
ချဲလ်ဆီးကို ငြင်းဆန်ပြီး တော့တင်ဟမ်ဆီပြောင်းရွှေ့ဖို့ ဘာကြောင့်ရွေးချယ်သလဲဆိုတာ ရှင်းပြလိုက်တဲ့ ဇာဗီဆိုင်မွန်စ်
တော့တင်ဟမ်ဆီ ပြောင်းရွှေ့ကြေးပေါင် ၅၂ သန်းဖြင့် ရောက်ရှိလာခဲ့တဲ့ ဇာဗီဆိုင်မွန်စ်က ချဲလ်ဆီးထက် မြောက်လန်ဒန်ကလပ်ကို ရွေးချယ်ဖို့ သောမတ်စ်ဖရန့်ခ်ကိုယ်တိုင် စည်းရုံးခဲ့တယ်လို့ ဖွင့်ဟလာပါတယ်။ အခုနွေရာသီတလျှောက်လုံး၊ ချဲလ်ဆီးဆီ ငွေလုံးငွေရင်းကြီးကြီးမားမားဖြင့် ဇာဗီဆိုင်မွန်စ် ရောက်ရှိလာတော့မယ်လို့ သတင်းကြီးခဲ့သလို မာရက်စ်ကာကိုယ်တိုင်လည်း လိုက်ပ်ဇစ်ကြယ်ပွင့်ကို ထိပ်တန်းပစ်မှတ်တစ်ခုအဖြစ် သတ်မှတ်ခဲ့ပါတယ်။
ဒါပေမဲ့ ချဲလ်ဆီးက နယ်သာလန်လက်ရွေးစင်ကစားသမားအတွက် တရားဝင်ကမ်းလှမ်းမှုတစုံတရာ မပြုလုပ်ခဲ့ဘဲ မန်ချက်စတာယူနိုက်တက်ရဲ့ဂါနာချိုကိုခေါ်ယူနိုင်ရေးအတွက်သာ ဦးစားပေးလုံးပမ်းခဲ့ပါတယ်။ ဒါကြောင့် အခုသီတင်းပတ်အတွင်းမှာပဲ တော့တင်ဟမ်က အရည်အသွေးမြင့်အသက်-၂၂ နှစ်အရွယ်ကစားသမားရဲ့ဝန်ဆောင်မှုကို ရရှိဖို့ ငါးနှစ်သက်တမ်းရှိစာချုပ်တစ်ရပ် ကိုင်ဆောင်ကာ ဈေးကွက်ဆီ ဝင်ရောက်ခဲ့ပါတယ်။
ချဲလ်ဆီးဆီပြောင်းရွှေ့ဖို့သာ အလွန်လိုလားတယ်လို့ ယူဆခံထားရတဲ့ ဇာဗီဆိုင်မွန်စ်နဲ့ပတ်သက်လို့ ဒီအပြောင်းအရွှေ့ကြောင့် အံ့အားသင့်မှင်သက်ခဲ့ရပါတယ်။ ဒါပေမဲ့ ကစားသမားက သူ့ရဲ့စိတ်ကူးတွေ ပြောင်းလဲသွားစေဖို့ အခုသီတင်းပတ်အစောပိုင်းမှာ တော့တင်ဟမ်နည်းပြသောမတ်စ်ဖရန့်ခ် စွမ်းဆောင်နိုင်ခဲ့တယ်လို့ ရှင်းပြပါတယ်။ တော့တင်ဟမ်အသင်းဝက်ဘ်ဆိုဒ်နဲ့တွေ့ဆုံချိန် ဇာဗီဆိုင်မွန်စ်က “ ကျွန်တော် အရမ်းပျော်ရွှင်နေပြီး အသင်းနဲ့ပူးပေါင်းဖို့ မစောင့်ဆိုင်းနိုင်တော့ပါဘူး။ အခုလိုပြောင်းရွှေ့နိုင်ရေး အိပ်မက်,မက်နေခဲ့တာ အချိန်အတော်ကြာသွားပါပြီ။
ကြီးကျယ်ခမ်းနားတဲ့ကလပ်အသင်းတစ်ခု ဖြစ်ပါတယ်။ နည်းပြနဲ့တွေ့ဆုံပြီးနောက်မှာ ဒီကလပ်အသင်းက ကျွန်တော့်အတွက် မှန်ကန်တဲ့နေရာတစ်ခုဖြစ်လာလိမ့်မယ်ဆိုတာ ချက်ချင်းဆိုသလို သိသွားခဲ့ပါတယ်။ ပထမဆုံးအနေနဲ့ ကလပ်အသင်းရဲ့စီမံကိန်းက ကျွန်တော်နဲ့ကိုက်ညီတယ်လို့ ထင်ပါတယ်။ ဒုတိယတစ်ခုကတော့ ကျွန်တော့်အတွက် အရေးအကြီးဆုံးအရာက နည်းပြဖြစ်မယ်လို့ ထင်ပါတယ်။ သူနဲ့ စကားပြောဖြစ်ချိန်မှာ သူက ကျွန်တော့်အတွက် အရမ်းကိုအကျိုးသက်ရောက်စေတဲ့ တင်ပြချက်တစ်ခုကို ပြသခဲ့ပါတယ်။ ဒါက ကျွန်တော့်ရဲ့နောက်ဆုံးဆုံးဖြတ်ချက်တစ်ခုကို ဖြစ်လာစေပါတယ်။
မှန်ကန်တဲ့နည်းပြ၊ မှန်ကန်တဲ့လူပုဂ္ဂိုလ်တွေနဲ့အတူ ဒီကလပ်အသင်းမှာ အရမ်းကောင်းတဲ့အရာတွေ ရရှိလာလိမ့်မယ်လို့ ယုံကြည်ထားပါတယ်။ ကျွန်တော်က အသင်းဆီ မျှော်လင့်ချက်အသစ်တွေ ယူဆောင်လာပေးမှာဖြစ်သလို အလုပ်ကြိုးစားမှုနဲ့ စည်းကမ်းပိုင်းကိုလည်း မြှင့်တင်ပေးသွားပါမယ်။ အသင်းနဲ့ ပရိသတ်တွေအတွက် ကျွန်တော်လုပ်နိုင်သမျှ အရာအားလုံးကို လုပ်သွားချင်ပါတယ်”လို့ ပြောပါတယ်။
ဇာဗီဆိုင်မွန်စ်က တော့တင်ဟမ်မှာ လစ်လပ်သွားပြီဖြစ်တဲ့ ဂန္တဝင်ကြီးဆွန်ဟောင်မင်ရဲ့ကျောနံပါတ် - ၇ ဂျာစီကို ဆက်ခံသွားမှာဖြစ်ပေမယ့် လာမယ့်ဘုန်းမောက်နဲ့ပွဲစဉ်ကိုတော့ ပါဝင်ကစားနိုင်ဖို့ မရှိပါဘူး။ လိုက်ပ်ဇစ်ကြယ်ပွင့်ရောက်ရှိလာမှုက အခုနွေရာသီကာလအတွင်း ကွင်းလယ်တိုက်စစ်ပိုင်းအတွက် ဦးစားပေးပစ်မှတ်တွေဖြစ်တဲ့ ဂစ်ဝှိုက်၊ အီဇီတို့နဲ့လွဲချော်ခဲ့တဲ့ တော့တင်ဟမ်အတွက် ကြီးမားတဲ့အောင်ပွဲတစ်ခု ဖြစ်လာပါလိမ့်မယ်။
ယမန်နေ့(သောကြာနေ့)မှာလည်း သောမတ်စ်ဖရန့်ခ်က “ ဇာဗီဆိုင်မွန်စ်ကို ခေါ်ယူနိုင်ခဲ့လို့ ကျွန်တော် အရမ်းကျေနပ်မိပါတယ်။ သူက အသင်းအတွက် ကောင်းမွန်တဲ့ အင်အားဖြည့်တင်းမှုပါ။ ဆိုင်မွန်စ်က ငယ်ရွယ်သေးပေမယ့် အရမ်းကောင်းတဲ့အတွေ့အကြုံတွေ ပိုင်ဆိုင်ထားပါတယ်။ ပြီးခဲ့တဲ့နှစ်တွေအတွင်း အဆင့်အမြင့်ဆုံးပြိုင်ပွဲတွေမှာ ပွဲစဉ်တွေ အများကြီးကစားခဲ့ပါတယ်။ ဆိုင်မွန်စ်က No.10 နေရာမှာရော၊ ဘယ်တောင်ပံမှာပါ ကစားနိုင်စွမ်းရှိပြီး သွင်းဂိုးနဲ့ ဂိုးဖန်တီးနိုင်မှုတွေရရှိမယ့် သူ့ရဲ့အရည်အသွေးကိုလည်း သက်သေပြခဲ့ပြီးပါပြီ။ သူက ခံစစ်ပိုင်းအတွက်လည်း အကူအညီပေးနိုင်ပြီး အတူတကွအလုပ်ကြိုးစားမှုကို သက်သေပြထားပြီးဖြစ်တဲ့ အသင်းလူစာရင်းတစ်ခုမှာ အရေးပါတဲ့အစိတ်အပိုင်းတစ်ရပ် ဖြစ်လာပါလိမ့်မယ်”လို့ ပြောပါတယ်။