သောမတ်စ်တူချယ်က ဘန်ဝှိုက်ကို ပြန်လည်ခေါ်ယူခဲ့ပြီးနောက် အင်္ဂလန်အသင်းရဲ့ကမ္ဘာ့ဖလားပြိုင်ပွဲဝင်ကစားသမားရွေးချယ်မှုမှာ ဘယ်သူ့ကိုမဆို အခွင့်အရေးပေးမယ့် "တံခါးဖွင့်ဝါဒ"ကို ကျင့်သုံးနေတယ်လို့ အရိပ်အမြွက် ပြောကြားခဲ့သလို သူ့အတွက်တော့ "ပြတင်းပေါက်တွေ ဖွင့်ထားဖို့"ဆိုတာလည်း အရေးကြီးတယ်လို့ ဆိုပါတယ်။

ဒါကတော့ နည်းပြက ကစားသမားတွေကို လွတ်လပ်မှုပေးနိုင်မယ့် "နွေးထွေးပြီး သီးသန့်ဆန်တဲ့"ဟိုတယ်မျိုးကို အလိုရှိနေလို့ ဖြစ်ပါတယ်။ အိပ်ခန်းပေါင်း ရာနဲ့ချီရှိတဲ့ အမေရိကန်ဟိုတယ်ကြီးတွေမှာဆိုရင် ကစားသမားတွေအတွက် အဲဒီလိုလွတ်လပ်မှုမျိုးရရှိဖို့ ခက်ခဲနိုင်ပါတယ်။

တူချယ်က "ပြတင်းပေါက်ဖွင့်လို့ရတဲ့ ဟိုတယ်" အကြောင်းကို အထူးတလည် ပြောကြားခဲ့ပြီး ဒါက ပြိုင်ပွဲကာလတလျှောက် ကန်းဆက်စီးတီး (Kansas City) မှာပဲ အခြေစိုက်ဖို့ အင်္ဂလန်အသင်းဆုံးဖြတ်ရခြင်းရဲ့အဓိကအကြောင်းရင်းတစ်ခုလည်း ဖြစ်ပါတယ်။ သူက ကစားသမားတွေကို ကိုယ့်အိမ်မှာနေရသလိုမျိုး ခံစားချက် ရစေချင်ပါတယ်။

ကမ္ဘာ့ဖလားပြိုင်ပွဲအတွင်း ခရီးသွားလာမှုတွေ အများအပြားရှိလာနိုင်ခြင်းနဲ့ ပတ်သက်ပြီး မေးမြန်းရာမှာတော့ ချယ်လ်ဆီးနည်းပြဟောင်းက ကန်းဆက်စီးတီးမှာပဲ ဘာကြောင့် အချိန်အကြာကြီးနေဖို့ စီစဉ်ထားတယ်ဆိုတာကို အခုလို ရှင်းပြခဲ့ပါတယ်။

"ကျွန်တော်တို့ ကိုယ့်အိမ်လိုမျိုး အခြေစိုက်စခန်းတစ်ခုရှိဖို့၊ အမြဲအိပ်နေကျကုတင်နဲ့ မွေ့ရာကောင်းကောင်းမှာ အိပ်ခွင့်ရဖို့၊ ကိုယ်ပိုင်လွတ်လပ်ခွင့်ရှိတဲ့ ဟိုတယ်မျိုးဖြစ်ဖို့ ကြိုးစားနေပါတယ်။ မနက်စာစားချိန် ဒါမှမဟုတ် အစည်းအဝေးသွားတဲ့အချိန် ဓာတ်လှေကားထဲမှာပဲ ခဏတဖြုတ် ဆုံရနိုင်တဲ့ အခန်းပေါင်း ၄၀၀၊ ၅၀၀ ဒါမှမဟုတ် ၈၀၀ လောက်ရှိတဲ့ ဟိုတယ်ကြီးတွေကို ကျွန်တော်တို့ မလိုချင်ပါဘူး" လို့ တူချယ်က ဆိုပါတယ်။

ဆက်လက်ပြီး သူက "အမေရိကန်ဟိုတယ်တော်တော်များများမှာ လေအေးပေးစက်ပဲ ဖွင့်ထားပြီး ပြတင်းပေါက်တွေ ဖွင့်လို့မရပါဘူး။ အဲဒီအချက်က ကွာခြားမှုရှိတယ်လို့ ကျွန်တော်ထင်ပါတယ်။ ဒါကြောင့် ကျွန်တော်တို့က ပြတင်းပေါက်ဖွင့်လို့ရတဲ့၊ သေးငယ်ပြီး သီးသန့်ဆန်တဲ့ဟိုတယ်ကို ရွေးချယ်ခဲ့တာပါ။ အဲဒီနေရာနဲ့ ရင်းနှီးသွားပြီဆိုရင် အမြဲတမ်း အဲဒီကိုပဲပြန်လာတာက ပိုပြီးအဓိပ္ပာယ်ရှိပါတယ်" လို့ ရှင်းပြခဲ့ပါတယ်။

အင်္ဂလန်အသင်းက ဇွန် ၁၇ ရက်၊ ဒဲလက်စ်မှာ ခရိုအေးရှားနဲ့ ကမ္ဘာ့ဖလားအုပ်စုအဖွင့်ပွဲစဉ် ယှဉ်ပြိုင်ကစားရပါမယ်။ ပြိုင်ပွဲစတင်ပြီး ကိုးရက်အကြာမှသာ ပွဲဦးထွက်ကစားရမှာဖြစ်လို့ တူချယ်က ကစားသမားတွေရဲ့ဆန္ဒကိုလည်း မေးမြန်းခဲ့ပါတယ်။ အင်္ဂလန်အသင်းက ဖလော်ရီဒါမှာ အကြိုပြင်ဆင်မှုတွေပြုလုပ်ပြီးနောက် ဇွန် ၁၃ ရက်မှာ ကန်းဆက်စီးတီးဆီ သွားရောက်ပါလိမ့်မယ်။

"ပွဲစဉ်တွေနောက်ကျမှ စတင်ရတယ်ဆိုတာကို ကစားသမားတွေ သဘောကျကြပါတယ်။ အဲဒီလိုဖြစ်မှလည်း နောက်ပိုင်း ပွဲတွေဆက်တိုက်ဖြစ်သွားချိန် ပျင်းနေဖို့အတွက် အချိန်မရှိနိုင်တော့ပါဘူး" လို့ တူချယ်က ထပ်လောင်းပြောကြားခဲ့ပါတယ်။

"ကစားသမားတွေအတွက်တင်မက အားလုံးအတွက် ကြည့်မယ်ဆိုရင်လည်း နောက်ထပ်တစ်ရက်လောက် ပိုရတာက အသုံးဝင်နိုင်တယ်လို့ ကျွန်တော် ခံစားမိပါတယ်။ ဒါကြောင့် အခုလိုဆုံးဖြတ်ချက်တွေ ချခဲ့တာပါ။ အဓိကပြောချင်တာကတော့ ကျွန်တော်တို့ ကန်းဆက်စီးတီးမှာ တတ်နိုင်သမျှ အချိန်အကြာဆုံး နေသွားပါမယ်" လို့ သူက ဆိုပါတယ်။