ရီးရဲလ်ဘက်တစ်ကြယ်ပွင့် အစ္စကိုက အသင်းအနေနဲ့ မန်ချက်စတာယူနိုက်တက်မှ အငှားစာချုပ်နဲ့ခေါ်ယူထားခဲ့တဲ့ တောင်ပံကစားသမား အန်တိုနီကို အပြီးသတ်ဝယ်ယူနိုင်ဖို့ဆိုရင် ပရိသတ်တွေထံမှ အလှူငွေကောက်ခံသွားရမယ်လို့ ပြောကြားလာခဲ့ပါတယ်။ 

ယနေ့န့နက်က ဆီဗီလာကိုအနိုင်ရခဲ့တဲ့ လာလီဂါပွဲစဉ်မှာ အန်တိုနီဟာ ဘက်တစ်အတွက် ဂိုးသွင်းယူနိုင်ခဲ့ခြင်းမရှိပေမယ့် အထူးခြေစွမ်းပြသကစားနိုင်ခဲ့ပြီး အသင်းကို နိုင်ပွဲဖော်ဆောင်ပေးနိုင်ခဲ့ပါတယ်။ ပြီးခဲ့တဲ့ဇန်နဝါရီအပြောင်းအရွှေ့ကာလမှ အိုးလ်ထရက်ဖို့ဒ်မှထွက်ခွာပြီး စပိန်မြေသို့ ပြောင်းရွှေ့ခဲ့တဲ့ ဘရာဇီးသားဟာ ရီးရဲလ်ဘက်တစ်အတွက် အလွန်အရေးပါတဲ့ကစားသမားအဖြစ် ရပ်တည်ထားနိုင်တာဖြစ်ပါတယ်။ 

၂၀၂၂ ခုနှစ်မှာ အေဂျက်စ်မှ ယူနိုက်တက်သို့ ပေါင် ၈၆ သန်းနဲ့စတင်ပြောင်းရွှေ့ခဲ့ပြီးနောက်မှာတော့ အန်တိုနီဟာ အိုးလ်ထရက်ဖို့ဒ်မှာ ခြေစွမ်းပြသဖို့ရုန်းကန်ခဲ့ရလို့ အတော်လေးဝေဖန်ခံထားခဲ့ရတာဖြစ်ပါတယ်။ ယခုအခါမှာတော့ တောင်ပံကစားသမားဟာ ဘက်တစ်အတွက် ပြိုင်ပွဲစုံ ၁၂ ပွဲကစားထားရာမှာ ၄ ဂိုးသွင်းပြီး၊ ဂိုးဖန်တီးမှု ၄ ကြိမ်အထိပြုလုပ်ပေးထားနိုင်ပါတယ်။ 

ဆီဗီလာကို ၂-၁ နဲ့အနိုင်ရခဲ့တဲ့ ပွဲစဉ်အပြီးမှာ အစ္စကိုက "ကျွန်တော်တို့ အန်တိုနီကို အပြီးသတ်ဝယ်ဖို့ လူတွေဆီကနေ အလှူငွေတွေကောက်ခံသွားဖို့လိုအပ်နေပါပြီ" လို့ဟာသလုပ်ပြီးပြောကြားခဲ့ပါတယ်။ အဲရစ်တန်ဟက်ရဲ့ဦးဆောင်မှုအောက်မှာ ကစားခဲ့တဲ့အန်တိုနီဟာ ယူနိုက်တက်မှာတော့ စုစုပေါင်း ၉၆ ပွဲအထိကစားခွင့်ရခဲ့ပေမယ့် ၁၂ ဂိုးသာသွင်းယူနိုင်ခဲ့တာဖြစ်ပါတယ်။ 

နည်းပြသစ် ရူဘင်အာမိုရင်လက်ထက်မှာတော့ အန်တိုနီဟာ ယူနိုက်တက်ကိုစွန့်ခွာခဲ့ပြီး စပိန်မြေသို့ ပြောင်းရွှေ့လာခဲ့တာဖြစ်ပါတယ်။ လက်ရှိအချိန်မှာတော့ အန်တိုနီတစ်ယောက် ရာသီကုန်မှာ ယူနိုက်တက်သို့ပြန်သွားမလား ဘက်တစ်မှာပဲဆက်လက်နေထိုင်မလားဆိုတာ အတိအကျမသိရှိရသေးပါဘူး။ 

ဘရာဇီးသားဟာ စပိန်မြေမှာ ပျော်ရွှင်နေပေမယ့် ယူနိုက်တက်နဲ့ စာချုပ်သက်တမ်း ၂ နှစ်အထိကျန်ရှိနေသေးတာဖြစ်လို့ အိုးလ်ထရက်ဖို့ဒ်သို့ ပြန်သွားရလို့အလားအလာများနေပါတယ်။ ဒါ့အပြင် ဘက်တစ်အနေနဲ့လည်း အန်တိုနီကိုအပြီးသတ်ဝယ်နိုင်ဖို့ လုံလောက်တဲ့ ဘဏ္ဍာရေးအခြေအနေကို ထိန်းသိမ်းထားနိုင်ခြင်းမရှိပါဘူး။ 

လာလီဂါအမှတ်ပေးဇယားရဲ့ အဆင့် ၆ နေရာမှာရပ်တည်ထားနိုင်တဲ့ ဘက်တစ်ဟာ လာမယ့် ဧပြီလ ၁၀ ရက်နေ့မှာတော့ ယူရိုပါကွန်းဖရန့်လိဂ် ကွာတားဖိုင်နယ်ပွဲစဉ်အဖြစ် ဘီယာလီစတော့ခ်နဲ့ ယှဉ်ပြိုင်သွားရပါမယ်။