ဒီနေ့မနက်ပိုင်း၊ ဝင်ဘာလေကွင်းမှာ အယ်လ်ဘေးနီးယားအပေါ် နှစ်ဂိုးပြတ်အနိုင်ယူခဲ့ပွဲစဉ်ကို သောမတ်စ်တူချယ်က အင်္ဂလန်လက်ရွေးစင်အသင်းနည်းပြသစ်ဘ၀ ဗွေဆော်ဦးပွဲစဉ်အဖြစ် ကိုင်တွယ်ခဲ့ပေမယ့် စိတ်ကျေနပ်မှုအပြည့်အဝမရရှိခဲ့ပါဘူး။ လက်ရွေးစင်ကစားသမားပွဲဦးထွက်ကစားကာ စံချိန်သစ်တင်နိုင်ခဲ့တဲ့ စကယ်လီ၊ ကပ္ပတိန်ဟယ်ရီကိန်းတို့ရဲ့ သွင်းဂိုးတွေနဲ့အတူ အင်္ဂလန်လက်ရွေးစင်အသင်းက ကမ္ဘာ့ဖလားခြေစစ်ပွဲခရီးစဉ်ကို အကောင်းဆုံးစတင်နိုင်ခဲ့ပါတယ်။

အင်္ဂလန်အသင်းက ပွဲချိန်တလျှောက်လုံး ပြိုင်ဘက်အယ်လ်ဘေးနီးယားကို လွှမ်းမိုးကစားခဲ့ကာ ဂိုးပေါက်ကန်သွင်းမှု ၁၂ ကြိမ်အထိ ပြုလုပ်နိုင်ခဲ့ပြီး ဧည့်သည်တွေကတော့ သုံးကြိမ်သာ ကန်သွင်းနိုင်ခဲ့ပါတယ်။ ဒါပေမယ့် ဂျာမန်သားနည်းပြက သူ့ရဲ့ကစားသမားတွေဆီမှ အခုထက်ပိုကောင်းတဲ့စွမ်းဆောင်ရည်မျိုး မျှော်လင့်မိတယ်လို့ ပြောခဲ့ပါတယ်။ ITV နဲ့တွေ့ဆုံချိန် တူချယ်က “ ကျွန်တော်တို့ အခုထက်ပိုကောင်းအောင် လုပ်နိုင်သလို လုပ်လည်း လုပ်ရပါမယ်။ ကျွန်တော်တို့ အကောင်းဆုံးစတင်ခဲ့ပြီး အမြင့်ဆုံးစွမ်းအင်၊ ဘောလုံးပေးပို့မှုများစွာနဲ့အတူ ဘောလုံးပိုင်ဆိုင်မှုရာနှုန်းပြည့်ထိန်းချုပ်ထားနိုင်ခဲ့တဲ့ ၇ မိနစ်၊ ၈ မိနစ်တာကာလတွေလည်း ရှိခဲ့ပါတယ်။ ပြိုင်ဘက်က ခံစစ်ကို သေချာအာရုံစိုက်ပိတ်ဆို့ကစားနေလို့ ဖြိုခွဲနိုင်ဖို့ ခက်ခဲခဲ့ပါတယ်။ ယူရိုပြိုင်ပွဲမှာဆိုရင် အယ်လ်ဘေးနီးယားက ပြိုင်ဘက်တွေအခွင့်အရေးမရရှိအောင် စွမ်းဆောင်နိုင်ခဲ့ပါတယ်။ ဒုတိယပိုင်းမှာတော့ ကျွန်တော်တို့တွေ အရမ်းနှေးကွေးလွန်းပြီး ယေဘုယျအားဖြင့် ဘောလုံးပိုင်ဆိုင်မှုမရှိချိန်မှာ ဘောလုံးပြန်ရရှိဖို့အတွက် လုံလောက်တဲ့ပြေးလွှားမှုတွေ မလုပ်ဆောင်ခဲ့ဘူးလို့ ခံစားမိပါတယ်”လို့ ပြောပါတယ်။

လီဝစ်စကယ်လီက သူရဲ့အိပ်မက်ဆန်ဆန်ပွဲဦးထွက်မှာ သတင်းခေါင်းကြီးပိုင်းများစွာကို စွဲဆောင်နိုင်ခဲ့ပြီး တူချယ်ကိုယ်တိုင်ကလည်း အသက်-၁၈ နှစ်အရွယ်အာဆင်နယ်ကြယ်ပွင့်ကို ဂုဏ်ပြုချီးကျူးခဲ့ပါတယ်။ ဒါပေမယ့် တစ်နှစ်တာကာလအတွင်း ပထမဆုံးအကြိမ်လက်ရွေးစင်အဆင့်ပွဲစဉ်ပြန်ကစားခွင့်ရရှိတဲ့ ရက်ရှ်ဖို့ဒ်နဲ့ ဖိုဒန်တို့ကိုတော့ အင်္ဂလန်နည်းပြသစ်က သတိပေးစကားတွေ ဆိုလာခဲ့ပါတယ်။ စကယ်လီနဲ့ပတ်သက်လို့ တူချယ်က “ အံ့သြစရာကောင်းတဲ့ ကစားသမားတစ်ဦးပါ။ အံ့သြလောက်စရာ ကိုယ်ရည်ကိုယ်သွေးမျိုးလည်း ရှိပါတယ်။ လက်ရွေးစင်အသင်းလေ့ကျင့်ရေးကွင်းဆီ ရောက်ရှိလာချိန်မှာပဲ သူ့ဆီ ချစ်ခင်နှစ်သက်မှုတွေ ပုံကျလာမှုက သာမန်အခြေအနေတစ်ခုပဲဆိုတာကို ပြသသွားခဲ့ပါတယ်”လို့ ဆိုပါတယ်။

အက်စတွန်ဗီလာအငှားတိုက်စစ်မှူး၊ မန်စီးတီးကြယ်ပွင့်တို့နဲ့ပတ်သက်ပြီး တူချယ်က “ တိုက်စစ်ပိုင်းအတွက် ဒီနေရာတွေမှာ ပိုပြီးအကျိုးသက်ရောက်မှုရှိစေဖို့ ကျွန်တော်တို့ မျှော်လင့်မိပါတယ်။ ပြိုင်ဘက်ဂိုးပေါက်ဆီ တစ်ဦးချင်လိမ်ခေါက်ဆွဲပြေးမှုတွေ၊ အားသွန်ခွန်စိုက်ပြေးလွှားမှုတွေ ပိုလုပ်ရပါမယ်။ ယေဘုယျအားဖြင့် ဒီလိုအရာတွေ ပျောက်ဆုံးနေခဲ့ပါတယ်။ အခွင့်အရေးဆိုတာ ပြိုင်ဘက်တွေကိုကျော်ဖြတ်ပြီးမှ ပေါ်ပေါက်လာတဲ့အရာမျိုး ဖြစ်ပါတယ်။ သူတို့နှစ်ဦးက သူတို့စွမ်းနိုင်သမျှအဆင့်အတန်းမျိုးအထိ ပြတ်ပြတ်သားသားမလုပ်ဆောင်ခဲ့ပါဘူး”လို့ ပြောပါတယ်။ အင်္ဂလန်လက်ရွေးစင်အသင်းက လာမယ့်တနင်္လာနေ့၊ အိမ်ကွင်းမှာ လတ်ဗီးယားကို ဧည့်ခံကစားပြီး သူတို့ရဲ့ကမ္ဘာ့ဖလားခြေစစ်ပွဲခရီးလမ်းကို ဆက်လက်လျှောက်လှမ်းသွားရပါမယ်။