ဟန်ဆီဖလစ်က ဘာစီလိုနာကို အမှန်တကယ် ပြောင်းလဲခဲ့ပြီး ကစားသမားတွေရဲ့ ကြံ့ခိုင်မှုကစလို့ တိုက်စစ်ပုံစံ အပါအဝင် အထူးသဖြင့် အနိုင်ရဖို့ စိတ်ဓာတ် အထိ အကုန် ပြောင်းလဲခဲ့ပါတယ်။ ဒါပေမယ့် လက်ရှိလူငယ်အသင်းရဲ့ အုတ်မြစ်ကို ဇာဗီဟာ အသင်းမှာ ရှိစဉ်အခါက ချမှတ်ခဲ့တာ ဖြစ်တယ်လို့ ယုံကြည်စိတ်ချစွာ ပြောနိုင်ပါတယ်။

အသင်းရဲ့ ဂန္ထဝင်တွေထဲက တစ်ဦးဖြစ်တဲ့ ဇာဗီဟာ ပြီးခဲ့တဲ့ ရာသီကုန်မှာ ထုတ်ပယ်ခံခဲ့ရပြီး ဟာသဖြစ်သွားတာက ဆက်နေဖို့ သဘောတူခဲ့ပြီး ရက်သတ္တပတ် အနည်းငယ်အကြာမှာပဲ ဖြစ်ခဲ့တာပါ။ သူ့ရဲ့ အခြေအနေကို ပိုပြီးအဆင်ပြေအောင် ကိုင်တွယ်သင့်ခဲ့ပေမယ့် ဘာစီလိုနာအတွက်ကတော့ အသစ်သစ်သော အမြင်တစ်ခု လိုအပ်နေကာ ရပ်တန့်နေတဲ့ အခြေအနေကနေ ရုန်းထွက်ဖို့အတွက် အဲ့ဒီလုပ်လိုက်တာကလည်း အကျိုးဖြစ်ထွန်းခဲ့ပါတယ်။

ဘာစီလိုနာကနေ ထွက်ခွာပြီးနောက် ပထမဆုံး အင်တာဗျူးမှာ ဇာဗီက ကာတာလိုနီယာမှာ နည်းပြအဖြစ်ရှိစဉ်က အချိန်နဲ့ ပတ်သက်ပြီး ဘယ်လို ပြန်တွေးကြည့်တယ်ဆိုတာ ဖွင့်ဟခဲ့ပါတယ်။ "ကျွန်တော့်ရဲ့ မှတ်တမ်းကို ကြည့်မယ်ဆိုရင် ကျွန်တော့် နည်းပြအဖွဲ့ကိုပါ ထည့်ပြောတာပါ အရမ်းအပြုသဘောဆောင်ပါတယ်" လို့ စပြီး ဇာဗီက ပြောပါတယ်။ ဒီအကြောင်းနဲ့ ပတ်သက်ပြီး သူ့ရဲ့ ရပ်တည်ချက်ကို သူက အခုလို ရှင်းပြခဲ့ပါတယ်။

"ဘာလို့လဲဆိုတော့ အသင်းဟာ သမိုင်းမှာ အဆိုးရွားဆုံး ကာလတွေထဲက တစ်ခုမှာ ရှိနေခဲ့တာပါ။ ဖြစ်နိုင်တာက အစပိုင်းထက်တောင် ပိုဆိုးနိုင်ပါတယ်" ဇာဗီက ပြင်ပလောကက သူ့အပေါ် ထားရှိတဲ့ မြင့်မားလွန်းတဲ့ မျှော်လင့်ချက်တွေနဲ့ သူကိုယ်တိုင် ထားရှိတဲ့ မြင့်မားတဲ့ မျှော်လင့်ချက်တွေကိုလည်း ဖြေရှင်းပြောဆိုခဲ့ပါတယ်။

"ကျွန်တော့်ရဲ့ ဘာစီလိုနာနဲ့ သမိုင်းကြောင့် မျှော်လင့်ချက်တွေ အရမ်းမြင့်မားခဲ့တယ်။ အသင်းနဲ့ ကျွန်တော့်ရဲ့ နက်ရှိုင်းတဲ့ စိတ်ခံစားမှုဆက်နွယ်မှုက တစ်ခါတလေ ကျွန်တော့်ကို ထိခိုက်စေခဲ့တယ်။ တစ်ခါတလေ ကျွန်တော့် စိတ်ခံစားမှုနဲ့ ဆုံးဖြတ်ခဲ့မိပေမယ့် ဒီအတွေ့အကြုံက ကျွန်တော့်အတွက် တကယ့် သင်ခန်းစာတစ်ခု ဖြစ်ခဲ့ပါတယ်"

အသင်းနည်းပြအဖြစ် ရှိစဉ်ကာလကို အောင်မြင်ခဲ့တယ်လို့ အခိုင်အမာ ပြောခဲ့ပေမယ့် ဂန္ထဝင်ကစားသမားဟာ သူ့သက်တမ်းအတွင်း အမှားတွေ လုပ်ခဲ့မိတာကို နှိမ့်ချစွာ လက်ခံခဲ့ပါတယ်။
"ကျွန်တော့် စီမံခန့်ခွဲမှုမှာ အမှားအချို့ လုပ်ခဲ့မိတာကို ဝန်ခံပါတယ်။ ဘက်စ်ကွက် ထွက်ခွာသွားတာက ကျွန်တော်တို့ရဲ့ ကစားဟန်ကို ပြန်စဉ်းစားဖို့ တွန်းအားပေးခဲ့တယ်"

"ကျွန်တော် တိုက်စစ်ကစားသမား သုံးဦးနဲ့ ကွင်းလယ်ကို ကစားဖို့ ရွေးချယ်ခဲ့ပေမယ့် ဒါက အမြဲတမ်း အကောင်းဆုံး ရွေးချယ်မှု မဟုတ်ခဲ့ဘူး" လို့ သူက ထပ်ပြောခဲ့ပါတယ်။
တစ်ချိန်တည်းမှာပဲ သူက ဒီနေ့အသင်းကို ထပ်မံကြီးကျယ်ခမ်းနားစေပြီး ခေတ်တစ်ခုကို သတ်မှတ်ဖို့ အလားအလာ ရှိတဲ့ ကစားသမားတွေကို ပွဲထွက်ခွင့်ပေးခဲ့ခြင်းနဲ့ အခွင့်အရေးပေးခဲ့ရတာကို ဂုဏ်ယူတယ်လို့ ပြောခဲ့ပါတယ်။

"ဆုဖလားတွေထက် ကျော်လွန်ပြီး ဖာမင် လိုပက်ဇ်၊ ယာမဲလ်၊ ကူဘာဆီ၊ ဘာလ်ဒီလို မျိုးဆက်သစ်တွေကို ယုံကြည်အားကိုးခဲ့ရတာကို ဂုဏ်ယူမိတယ်။ သူတို့က အသင်းရဲ့ အနာဂတ်ကို ကိုယ်စားပြုပါတယ်" လို့ ပြောပါတယ်။ ကာတာလိုနီယာကို နည်းပြအဖြစ် ဘယ်လို ရောက်လာခဲ့လဲဆိုတာနဲ့ ပတ်သက်ပြီး လာပေါ်တာရဲ့ ဆက်သွယ်မှု မတိုင်ခင် ဘာစီလိုနာက နှစ်ကြိမ် ဆက်သွယ်ခဲ့တယ်လို့ ဇာဗီက ပြောကြားလိုက်ပါတယ်။

"ဘာစီလိုနာက လာပေါ်တာ မဆက်သွယ်ခင်က နှစ်ကြိမ် ဆက်သွယ်ခဲ့ပေမယ့် ကျွန်တော် အဆင်သင့် မဖြစ်သေးဘူးလို့ ခံစားရတယ်" ပြီးတော့ သူ့အိပ်မက်အသင်းရဲ့ နည်းပြအဖြစ် ပထမရာသီနဲ့ ပတ်သက်ပြီး သူ့အတွေးတွေကို ဖွင့်ဟပြောကြားခဲ့ပါတယ်။ ကျွန်တော့်ရဲ့ ဘာစီလိုနာမှာ ပထမတစ်နှစ်ခွဲက အရမ်းကောင်းခဲ့တယ်။ ကျွန်တော်တို့မှာ မာတူ အလီမာနီနဲ့ ဂျော်ဒီ ခရူးဖ်နဲ့ အတူ စီမံကိန်းတစ်ခု ရှိခဲ့တယ်"

"ဒါက ကျွန်တော်တို့ကို လိဂ်မှာ ဒုတိယနေရာ အဆုံးသတ်နိုင်ခဲ့ပြီး ပြီးတော့ လိဂ်နဲ့ စပိန်စူပါဖလားကို ရခဲ့တယ်။ ဒါပေမယ့် အဲဒီနောက်မှာ ရလဒ်တွေ ကျဆင်းသွားတယ်" လို့ သူက ထပ်ပြောခဲ့ပါတယ်။ အသင်းရဲ့အဆင့်ကျဆင်းမှုဟာ သူ့ရဲ့ စီမံကိန်းကို ဖြည့်ဆည်းပေးခဲ့တဲ့ အဓိကပုဂ္ဂိုလ်တွေ ထွက်ခွာသွားတာကြောင့်လို့ အသင်းဂန္ထဝင်ကစားသမားက ဆိုခဲ့ပါတယ်။
"ဂျော်ဒီ ခရူးဖ်နဲ့ မာတူ အလီမာနီ ထွက်ခွာသွားတာက ကြီးမားတဲ့ ထိုးနှက်မှု ဖြစ်ခဲ့ပါတယ်"
ဇာဗီက သူ့ရဲ့ နည်းပြပုံစံနဲ့ ကာတာမှာ တိုတောင်းတဲ့ အချိန်အတွင်း ဘယ်လို အတွေ့အကြုံ ရရှိခဲ့လဲဆိုတာကို ဖွင့်ဟခဲ့ပါတယ်။

"ကာတာမှာ အယ်လီဂရီ၊ ပက်ဂွါဒီယိုလာ၊ ဟန်ဆီဖလစ်လို နည်းပြတွေ ကျွန်တော်တို့ထံ လာရောက်ခဲ့တယ်။ ကျွန်တော်ဟာ နည်းပြညွှန်ကြားမှု ကွန်ဖရင့်တွေ အများအပြား တက်ခဲ့ပြီး ဒါက ကျွန်တော့်ကို ဖွံ့ဖြိုးလာအောင် ကူညီခဲ့ပါတယ်"

"အဲဒီမှာ ခရူးဖ်ရဲ့ မတူညီတဲ့ ဘောလုံးစနစ်ကို ကျွန်တော် ရှာဖွေတွေ့ရှိခဲ့တယ်" လို့ သူက ထပ်ပြောခဲ့ပါတယ်။ ဘောလုံးကို ခေတ်မီအောင် ဘယ်လို ပေါင်းစပ်ပြီး အကောင်းဆုံး အစိတ်အပိုင်းတွေကို ပေါင်းစည်းဖို့ ကြည့်ခဲ့လဲဆိုတာနဲ့ ပတ်သက်ပြီး၊ သူက အခုလို ပြောခဲ့ပါတယ်။ "တချို့ နည်းပြတွေက တန်ပြန်တိုက်စစ်၊ ခံစစ်ကို အနိမ့်ကစားတာ၊ ဇုန်တွေမှာ လူကပ်ကစားတွေ၊ ကစားကွက်ကို အမြန်ကစားတာကို နှစ်သက်ကြပါတယ်။ ဒါတွေက ကျွန်တော့် ကစားသမားဘဝမှာ တစ်ခါမှ မလေ့ကျင့်ခဲ့ဖူးတဲ့ အရာတွေပါ"

"ဒါက ကျွန်တော့်ရဲ့ ဘောလုံးအမြင်ကို စဉ်းစားစေခဲ့ပါတယ်။ နည်းပြတစ်ယောက် ဖြစ်တဲ့အခါ ပွဲရဲ့ အကျုံးဝင်မှု အားလုံးကို ကျွမ်းကျင်ရပါမယ်။ transitions နဲ့ set pieces တွေက ဖီဖာရဲ့ လေ့လာမှုအရ ကမ္ဘာတဝှမ်း ဂိုးတွေရဲ့ လေးပုံတစ်ပုံနီးပါး ဖြစ်စေပါတယ်။ ဒါ့အပြင် ကြံ့ခိုင်မှုဘက်ကိုပါ ထည့်စဉ်းစားရပါတယ်" လို့ ဇာဗီက ထပ်ပြောခဲ့ပါတယ်။ ဒီနေ့ ဘောလုံးမှာ မြင့်မားတဲ့ ဖိအားပေး ကစားနည်းရဲ့ အရေးပါမှုနဲ့ ဘာစီလိုနာမှာ ဘယ်လို အကောင်အထည်ဖော်ဖို့ ကြိုးစားခဲ့လဲဆိုတာကို သူက ရှင်းပြခဲ့ပါတယ်။

"ကစားသမားတစ်ဦးဟာ ပြည့်စုံတဲ့ အားကစားသမား ဖြစ်လာပြီး ပွဲက ပိုမြန်လာပါတယ်။ သုံးစက္ကန့်အတွင်း ဘောလုံး ပြန်ရယူမှုက တိုက်စစ်အဖြစ် ပြောင်းသွားပါတယ်။ ဘာစီလိုနာမှာ ကျွန်တော်တို့ ပြိုင်ဘက်ကို လွှမ်းမိုးခဲ့ပြီး မြင့်မားတဲ့ ဖိအားပေးမှုကို အားကိုးတဲ့ နည်းပြတွေ နည်းပါတယ်"
"အခု အားလုံးက ဘောလုံးကို မြန်မြန် ပြန်ရဖို့ လုပ်ကြတယ်။ ဒါကြောင့် ဘောလုံးကို ထုတ်တာ၊ middle block လုပ်တဲ့အခါမှာ ဘယ်အသေးစိတ်ကိုမှ လျစ်လျူမရှုဘဲ လုပ်ရတယ်" လို့ သူက ထပ်ပြောခဲ့ပါတယ်။

သူ့ရဲ့ အတွေးအခေါ်ကို အနှစ်ချုပ်ရင်း ဇာဗီက "ကျွန်တော့်ရဲ့ အတွေးအခေါ်က အစိတ်အပိုင်း ၄ ခုပေါ်မှာ အခြေခံပါတယ်။ ဖိအားပေးမှု၊ ဘောလုံးပိုင်ဆိုင်မှု၊ ဗဟိုချက်၊ ခံစားမှု နဲ့ စိတ်အားထက်သန်မှုပါ" လို့ ပြောပါတယ်။ ခရူးဖ်ရဲ့ ပုံမှန် ကစားဟန်ထက် ခေတ်မီကစားနည်းကို ပိုနှစ်သက်ပေမယ့် ဇာဗီက ဘောလုံးပိုင်ဆိုင်မှု ကစားဟန်ကနေ လွှမ်းမိုးမှု ခံခဲ့ရတဲ့သူတစ်ယောက်လို့ ဝန်ခံခဲ့ပါတယ်။

"ဘောလုံးကို ပိုင်ဆိုင်မှုရထားပြီး ဘောလုံး ဆုံးရှုံးတဲ့အခါ ပြိုင်ဘက်ကို ဖိအားပေးတဲ့ အသင်းတွေကို ကြည့်ရတာ ကျွန်တော် နှစ်သက်ပါတယ်"
"ကျွန်တော် မန်စီးတီနဲ့ ဂွါဒီယိုလာ၊ လီဗာပူးနဲ့ အာနီ စလော့၊ ဘိုင်ယန်မြူးနစ်နဲ့ ကွန်ပနီ၊ လီဗာကူဆင်နဲ့ အလွန်ဆို၊ အာဆင်နယ်နဲ့ အာတီတာ၊ မာဆေးလ်နဲ့ ဒီဇာဘီ၊ ပဲရစ်နဲ့ အင်နရစ်တို့ကို လိုက်ကြည့်ပါတယ်"

နည်းပြတစ်ဦးအနေနဲ့ သူ့ရဲ့ ရည်မှန်းချက်တွေကို ဖွင့်ဟပြောကြားရင်း ဇာဗီက အနာဂတ်မှာ လက်ရွေးစင်အသင်းတစ်သင်းကို တာဝန်ယူဖို့ အရိပ်အမြွက် ပြောခဲ့ပါတယ်။
"နည်းပြတစ်ယောက်အနေနဲ့ ကျွန်တော်က ချန်ပီယံလိဂ်၊ ယူရိုပြိုင်ပွဲ၊ ကမ္ဘာ့ဖလားကို ရချင်ပါတယ်" ဘာစီလိုနာ နည်းပြဟောင်းကို နောက်ထပ် ဘယ်လိဂ်မှာ စမ်းသပ်ကြည့်ချင်လဲဆိုတာ မေးတဲ့အခါ သူက ရွေးချယ်စရာတွေ အတွက် လမ်းဖွင့်ထားတယ်လို့ တုံ့ပြန်ခဲ့ပါတယ်။

"ကျွန်တော် လမ်းဖွင့်ထားပါတယ်။ ဘာကြောင့် လာလီဂါမှာ တခြားအသင်းကို နည်းပြမလုပ်ရမှာလဲ။ ကျွန်တော်က စိတ်လှုပ်ရှားစရာ စီမံကိန်းတစ်ခုကို ရှာနေပြီး ဆုဖလားတွေ ရဖို့ ရည်မှန်းချက် ရှိပါတယ်။ ဒါက အဓိက ရည်ရွယ်ချက်ပါ"
"မတူကွဲပြားတဲ့ ကမ်းလှမ်းမှုတွေကို ကျွန်တော် လမ်းဖွင့်ထားပါမယ်။ ဘာကြောင့် လက်ရွေးစင်အသင်းကို တာဝန်ယူပြီး ကမ္ဘာ့ဖလား ခြေစစ်ပွဲမှာ မပါဝင်ရမှာလဲ" လို့ ဇာဗီက ပြောကြားလိုက်ပါတယ်။