မက်စ်အယ်လီဂရီကို ထုတ်ပယ်ပြီးနောက် ဘုန်းမောက်နည်းပြ အန်ဒိုနီ အီရာအိုလာကို အေစီမီလန် ချဉ်းကပ်
အေစီမီလန်အသင်းဟာ မက်ဆီမီလီယာနို အယ်လီဂရီကို ရာထူးကနေ ထုတ်ပယ်လိုက်ပြီးနောက် နည်းပြသစ်ရှာဖွေဖို့အတွက် အချိန်ဆွဲမနေတော့ဘဲ ဘုန်းမောက်နည်းပြ အန်ဒိုနီ အီရာအိုလာကို ချိန်ရွယ်နေတယ်လို့ သတင်းများအရ သိရပါတယ်။
အေစီမီလန်ဟာ စီးရီးအေပြိုင်ပွဲကို အဆင့် ၅ နဲ့ အဆုံးသတ်ခဲ့ပြီး လာမယ့်ရာသီ ချန်ပီယံလိဂ်ဝင်ခွင့် လွဲချော်ခဲ့ရတဲ့ နောက်တစ်ရက်မှာပဲ အယ်လီဂရီကို ထုတ်ပယ်လိုက်ကြောင်း အတည်ပြုခဲ့တာပါ။
Sky Sports ရဲ့ ဖော်ပြချက်အရ ကလပ်အသင်းဟာ အယ်လီဂရီရဲ့နေရာမှာ အစားထိုးမယ့်သူကို ခန့်အပ်ဖို့ အချိန်မဖြုန်းတော့ဘဲ အသက် ၄၃ နှစ်အရွယ် ဘုန်းမောက်နည်းပြ အီရာအိုလာကို ကမ်းလှမ်းမှုတွေ ပြုလုပ်ခဲ့ပါတယ်။
အီရာအိုလာဟာ ဒီနွေရာသီမှာ စာချုပ်သက်တမ်းကုန်ဆုံးတာနဲ့ ဘုန်းမောက်အသင်းကနေ ထွက်ခွာတော့မယ်ဆိုတာကို ဒီရာသီအစောပိုင်းမှာတည်းက ကြေညာထားခဲ့သူ ဖြစ်ပါတယ်။
ဒီစပိန်လူမျိုးနည်းပြဟာ ပရီးမီးယားလိဂ်မှာ ၁၇ ပွဲဆက်တိုက် ရှုံးပွဲမရှိစံချိန်ကို တင်နိုင်ခဲ့သလို ဘုန်းမောက်အသင်းသမိုင်းတစ်လျှောက် ပထမဆုံးအကြိမ်အဖြစ် ယူရိုပါလိဂ်ဝင်ခွင့်ရရှိအောင်လည်း စွမ်းဆောင်ပေးနိုင်ခဲ့ပါတယ်။
အီရာအိုလာအတွက်တော့ ရွေးချယ်စရာအခွင့်အလမ်းတွေ အများကြီးရှိနေပြီး အေစီမီလန်အပြင် ခရစ္စတယ်ပဲလေ့စ်၊ လေဗာကူဆင်နဲ့ စီးရီးအေပြိုင်ဘက် နာပိုလီအသင်းတို့နဲ့လည်း သတင်းတွေ ထွက်ပေါ်နေပါတယ်။
