပွဲဝင်တာကို ကျွန်တော် ရပ်တန့်မှာ မဟုတ်ပါဘူး" လို့ ပြန်ဖြေခဲ့ပါတယ်။