စလော့ဟာ ဖီယင်နုကနေ ပရီးမီးယားလိဂ်ပထမဆုံးထွက်ခွာကာ အန်ဖီးလ်ရှိ ကလော့ပ်ရဲ့နေရာကို အစားထိုးဝင်ရောက်ဖို့ ကြီးမားတဲ့ခြေလှမ်းကို စတင်လိုက်ပြီဖြစ်ပါတယ်။

အသက် ၄၅ နှစ်အရွယ်ရှိ နည်းပြဟာ ၂၀၂၃ ခုနှစ်တွင် နယ်သာလန်အမှတ်ပေးချန်ပီယံဆုနှင့် ယခုနှစ်တွင် KNVB ဖလားတို့ကို ဆွတ်ခူးနိုင်ခဲ့ပြီး မွေးရပ်မြေတွင် သူ့ရဲ့လုပ်ဆောင်မှုကြောင့် ဂုဏ်သတင်းကျော်ကြားလာကာ အင်္ဂလန်သို့ ရောက်ရှိလာခဲ့ပါတယ်။  ယခုအခါ အယ်လ်အစ်တီဖက်နှင့် ဆော်ဒီအာရေးဗျတွင်  ကစားနေတဲ့ လီဗာပူးကစားသမားဟောင်း ဝီဂျန်နယ်ဒန်က ရာသီအစတွင် အသင်းဟောင်း ဖီယင်နုနှင့် လေ့ကျင့်ရေးဆင်းခဲ့ပြီး စလော့ထံမှ မြင်တွေ့ခဲ့ရမှုကို သဘောကျမိကြောင်း ပြောကြားလိုက်ပါတယ်။

ယူရို ၂၀၂၄ အတွက် နယ်သာလန်မှာ ရှိနေတဲ့ ကွင်းလယ်ကစားသမားက စလော့ကို အင်္ဂလန်ပရိသတ်တွေ ကောင်းကောင်းသိတာမဟုတ်ပေမယ့် လေ့ကျင့်ရေးမှာ သူ့ရဲ့လုပ်ဆောင်မှုတွေကို မြင်တွေ့ရပြီးနောက်မှာတော့ သူ့ဆီက ကောင်းမွန်တဲ့ အရာတွေကို မျှော်လင့်နိုင်လိမ့်မယ်လို့ ပြောကြားထားပါတယ်။

"စလော့ရောက်လာတာကြောင့် လီဗာပူးဟာ တကယ်ကို ကောင်းမွန်တဲ့ ဆက်ခံသူ တဦးကို ပိုင်ဆိုင်သွားပြီလို့ ထင်ပါတယ်။ အင်္ဂလန်ရှိ စလော့အကြောင်းကို မသိကြတဲ့အချက်က ပြဿနာမဟုတ်ပါ" "ဒီရာသီအစ ဖီယင်နုမှာ ရက်အနည်းငယ်ကြာ လေ့ကျင့်ခဲ့ပြီးတာကြောင့် စလော့ရဲ့ အလုပ်လုပ်ပုံကို မြင်ခဲ့ရပါတယ်။ အဲဒါက အရမ်းအဆင့်မြင့်တယ်၊ တကယ်ကောင်းတယ်လို့ ထင်ပါတယ်။ "ကလော့ပ်၊ မော်ရင်ဟိုတို့နဲ့ နှိုင်းယှဉ်နိုင်ပါတယ်။ ပြီးတော့ စလော့က သူတို့နဲ့ အဆင့်တန်းတူညီတယ်လို့ ပြောလို့ရပါတယ်။ အခုက လုံးဝခြားနားတဲ့ ကမ္ဘာတစ်ခုထဲကို ရောက်လာတာပါ ဒါကတော့ အမှန်ပါပဲ။ ဒါပေမယ့် ဖီယင်နုမှာ သူလုပ်ခဲ့တာတွေကို ဒီမှာမလုပ်နိုင်ဘူးလို့ မဆိုလိုပါဘူး" လို့ ဝစ်ချ်နယ်ဒန်က AD သို့ ပြောကြားခဲ့ပါတယ်။

ယူနိုက်တက်နည်းပြဟောင်း လူးဝစ်ဗန်ဂါးလ်က စလော့ရဲ့ အရည်အချင်းတွေကို ဆွေးနွေးခဲ့ပြီး သူနဲ့တစ်နိုင်ငံတည်းသားကို ခန့်အပ်ဖို့ လီဗာပူးရဲ့ရွေးချယ်မှုကို ထောက်ခံခဲ့ပါတယ်။

"ဟုတ်ပါတယ် ကလော့ပ်က ဒါကို အံ့မခန်းလုပ်ဆောင်ခဲ့တာဖြစ်လို့ ကြီးကျယ်တဲ့အလုပ်ပါ။ ဒါကြောင့် ဆက်ခံသူဖြစ်တဲ့ စလော့အတွက် အမြဲတမ်း ပိုခက်ခဲပါတယ်" "ဒါပေမယ့် သူက နည်းစနစ်ပိုင်း ကောင်းမွန်တဲ့ နည်းပြပါ။ ဒီအချိန်မှာ သူက နယ်သာလန်က အကောင်းဆုံး နည်းပြဖြစ်တယ်လို့ ကျွန်တော်ထင်ပါတယ်။ လီဗာပူးက အရမ်းကောင်းတဲ့ရွေးချယ်မှုလို့ ကျွန်တော်ထင်ပါတယ်"လို့ ဗန်ဟားလ်က Sky Sports သို့ ပြောပါတယ်။