နယူးကာဆယ်ကို အရေးနိမ့်ခဲ့တဲ့ ကာရာဘောင်းဖလားဗိုလ်လုပွဲက အသင်းရဲ့ပင်ပန်းနွမ်းလျမှုနဲ့ မသက်ဆိုင်ပါဘူးလို့ စိတ်ပျက်လက်ပျက်ဖြစ်နေတဲ့ လီဗာပူးနည်းပြအန်းစလော့က ဝန်ခံပြောဆိုခဲ့ပါတယ်။

လက်ရှိပရီးမီးယားလိဂ်အမှတ်ပေးဇယားဦးဆောင်သူအဖြစ် ရပ်တည်နေတဲ့ လီဗာပူးက ဝင်ဘာလေကွင်းဖိုင်နယ်ပွဲစဉ်မှာ နယူးကာဆယ်ကိုဖြတ်ကျော်ပြီး ဆုဖလားသိမ်းပိုက်နိုင်ဖို့ အပြတ်အသတ်ရေပန်းစားခဲ့ပါတယ်။ ဒါပေမယ့် ပွဲချိန်တွေမှာတော့ အက်ဒီဟိုဝီရဲ့အသင်းက အရှိန်အဟုန်ကောင်းကောင်းဖြင့် တိုက်ပွဲဝင်ခဲ့ပြီး ဒန်ဘန်း၊ အီဆက်ခ်တို့ရဲ့သွင်းဂိုးတွေနဲ့ ကြိုးကြာနီတွေကို အပြတ်အသတ်လွှမ်းမိုးကစားသွားခဲ့ပါတယ်။ ဒုတိယပိုင်းနာကျင်အချိန်ပိုမှာတော့ လီဗာပူးအတွက် တစ်လုံးတည်းသောချေပဂိုးကို ချီယေဆာက ပြိုင်ဖက်ဂိုးသမားနစ်ပုတ်ကို ကျော်ဖြတ်ကာ သွင်းယူပေးခဲ့ပါတယ်။ ရှုံးပွဲအပြီး လီဗာပူးကစားသမားတွေရဲ့ ကြံ့ခိုင်မှုပိုင်းနဲ့ပတ်သက်လို့ မေးခွန်းများစွာထွက်ပေါ်လာပေမယ့် အန်းစလော့ကတော့ ဒီလိုဆွေးနွေးမှုတွေကို ပယ်ချသွားခဲ့ပါတယ်။

ပြီးခဲ့တဲ့သီတင်းပတ်ချန်ပီယံလိဂ်ပွဲစဉ်မှာ ပီအက်စ်ဂျီကို ပင်နယ်တီအဆုံးအဖြတ်ဖြင့်နာကျင်ဖွယ်ရှုံးနိမ့်ခဲ့မှုကြောင့် သူ့အသင်းမှာ ကိုယ်စိတ်နှစ်ပါးပင်ပန်းနွမ်းလျမှုတွေ ကြုံတွေ့ခဲ့ရသလားဆိုတဲ့ မေးခွန်းကို အန်းစလော့က “-စိတ်ပိုင်းဆိုင်ရာဆိုတာမျိုးက အမြဲတမ်းလိုလိုအကဲဖြတ်နိုင်ဖို့ ခက်ခဲပါတယ်။ ပြီးခဲ့တဲ့အင်္ဂါနေ့တုန်းကလည်း ကျွန်တော်တို့တွေ ရုပ်ပိုင်း၊ စိတ်ပိုင်း ပင်ပန်းနွမ်းလျမှုတွေ ရှိခဲ့လို့လား? မရှိပါဘူး။ ဒါပေမယ့် အခုပွဲစဉ်က ပင်ပန်းနွမ်းလျမှုတွေနဲ့မသက်ဆိုင်ဘဲ တစ်ဦးချင်းရင်ဆိုင်တိုက်ပွဲတွေနဲ့သာ အဓိကသက်ဆိုင်ပါတယ်။ ပွဲချိန်တလျှောက်လုံးပြေးလွှားကစားနေဖို့ ပြင်းပြင်းထန်ထန်ကြိုးစားနေတာမျိုး မရှိခဲ့ပါဘူး။ ဒါကြောင့် ရုပ်ပိုင်းဆိုင်ရာအရ ပင်ပန်းနွမ်းလျနေသလားဆိုတာ အကဲဖြတ်လို့ မရနိုင်ပါဘူး။ ဘာဖြစ်လို့လဲဆိုတော့ ကျွန်တော်တို့က ပြိုင်ဘက်ကို ဖိအားမပေးနိုင်ခဲ့လို့ပဲ ဖြစ်ပါတယ်။

သူတို့တွေ ပင်ပန်းနွမ်းလျနေပြီး ပြိုင်ဘက်ကို ဖိအားပေးကစားနေသလားဆိုတာ အကဲဖြတ်လို့ရပါတယ်။ ဒါပေမယ့် ဒီနေ့ပွဲစဉ်မှာတော့ ပြိုင်ဘက်က ကျွန်တော်တို့ရဲ့ဖိအားပေးမှုကို ကျော်လွန်ကစားသွားခဲ့လို့ ဘာဖိအားမှမပေးနိုင်ခဲ့ပါဘူး။ပြိုင်ဘက်က ဂိုးလွန်ဘောဖြစ်ဖြစ်၊ ဖရီးကစ်ဖြစ်ဖြစ် ရရှိလာချိန်တိုင်းမှာ ကျွန်တော်တို့ရဲ့ခံစစ်လိုင်းနားအထိ တိုးဝင်လာခဲ့ပါတယ်။ ဒါတွေက အလွတ်တည်ကန်ဘောများစွာကို ခွင့်ပြုပေးရလေ့ရှိပြီး အထူးသဖြင့် ပထမပိုင်းပွဲချိန်အတွင်းမှာ မကြာခဏမြင်တွေ့ခဲ့ရပါတယ်”လို့ သတင်းမီဒီယာဆီတွေဆီ ဖြေကြားခဲ့ပါတယ်။

ဆက်လက်ပြီး အန်းစလော့က ဝင်ဘာလေကွင်းမှာ လီဗာပူးထက် နယူးကာဆယ်ကစားပုံပိုကောင်းခဲ့ပြီး ထိုက်ထိုက်တန်တန်ဗိုလ်စွဲခဲ့ခြင်းဖြစ်တယ်လို့ ရှင်းပြပါတယ်။ အန်းစလော့က “ ပြိုင်ဘက်ရဲ့ကစားဟန်က ကျွန်တော်တို့ကို အသာစီးယူနိုင်ခဲ့တယ်လို့ ပြောမယ်ဆိုရင် မှန်ပါတယ်။ အသာစီးရယူကစားတယ်ဆိုတာက ဒါမျိုးကို ခေါ်တာပါ။ ဟုတ်ပါတယ်၊ သူတို့တွေက ကျွန်တော်တို့ထက် တစ်ဦးချင်းရင်ဆိုင်တိုက်ပွဲတွေမှာ ပိုပြီး အနိုင်ရရှိခဲ့ပါတယ်။ ခင်ဗျားတို့ ဆိုလိုချင်တာ ဒါမဟုတ်လား? ဒါကတကယ်ပဲ အသာစီးရယူကစားနိုင်ခဲ့တာလား? ဒါမှမဟုတ် အမြင့်ဘောအရည်အသွေးနဲ့ ကြံ့ခိုင်မှုပိုင်းထိပ်တိုက်ရင်ဆိုင်မှုတွေမှာ ယှဉ်ကစားနိုင်ခြင်းက ပြိုင်ဘက်ရဲ့အကောင်းဆုံးအရည်အသွေးတစ်ခုလို့ ပြောချင်နေတာလား?

ကျွန်တော့်အတွက် အသာစီးရယူကစားနိုင်တယ်ဆိုတဲ့စကားရပ်အဓိပ္ပါယ်က ဘောလုံးကိုမထိလိုက်ဘဲနဲ့တောင် ကျွန်တော်တို့ရဲ့ဖိအားပေးဖို့ ကြိုးစားလိုက်ချိန်တိုင်းကို ကျော်ဖြတ်ကစားနိုင်ခဲ့ခြင်းဆိုတာပဲ ဖြစ်ပါတယ်။ အချိန်တိုင်းလိုလို ကျွန်တော်တို့ အမြဲနောက်ကျကျန်ရစ်နေခဲ့ပါတယ်။ ဒါကပဲ ကျွန်တော့်အတွက် အသာစီးရယူကစားနိုင်တယ်ဆိုတဲ့စကားရပ်အဓိပ္ပါယ် ဖြစ်ပါတယ်။

ဒါပေမယ့် သူတို့တွေ ထိုက်ထိုက်တန်တန်အနိုင်ရရှိခဲ့တယ်လို့ ခင်ဗျားတို့ ပြောလာမယ်ဆိုရင်လည်း ကျွန်တော် သဘောတူပါတယ်။ ဘာကြောင့်လဲဆိုတော့ ပွဲစဉ်ကို သူတို့အလိုရှိတဲ့အတိုင်း ကစားသွားနိုင်လို့ပဲ ဖြစ်ပါတယ်။ ဟုတ်ပါတယ်၊ သူတို့တွေ အနိုင်ရလဒ်နဲ့ထိုက်တန်ပါတယ်။ ဒါပေမယ့် အခုလိုပြောနေမှုက သူတို့နဲ့ပြေးလွှားပုံချင်း မယှဉ်ပြိုင်နိုင်ခဲ့ဘူးဆိုတဲ့ အဓိပ္ပါယ်မျိုး မဟုတ်ပါဘူး။ကျွန်တော်တို့က ပြိုင်ဘက်ရဲ့အဝေးဘောပေးပို့မှုတွေနဲ့ second ball တွေကို ကာကွယ်နိုင်ဖို့ လိုအပ်ခဲ့ပါတယ်။ ဒါကပဲ သူတို့ရဲ့ခွန်အားတစ်ရပ်ဖြစ်ပါတယ်”လို့ ပြောပါတယ်။

အခုအချိန်မှာတော့ အန်းစလော့နဲ့အတူ လီဗာပူးအသင်းက အာဆင်နယ်ရဲ့ဖိအားပေးမှုတွေရှိလာတဲ့ ပရီးမီးယားလိဂ်ချန်ပီယံဆုအတွက်ပဲ အဓိကအာရုံစိုက်သွားဖို့ ကျန်ရှိပါတော့တယ်။ ကြိုးကြာနီတွေက လက်ကျန်ကိုးပွဲကစားရဖို့ကျန်ရှိနေသေးချိန် ဂန်းနားတွေနဲ့ ၁၂ မှတ်အကွာမှာရှိနေပြီး မတ်လနိုင်ငံတကာသီတင်းပတ်အလွန်မှာတော့ မြို့ခံပြိုင်ဘက်အဲဗာတန်နဲ့ ရင်ဆိုင်ကစားသွားရပါမယ်။