မန်ချက်စတာယူနိုက်တက်မှ ရီးရဲလ်ဘက်တစ်သို့ အငှားစာချုပ်နဲ့ပြောင်းရွှေ့ကစားနေတဲ့ တောင်ပံကစားသမား အန်တိုနီက သူ့အနေနဲ့ အိုးလ်ထရက်ဖို့ဒ်ကနေ ထွက်ခွာလာခဲ့ခြင်းက အကောင်းဆုံး ဆုံးဖြတ်ချက်တစ်ခုဖြစ်ပေမယ့် စပိန်မြေမှာ ဆက်လက်နေထိုင်ဖို့တော့ မသေချာသေးကြောင်း ဖွင့်ဟပြောကြားလာခဲ့ပါတယ်။ 

ပြီးခဲ့တဲ့ ဇန်နဝါရီအပြောင်းအရွှေ့မှာ ရီးရဲလ်ဘက်တစ်နဲ့ ရာသီကုန်အထိ အငှားစာချုပ်ချုပ်ဆိုခဲ့တဲ့ အသက်-၂၅ နှစ်အရွယ်ကစားသမားဟာ စပိန်ကလပ်အတွက် ပြိုင်ပွဲစုံ ၁၂ ပွဲကစားထားရာမှာ ၄ ဂိုးသွင်းယူပြီး ဂိုးဖန်တီးမှုတွေလည်း အများအပြားပြုလုပ်ထားနိုင်တာဖြစ်ပါတယ်။ ဒါကြောင့် ရီးရဲလ်ဘက်တစ်အနေနဲ့လည်း အန်တိုနီကို အသင်းမှာဆက်လက်ထားရှိဖို့ ဆန္ဒရှိနေတယ်လို့ သိရပေမယ့် ကလပ်ရဲ့ဘဏ္ဍာရေးအခြေအနေအရ အပြီးသတ်ဝယ်ယူဖို့တော့ မဖြစ်နိုင်ပါဘူး။ 

ဘရာဇီးသားဟာ ၂၀၂၂ ခုနှစ်မှာ အေဂျက်စ်မှထွက်ခွာပြီး အိုးလ်ထရက်ဖို့ဒ်သို့ ပြောင်းရွှေ့ကြေးကြီးကြီးမားမားနဲ့ ရောက်ရှိခဲ့ပေမယ့် ထိပ်တန်းခြေစွမ်းကို ဆက်လက်ထိန်းသိမ်းနိုင်ခဲ့ခြင်းမရှိတာကြောင့် ဒီရာသီမှာလည်း ပရီးမီးယားလိဂ် ၈ ပွဲသာ ကစားခွင့်ရခဲ့တာဖြစ်ပါတယ်။ 

ယခုအခါမှာတော့ အန်တိုနီက "ကျွန်တော် ဘက်တစ်မှာ အရမ်းပျော်ပါတယ်။ ဒါပေမယ့် ဒီမှာဆက်နေဖို့ကတော့ ဆုံးဖြတ်ဖို့ စောပါသေးတယ်။ ကျွန်တော့်ကိုယ်ကျွန်တော် ဒီနေရာမှာရှာတွေ့ခဲ့ပါတယ်။ ပျော်ရွှင်နိုင်ဖို့ လိုအပ်ခဲ့ပါတယ်။ ဒီကိုပြောင်းလာတာက ကျွန်တော့်အတွက် အကောင်းဆုံး ဆုံးဖြတ်ချက်ပါပဲ။ နေ့ရက်တိုင်းမှာ ပျော်ရွှင်နေပါပြီ။ ဒီမှာရှိတဲ့ နေရောင်၊ အစားအစာတွေနဲ့ အရာရာတိုင်းက ကျွန်တော့်အတွက် ဘရာဇီးမြေကို ပြန်ရောက်သွားသလိုပါပဲ။ လူတွေကလည်း အရမ်းနွေးထွေးကြပါတယ်။ ဘရာဇီးသားတစ်ယောက်အတွက်တော့ ဒီနေရာက အရမ်းကောင်းတဲ့နေရာတစ်ခုပါ" လို့ပြောကြားခဲ့ပါတယ်။ 

လာမယ့်စနေနေ့မှာတော့ ရီးရဲလ်ဘက်တစ်ဟာ ခက်ခဲတဲ့လာလီဂါပွဲစဉ်အဖြစ် ဘာစီလိုနာနဲ့ ရင်ဆိုင်သွားရမှာဖြစ်ပြီး အန်တိုနီတစ်ယောက် အသင်းအတွက် ဆက်လက်ခြေစွမ်းပြကစားသွားနိုင်မလား စောင့်ကြည့်ရပါမယ်။