စံချိန်တင်ပြောင်းရွှေ့ကြေး ပေါင် ၁၃၀ သန်းနဲ့ မန်စီးတီးသို့ ပြောင်းရွှေ့တော့မယ့် အီလီယော့အန်ဒါဆန်
နော်တင်ဟမ်ဖောရက်စ်အသင်းရဲ့ ကွင်းလယ်လူ အီလီယော့အန်ဒါဆန်ကို ခေါ်ယူဖို့ ဗြိတိန်စံချိန်တင်ပြောင်းရွှေ့ကြေးဖြစ်တဲ့ ပေါင် ၁၃၀ သန်းအထိရှိမယ့် သဘောတူညီချက်တစ်ခုကို မန်ချက်စတာစီးတီးအသင်းက ရရှိခဲ့ပါတယ်။
BBC ရဲ့ ဖော်ပြချက်အရ အသက် ၂၃ နှစ်အရွယ် အင်္ဂလန်လက်ရွေးစင်ကစားသမားဟာ အီတီဟတ်ကွင်းကို မပြောင်းရွှေ့ခင်မှာ ဆေးစစ်မှုတွေ ခံယူသွားရဖို့ ရှိနေပါတယ်။
ဖောရက်စ်အသင်းဟာ အရင်က ကမ်းလှမ်းမှုနှစ်ခုကို ပယ်ချခဲ့ပြီးနောက် မန်စီးတီးရဲ့ တတိယအကြိမ်မြောက် ကမ်းလှမ်းမှုကို လက်ခံခဲ့တာဖြစ်ပါတယ်။ ဒီပြောင်းရွှေ့ကြေးဟာ လီဗာပူးအသင်းက အလက်ဇန္ဒားအိုက်ဆက်အတွက် နယူးကာဆယ်ကို ပေးချေခဲ့တဲ့ ပေါင် ၁၂၅ သန်းထက် ကျော်လွန်သွားမှာဖြစ်ပါတယ်။
အန်ဒါဆန်ဟာ ၂၀၂၄ ခုနှစ်မှာ နယူးကာဆယ်အသင်းကနေ ပေါင် ၃၅ သန်းနဲ့ ဖောရက်စ်ကို ရောက်ရှိလာခဲ့တာဖြစ်ပြီး စုစုပေါင်း ၈၈ ပွဲ ကစားပေးခဲ့ရာမှာ ၄ ဂိုး သွင်းယူပေးခဲ့ပါတယ်။
သူဟာ ၂၀၂၄-၂၅ ရာသီမှာ အသင်းကို ပရီးမီးယားလိဂ် အဆင့် ၇ ရရှိအောင် ကူညီပေးခဲ့သလို နောက်တစ်ရာသီမှာလည်း ယူရိုပါလိဂ် ဆီမီးဖိုင်နယ်အထိ တက်လှမ်းနိုင်အောင် အဓိကနေရာကနေ ပါဝင်ကူညီပေးခဲ့သူပါ။
လက်ရှိမှာတော့ ဖောရက်စ်အသင်းဟာ ရရှိလာတဲ့ ပြောင်းရွှေ့ကြေးကို အသုံးပြုပြီး ကစားသမားသစ်တွေ ပြန်လည်ခေါ်ယူဖို့ ပြင်ဆင်နေပါတယ်။ စပါးအသင်းက လူကပ်စ်ဘာ့ဂ်ဗောနဲ့ အင်တာမီလန်အသင်းက ဒေးဗစ် ဖရတ်တေစီတို့ဟာ သူတို့ရဲ့ ကွင်းလယ်ပစ်မှတ်စာရင်းမှာ ပါဝင်နေပါတယ်။
