ဘာစီလိုနာအသင်းဟာ ဖရန်ကီဒီဂျောင်ရဲ့ စိတ်ပျက်စရာကောင်းတဲ့ ဒဏ်ရာသတင်း ထွက်ပေါ်လာခဲ့ပေမဲ့လည်း ဒီနွေရာသီမှာ ပြုလုပ်ဖို့ရှိတဲ့ ကစားသမားအပြောင်းအရွှေ့ အစီအစဉ်တွေကိုတော့ ပြောင်းလဲသွားမှာ မဟုတ်ပါဘူး။

ပြီးခဲ့တဲ့လက ၂၀၂၆ ကမ္ဘာ့ဖလားပြိုင်ပွဲရဲ့ ၃၂ သင်းအဆင့်မှာ နယ်သာလန်အသင်း ပြုတ်သွားပြီးနောက် ဒတ်ချ်လက်ရွေးစင်ကွင်းလယ်လူ ဒီဂျောင်ဟာ ရာသီကြိုဆေးစစ်မှုတွေပြုလုပ်ဖို့ အသင်းဆီ ပြန်ရောက်လာခဲ့တယ်လို့ စပိန်သတင်းတွေမှာ ဖော်ပြထားပါတယ်။ အေဂျက်စ်ကစားကွက်ဖော်သူဟောင်း ဒီဂျောင်ဟာ ပြိုင်ပွဲအပြီးမှာ အဆင်ပြေပြေနဲ့ ပြန်လာနိုင်လိမ့်မယ်လို့ အစပိုင်းမှာ မျှော်လင့်ထားခဲ့ကြပေမဲ့ ကာတာလိုးနီးယားကို ပြန်ရောက်လာပြီး ဆေးစစ်ချက်တွေ လုပ်ကြည့်တဲ့အခါမှာတော့ ဒူးဒဏ်ရာ အပြင်းအထန် ရရှိထားတာကို တွေ့ရှိခဲ့ရတာ ဖြစ်ပါတယ်။

လက်ရှိမှာ ဒဏ်ရာရထားတဲ့နေရာက ရောင်ရမ်းနေတာကြောင့် အသေးစိတ်စစ်ဆေးမှုတွေ ထပ်လုပ်လို့မရသေးဘဲ ဒဏ်ရာဘယ်လောက်အထိ ပြင်းထန်သလဲနဲ့ ဘယ်လောက်ကြာကြာ အနားယူရမလဲဆိုတာကိုတော့ လာမယ့်သီတင်းပတ်တွေအတွင်းမှာ အတည်ပြုနိုင်မှာပါ။

မာကာသတင်းဌာနရဲ့ ဖော်ပြချက်အရ ဘာစီလိုနာအသင်းဟာ သူတို့ရဲ့ အဓိကကွင်းလယ်လူကို နယ်သာလန်အသင်းက ဂရုမစိုက်ခဲ့တာနဲ့ပတ်သက်ပြီး ဒေါသထွက်နေကြသလို ဒီဂျောင်အနေနဲ့လည်း ၂၀၂၆-၂၇ ရာသီရဲ့ အစောပိုင်းပွဲစဉ်တွေကို လွဲချော်ဖို့ သေချာသလောက် ရှိနေပါတယ်။ အခုအခြေအနေက ဘာစီလိုနာရဲ့ အပြောင်းအရွှေ့အစီအစဉ်တွေအပေါ် သက်ရောက်မှုရှိနိုင်ပေမဲ့လည်း မာ့ခ်ကာဆာဒိုကတော့ လာလီဂါချန်ပီယံအသင်းကနေ ထွက်ခွာသွားဖို့ ရှိနေဆဲဖြစ်ပြီး ဥရောပကလပ်အသင်းတွေအပြင် ဆော်ဒီပရိုလိဂ်အသင်းတွေနဲ့ပါ သတင်းတွေ ထွက်ပေါ်နေပါတယ်။

ကာဆာဒိုဟာ ဘာစီလိုနာရဲ့ ကွင်းလယ်နေရာအတွက် ရွေးချယ်မှုအပိုင်းမှာ နောက်တန်းကို ရောက်နေသူဖြစ်ပြီး နည်းပြဟန်စီဖလစ်ကတော့ ဒီဂျောင် ဒဏ်ရာရနေတဲ့ကြားကပဲ သူ့ကို ထွက်ခွာခွင့်ပေးဖို့ ဆုံးဖြတ်ထားတာပါ။ ဘာစီလိုနာအသင်းဟာ စပိန်လက်ရွေးစင်ကစားသမား ကာဆာဒိုကို ရောင်းချပြီး ယူရို သန်း ၃၀ လောက် ပြန်ရဖို့ မျှော်လင့်နေတာဖြစ်သလို နည်းပြဖလစ်ကလည်း ကာဆာဒို ထွက်သွားရင်တောင် မာ့ခ်ဘာနယ်လ်နဲ့ ဂါဗီတို့က အဲ့ဒီနေရာမှာ အစားထိုးကစားပေးနိုင်မယ်လို့ ယုံကြည်နေပါတယ်။