တနင်္လာနေ့က အဲဗာတန်အသင်းနဲ့ ကစားခဲ့တဲ့ပွဲမှာ ၃-၃ ဂိုးနဲ့ သရေကျခဲ့ပြီးနောက် ပရီမီယာလိဂ်ချန်ပီယံလမ်းကြောင်းဟာ သူ့အသင်းရဲ့လက်ထဲကနေ လွတ်ထွက်သွားပြီဖြစ်ကြောင်း မန်စီးတီးနည်းပြ ပပ်ဂွာဒီယိုလာက ဝန်ခံပြောကြားလိုက်ပါတယ်။

"အခုတော့ ဒါဟာ ကျွန်တော်တို့လက်ထဲမှာ မရှိတော့ပါဘူး။ အရင်ကတော့ ရှိခဲ့ပေမဲ့ အခုတော့ မဟုတ်တော့ဘူး" လို့ ဂွာဒီယိုလာက ဆိုပါတယ်။ "ပရီမီယာလိဂ်မှာ ကစားဖို့ (လက်ကျန်) ၄ ပွဲ ရှိပါသေးတယ်။ အဲ့ဒီပွဲတွေကလည်း အခုလိုပဲ ဖြစ်လာမှာပါ၊ ဘာတွေဖြစ်လာမလဲဆိုတာ စောင့်ကြည့်ရမှာပေါ့" လို့ သူက ဆက်ပြောပါတယ်။

မန်စီးတီးအနေနဲ့ တနင်္လာနေ့မှာ အဲဗာတန်၊ အဲ့ဒီနောက် ၅ ရက်အကြာမှာ ဘရန့်ဖို့ဒ်တို့ကို အနိုင်ရခဲ့ရင် ဇယားထိပ်က အာဆင်နယ်နဲ့ အမှတ်တူဖြစ်လာမယ့် အခွင့်အရေး ရှိခဲ့တာပါ။ အခုတော့ သူတို့ဟာ တစ်ပွဲလျော့ကစားထားဆဲဖြစ်ပေမဲ့ အာဆင်နယ်ထက် ၅ မှတ် လျော့နည်းနေပြီး အာဆင်နယ်ဘက်က အမှားအယွင်းရှိလာဖို့ကိုသာ မျှော်လင့်ရမယ့် အနေအထား ဖြစ်နေပါတယ်။

ဂွာဒီယိုလာက Hill Dickinson ကွင်းမှာ နိုင်ပွဲ ၃ မှတ် မရခဲ့ပေမဲ့ ရှုံးပွဲမရှိခဲ့တာကိုပဲ ပြန်လည်သုံးသပ်ခဲ့ပါတယ်။ "ရှုံးတာထက်စာရင်တော့ ပိုကောင်းပါတယ်။ ကျွန်တော်တို့ အနိုင်ရဖို့ပဲ လိုချင်တာပါ။ အဲ့ဒီအတွက်လည်း ကစားခဲ့သလို ကျွန်တော်တို့ ဘယ်လိုအသင်းမျိုးလဲဆိုတာကိုလည်း ပြသနိုင်ခဲ့ပါတယ်။ အစွမ်းကုန် ကြိုးစားခဲ့ကြတာပါ၊ ကစားသမားတွေကလည်း အရမ်းကို တက်ကြွခဲ့ပါတယ်" လို့ သူက ပြောပါတယ်။

တောင်ပံကစားသမား ဂျရမီဒိုကူကတော့ ပွဲချိန် ၉၇ မိနစ်မှာ အဖိုးတန်ချေပဂိုး သွင်းယူပေးခဲ့ပြီး အဲ့ဒီပွဲမှာ နှစ်ဂိုးသွင်းခဲ့ပါတယ်။ သူကလည်း နည်းပြရဲ့ စိတ်ပျက်မှုကို ထပ်တူခံစားရကြောင်း ပြောသလို လက်ကျန် ၄ ပွဲမှာ မန်စီးတီးအနေနဲ့ ယုံကြည်ချက်ကို လက်မလွှတ်သေးကြောင်း အခိုင်အမာ ဆိုခဲ့ပါတယ်။ "အခုချိန်မှာတော့ နာကျင်ရပေမဲ့ ကစားဖို့ ပွဲတွေ အများကြီး ကျန်ပါသေးတယ်၊ ဘာမဆို ဖြစ်သွားနိုင်ပါတယ်။ ကျွန်တော်တို့ ဆက်ပြီး တိုက်ပွဲဝင်သွားမှာပါ။ ဒါဟာ ကျွန်တော်တို့ ကိုယ့်ကိုယ်ကိုယ်ရော ပရိသတ်တွေကိုပါ ပေးထားတဲ့ ကတိပါပဲ" လို့ ဒိုကူက ပြောပါတယ်။

၈၃ မိနစ်မှာ ဂိုးသွင်းခဲ့တဲ့ တိုက်စစ်မှူး အာလင်းဟာလန်းကလည်း ပွဲအပြီးမှာ အသင်းဖော်တွေနဲ့ လက်ဆွဲနှုတ်ဆက်ရင်း "ကျွန်တော်တို့ အခွင့်အရေး ရှိသေးတယ်" လို့ ပြောဆိုခဲ့တာကို ကြားခဲ့ရပါတယ်။

စနေနေ့မှာ ဘရန့်ဖို့ဒ်နဲ့ ကစားရမယ့်ပွဲအပြီးမှာ မန်စီးတီးဟာ ခရစ္စတယ်ပဲလေ့စ်၊ ဘုန်းမောက်နဲ့ အက်စတွန်ဗီလာတို့နဲ့ နောက်ဆုံး လက်ကျန် ၃ ပွဲ ကစားရမှာ ဖြစ်ပါတယ်။ အာဆင်နယ်ကတော့ စာရွက်ပေါ်မှာကြည့်ရင် ပိုလွယ်ကူတဲ့ ပွဲစဉ်တွေ ရှိနေပါတယ်။ သူတို့ဟာ တန်းဆင်းဇုန်အန္တရာယ်ရှိနေတဲ့ ဝက်စ်ဟမ်း၊ တန်းဆင်းသွားပြီဖြစ်တဲ့ ဘန်လေနဲ့ ခရစ္စတယ်ပဲလေ့စ်တို့နဲ့ ရင်ဆိုင်ရမှာပါ။

ချန်ပီယံမျှော်လင့်ချက် အကြီးအကျယ် ထိုးနှက်ခံလိုက်ရပေမဲ့ မန်စီးတီးဟာ နည်းပညာအရ ပြည်တွင်းဖလား သုံးလုံး (Treble) ရယူနိုင်ဖို့ အခွင့်အရေး ရှိနေဆဲ ဖြစ်ပါတယ်။ သူတို့ဟာ မတ်လတုန်းက အာဆင်နယ်ကိုနိုင်ပြီး EFL Cup ရယူထားသလို လာမယ့် မေလ ၁၆ ရက်နေ့မှာလည်း ချဲလ်ဆီးနဲ့ FA Cup ဗိုလ်လုပွဲ ကစားရဦးမှာ ဖြစ်ပါတယ်။