နယူးကာဆယ်နည်းပြ အက်ဒီဟိုဝီက အသင်းရဲ့အားထားရတဲ့တိုက်စစ်မှူး အလက်ဇန်းဒါးအီဆက်ဟာ ကြာသပတေးနေ့နံနက် ဘရန့်ဖို့ဒ်ကို ၂-၁ နဲ့အနိုင်ရခဲ့တဲ့ပွဲစဉ်မှာ ပေါင်ခြံဒဏ်ရာရရှိခဲ့တာကြောင့် လူစားလဲခဲ့ရတာဖြစ်တယ်လို့ အတည်ပြုပြောကြားလာခဲ့ပါတယ်။ 

ယခုပွဲစဉ်မှာ အီဆက်ဟာ နယူးကာဆယ်အတွက် အဖွင့်ဂိုးကို့ ပထမပိုင်းပြီးကာနီး အချိန်ပိုမှာ သွင်းယူပေးခဲ့တာဖြစ်ပြီး ဒုတိယပိုင်း ၆၆ မိနစ်မှာပဲ လူစားလဲခံခဲ့ရပါတယ်။ ဘရန့်ဖို့ဒ်အတွက် ချေပဂိုးကိုလည်း ၆၆ မိနစ်မှာပဲ အမ်ဘွေမိုက ပင်နယ်တီမှတစ်ဆင့် သွင်းယူပေးခဲ့ပေမယ့် ၇၄ မိနစ်မှာရရှိခဲ့တဲ့ တိုနာလီရဲ့သွင်းဂိုးကြောင့် နယူးကာဆယ်တို့ နိုင်ပွဲရခဲ့တာဖြစ်ပါတယ်။

အီဆက်အနေနဲ့ ဒီရာသီပရီးမီးယားလိဂ် သွင်းဂိုး ၂၀ အထိရရှိခဲ့ပြီဖြစ်ပေမယ့် ယခုအခါမှာတော့ ပေါင်ခြံဒဏ်ရာကြောင့် လာမယ့်တနင်္လာနေ့ လက်စတာနဲ့ပွဲစဉ်အတွက် ပါဝင်နိုင်ဖို့ မသေချာတဲ့အခြေအနေမှာရှိနေပါတယ်။ ပွဲအပြီးမှာ ဟိုဝီက " ဒီလိဂ်မှာ ဂိုးသွင်းနိုင်တဲ့ ကစားသမားတစ်ယောက်အဖြစ် အီဆက်က သက်သေပြထားပြီးပါပြီ။ ပြီးတော့ အရမ်းလည်းတာဝန်ကျေတဲ့ကစားသမားပါ။ ဒီကိုစရောက်ကတည်းက သူက မယုံနိုင်စရာတွေလုပ်ပြထားနိုင်ပါတယ်။ ဒီလိုဂိုးသွင်းနိုင်ဖို့ မလွယ်ကူပါဘူး။ ပြီးတော့ ဒီပွဲက သူ့ရဲ့အကောင်းဆုံးခြေစွမ်းကို မြင်တွေ့ခဲ့ရတဲ့ပွဲလည်းမဟုတ်ပါဘူး။ သူက နေရာမှန်မှာရောက်နေရင် တသမတ်တည်းဖြစ်တဲ့ခြေစွမ်းကို ထိန်းသိမ်းထားနိုင်ပါတယ်။ ဒီပွဲမဟုတ်ဘဲ အခြားပွဲမှာဆိုရင်လည်း သူ့အနေနဲ့ ဂိုးတွေဆက်သွင်းနိုင်ဖို့ ကျွန်တော်တို့ လူးစားလဲခဲ့တာပါ"

"ပြင်းထန်တဲ့ဒဏ်ရာမဖြစ်ဖို့တော့မျှော်လင့်ပါတယ်။ ဒါပေမယ့် သူ့ရဲ့ပေါင်ခြံက ၁၀၀ ရာခိုင်နှုန်းတော့ ကြံ့ခိုင်မှုမရှိခဲ့ပါဘူး။ ပြီးတော့ သူကိုယ်တိုင်လည်း ဆက်ကစားနိုင်မလား မသေချာလို့ ကျွန်တော်တို့ ကြိုတင်ကာကွယ်ဖို့ပဲဆုံးဖြတ်ခဲ့ပါတယ်" လို့ပြောကြားခဲ့ပါတယ်။ 

ဆက်လက်ပြီး ဟိုဝီက ပွဲနှောင်းချိန်မှာ လူစားလဲခံခဲ့ရတဲ့ ညာနောက်ခံလူ ထရစ်ပီယာနဲ့ပတ်သက်ပြီး "သူကလည်း ပေါင်မှာဒဏ်ရာရတယ်လို့ ကျွန်တော်တို့ကိုပြောပါတယ်။ ဒီနေ့ ကျွန်တော်တို့ နိုင်ပွဲရခဲ့ပေမယ့် အပြုဆောင်တဲ့ပွဲတော့မဟုတ်ခဲ့ပါဘူး။ အသင်းမှာ ကစားသမားအလုံအလောက်မရှိဘူးဆိုတာ အရန်ခုံကိုကြည့်ရင် မြင်နိုင်ပါတယ်။ ဒါကြောင့် ဒဏ်ရာပြဿနာတွေမပြင်းထန်စေဖို့ ကစားသမားတွေကို လူစားလဲခဲ့တာပါ" လို့ပြောကြားခဲ့ပါတယ်။