အာဆင်နယ်နဲ့ မန်စီးတီးတို့ရဲ့ ချန်ပီယံတိုက်ပွဲကြောင့် ပရီးမီးယားလိဂ်က နောက်ထပ်တစ်ကြိမ် ရင်ခုန်စရာကောင်းတဲ့ ရာသီပိတ်ကာလဆီ ရောက်ရှိလာပါတော့မယ်။

အာဆင်နယ်က သုံးနှစ်ဆက်တိုက် ဒုတိယနေရာနဲ့ပဲ ကျေနပ်ခဲ့ရပြီးနောက် အခုတစ်ခေါက်မှာတော့ နည်းပြ အာတီတာရဲ့ လက်အောက်မှာ ၂၂ နှစ်ကြာ ဝေးကွာနေတဲ့ အမှတ်ပေးချန်ပီယံဆုဖလားကို ရယူနိုင်ဖို့ နောက်ဆုံးအဆင့်အထိ ကြိုးစားနေပါတယ်။

ဒါပေမဲ့ သူတို့ကို ၂၀၂၃ ခုနှစ်နဲ့ ၂၀၂၄ ခုနှစ်တွေမှာ ချန်ပီယံမဖြစ်အောင် တားဆီးခဲ့ဖူးတဲ့ ပက်ဂွါဒီယိုလာရဲ့မန်စီးတီးအသင်းက ဒီနှစ်မှာလည်း ပြိုင်ဘက်အဖြစ် ဆက်ရှိနေပါတယ်။

အာဆင်နယ်
ကစားပြီး - ၃၂ ပွဲ | ရမှတ် - ၇၀ | ဂိုးကွာခြားချက် - +၃၈

အခက်ခဲဆုံးပွဲစဉ်လား? ဒါကတော့ လာမယ့်သီတင်းပတ်မှာ ကစားရမယ့် မန်စီးတီးအိမ်ကွင်းခရီးစဉ်ဆိုတာ သေချာပါတယ်။ အဲဒီပွဲစဉ်ပြီးရင် လိဂ်ပွဲစဉ်ငါးခုပဲ ကျန်ပါတော့မယ်။ အာဆင်နယ်က ၂၀၁၅ခုနှစ်၊ ဇန်နဝါရီလနောက်ပိုင်း အီတီဟတ်ကွင်းမှာ နိုင်ပွဲမရဖူးသေးပါဘူး။ ၂၀၂၃ ခုနှစ်၊ ဧပြီလမှာ ၄-၁ ဂိုးနဲ့ ဂိုးပြတ်ရှုံးနိမ့်ချိန်မှာလည်း ချန်ပီယံမျှော်လင့်ချက် ပျက်စီးခဲ့ရသလို၊ ၂၀၂၄ မတ်လမှာ ဂိုးမရှိသရေကျချိန်မှာလည်း အမှားမခံဘဲ အစွဲအလမ်းကြီးစွာ ကစားခဲ့ရပါတယ်။ ဝင်ဘလေမှာ မန်စီးတီးက ၂-၀ ဂိုးဖြင့် အနိုင်ရရှိခဲ့တဲ့ ကာရာဘောင်ဖလားဗိုလ်လုပွဲကလည်း သမိုင်းတစ်လျှောက် အကောင်းဆုံးချန်ပီယံလုပွဲဖြစ်လာမယ့် ဒီနှစ်အတွက် စိတ်ဝင်စားစရာအချက်တစ်ခု ဖြစ်လာပါတယ်။

နောက်ဆုံးအဆင့် ပွဲစဉ်များ? စာအုပ်ကြီးအတိုင်းဆိုရင်တော့ အာဆင်နယ်အတွက် အခြေအနေကောင်းနေပါတယ်။ မေလမှာ ဖူလ်ဟမ်၊ ဘန်လေတို့နဲ့ အိမ်ကွင်းမှာ ကစားရမှာပါ။ အမှတ်ပေးဇယားအလယ်ပိုင်းရပ်ဝန်းမှာရှိနေတဲ့ ဖူလ်ဟမ်နဲ့ ခရစ္စတယ်ပဲလေ့စ်တို့က ဘာမှရည်မှန်းချက်မရှိတော့တဲ့ (nothing to play for) အခြေအနေမှာ ရှိနေနိုင်ပြီး အဆင့် ၁၉ နေရာရှိ ဘန်လေကလည်း နောက်ဆုံးပွဲစဉ်တွေမှာ တန်းဆင်းဖို့ သေချာသလောက် ဖြစ်နေပါလိမ့်မယ်။ ဝက်စ်ဟမ်းကတော့ တန်းမဆင်းရဖို့ အသေအလဲ ကစားလာနိုင်ပါတယ်။ ဒါပေမဲ့လည်း အာဆင်နယ်က မေလထဲမှာ ဇယားထိပ်ပိုင်းအသင်းကြီးတွေနဲ့ ကစားဖို့ မရှိသလောက်ပါပဲ။

မန်စီးတီး
ကစားပြီး - ၃၁ ပွဲ | ရမှတ် - ၆၄ | ဂိုးကွာခြားချက် - +၃၅

အခက်ခဲဆုံးပွဲစဉ်လား? ပက်ဂွါဒီယိုလာရဲ့အသင်းက ခြေစွမ်းတက်နေပြီး အာဆင်နယ်နဲ့အမှတ်ကွာဟမှုကို ၆ မှတ်အထိ လျှော့ချနိုင်ခဲ့သလို လက်ကျန်တစ်ပွဲလည်း ကစားဖို့ ကျန်နေပါသေးတယ်။ ဒါကြောင့် သူတို့အတွက် အကြီးမားဆုံး အတားအဆီးကတော့ လာမယ့်သီတင်းပတ်၊ အာဆင်နယ်ကို အိမ်ကွင်းမှာ လက်ခံကစားရမယ့်ပွဲစဉ် ဖြစ်ပါတယ်။ အဲဒီပွဲမှာ အနိုင်ရရှိမယ်ဆိုရင် ချန်ပီယံဆုက သူတို့လက်ထဲ ရောက်လာဖို့ရှိနေပြီး ရှုံးသွားရင်တော့ အာဆင်နယ်တို့ ချန်ပီယံပြေးလမ်းကို ပြန်လည်ဦးဆောင်လာပါလိမ့်မယ်။

နောက်ဆုံးအဆင့် ပွဲစဉ်များ? စာအုပ်ကြီးအတိုင်းဆိုရင်တော့ အာဆင်နယ်ထက် အများကြီး ပိုခက်ခဲပါတယ်။ ဘရန့်ဖို့ဒ်နဲ့ ဘုန်းမောက်တို့က ရာသီပိတ်ကာလမှာ ဥရောပဝင်ခွင့်အတွက် အပြင်းအထန်ကြိုးစားလာနိုင်ပြီး မန်စီးတီးက ဒီအသင်းတွေနဲ့ ရာသီပိတ်ပွဲစဉ်သုံးခုအတွင်းမှာ ကစားသွားရပါမယ်။ ပြီးတော့ ရာသီပိတ်ပွဲစဉ်အဖြစ် အက်စတွန်ဗီလာနဲ့ အိမ်ကွင်းပွဲစဉ်ကလည်း ရှိနေပါသေးတယ်။ နည်းပြအူနိုင်းအမ်မရီရဲ့အသင်းက အဲ့ဒီအချိန်မှာ ချန်ပီယံလိဂ်ဝင်ခွင့် သေချာပေါက်ရရှိနေပြီလား သို့မဟုတ် အဆင့် ၅ အတွင်းဝင်ဖို့ နောက်ဆုံးအချိန်အထိ အသေအလဲ တိုက်ပွဲဝင်နေရမလားဆိုတာ စောင့်ကြည့်သွားရပါမယ်။ အက်စတွန်ဗီလာသာ ယူရိုပါလိဂ်ဗိုလ်လုပွဲအထိ တက်လှမ်းနိုင်မယ်ဆိုရင် မန်စီးတီးအတွက် အခြေအနေကောင်းသွားနိုင်ပါတယ်။

ဒီရာသီပိတ်ကာလက အပိုင်းနှစ်ပိုင်း ခွဲထားသလိုပါပဲ။ အားလုံးက ဧပြီလလယ်မှာ ကစားမယ့် မန်စီးတီးနဲ့ အာဆင်နယ်ပွဲကို အာရုံစိုက်နေကြပြီး အဲဒီနောက်ပိုင်းမှာ အရာရာတိုင်း အဖြေပေါ်လာနိုင်ပါတယ်။ ဒါပေမဲ့ အာဆင်နယ်ရဲ့ ပွဲစဉ်ဇယားက မန်စီးတီးထက် ပိုပြီးသက်သောင့်သက်သာရှိနေတာကိုတော့ မငြင်းဆန်နိုင်ပါဘူး။