တနင်္ဂနွေနေ့ညကယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ်မှာ ဘရိုက်တန်ကို ၁-၃ နဲ့ဂိုးပြတ်အရေးနိမ့်ခဲ့ပြီးနောက် မန်ချက်စတာယူနိုက်တက်နည်းပြ ရူဘင်အာမိုရင်က လက်ရှိယူနိုက်တက်ဟာ ကလပ်သမိုင်းတစ်လျှောက် အညံ့ဖျင်းဆုံးအသင်းဖြစ်တယ်လို့ ဝန်ခံပြောကြားလာခဲ့ပါတယ်။ 

ဘရိုက်တန်ကိုရှုံးနိမ့်ပြီးနောက် ယူနိုက်တက်ဟာ ဒီရာသီပရီးမီးယားလိဂ်မှာ ၁၀ ပွဲအထိရှုံးပွဲကြုံတွေ့ထားရပြီး အိုးလ်ထရက်ဖို့ဒ်မှာကစားခဲ့တဲ့ နောက်ဆုံး ၆ ပွဲမှာ ၄ ပွဲအထိရှုံးနိမ့်ခဲ့တာဖြစ်ပါတယ်။ ယူနိုက်တက်အနေနဲ့ ၁၈၉၃-၉၄ ခုနှစ်က ရာသီအစ အိမ်ကွင်းပွဲစဉ် ၁၂ ပွဲမှာ ၆ ပွဲအထိရှုံးနိမ့်ခဲ့ဖူးပြီး ယခုအခါ အာမိုရင်လက်ထက်မှာတော့ အဆိုပါရလဒ်ထက် ပိုမိုဆိုးဝါးတဲ့အခြေအနေကို တွေ့ကြုံရဖွယ်ရှိနေပါတယ်။ 

ပွဲအပြီးမှာ အာမိုရင်က “ကျွန်တော်က အတွေ့အကြုံမရှိတဲ့နည်းပြမဟုတ်ပါဘူး။ ကျွန်တော်တို့အသင်းက ယူနိုက်တက်သမိုင်းတစ်လျှောက် အညံ့ဖျင်းဆုံးအသင်းဖြစ်နေပါပြီ။ ဒါကို သေချာသဘောပေါက်ဖို့လိုပြီး ပြောင်းလဲမှုတွေပြုလုပ်သွားရပါမယ်။ ပရီးမီးယားလိဂ် ၁၀ ပွဲမှာ ကျွန်တော်တို့ ၃ ပွဲပဲနိုင်ခဲ့ပါတယ်။ ယူနိုက်တက်လိုအသင်းအတွက်ရော ကျွန်တော့်အတွက်ရောပါ ဒါက မဖြစ်သင့်တဲ့ရလဒ်ပါ။ဘာကြောင့်လဲဆိုတော့ ပရိသတ်တွေအနေနဲ့ ပိုဆိုးတဲ့နည်းပြတစ်ယောက်ကို ထပ်ရလိုက်သလိုဖြစ်နေလို့ပါ။ ဒီလိုအခြေအနေမှာ အားလုံး အစွမ်းကုန်ရုန်းကန်ဖို့လိုအပ်နေပါတယ်” လို့ပြောကြားခဲ့ပါတယ်။ 

ယူနိုက်တက်ဟာ ဘရိုက်တန်နဲ့ပွဲစဉ်မတိုင်မီ နောက်ဆုံးအိမ်ကွင်းပွဲစဉ် ၄ ပွဲမှာ ၃ ပွဲအထိရှုံးနိမ့်ခဲ့ပြီး ပြီးခဲ့တဲ့ ဆောက်သမ်တန်နဲ့ပွဲစဉ်မှာတော့ တောင်ပံကစားသမားလေး အာမက်ဒီယာလိုရဲ့ နောက်ကျဟက်ထရစ်ကြောင့် နိုင်ပွဲရရှိခဲ့တာဖြစ်ပါတယ်။ ဆက်လက်ပြီး အာမိုရင်က “ပြိုင်ဘက်တွေက အသေးစိတ်အချက်အလက်တွေကအစ ကျွန်တော်တို့ထက် ပိုကောင်းနေပါတယ်။ ဒီလိုအခြေအနေတွေမှာ ကျွန်တော့်အနေနဲ့ ကစားသမားတွေကို မကူညီနိုင်ခဲ့ပါဘူး။ ခက်ခဲတဲ့ အခိုက်အတန့်တွေဖြစ်ခဲ့ပါတယ်။ ခက်ခဲတဲ့အခြေအနေမှာရှိနေတယ်ဆိုတာ အားလုံးသိဖို့လိုအပ်ပါတယ်။ အသင်းက စွမ်းဆောင်ရည်ကျဆင်းနေပါတယ်” လို့ထပ်လောင်းပြောကြားခဲ့ပါတယ်။ 

ဘရိုက်တန်နဲ့ပွဲစဉ်မှာ ယူနိုက်တက်ဟာ အတော်လေးခြေစွမ်းညံ့ဖျင်းခဲ့ပြီး ပွဲကစားချိန် မိနစ် ၉၀ အတွင်း ဂိုးပေါက်တည့်တဲ့ကန်သွင်းချက် ၁ ကြိမ်သာပြုလုပ်နိုင်ခဲ့ကာ ရရှိခဲ့တဲ့ သွင်းဂိုးကလည်း ပင်နယ်တီပြစ်ဒဏ်ဘောမှတစ်ဆင့် ဘရူနိုဖာနန်ဒက်စ်ကသွင်းယူခဲ့တာဖြစ်ပါတယ်။ လာမယ့်သောကြာနေ့မှာတော့ ယူနိုက်တက်ဟာ ယူရိုပါလိဂ်ပွဲစဉ်အဖြစ် ရိန်းဂျားကို အိုးလ်ထရက်ဖို့ဒ်မှာ ဧည့်ခံကစားသွားရမှာဖြစ်ပြီး အိမ်ကွင်းမှာ အနိုင်ရလဒ်ကို ပြန်လည်ပုံဖော်သွားနိုင်မလား ဆက်လက်စောင့်ကြည့်ရပါမယ်။ အဆိုပါပွဲစဉ်အပြီး တနင်္လာနေ့မှာတော့ အာမိုရင်ရဲ့အသင်းဟာ ပရီးမီးယားလိဂ်ပွဲစဉ်အဖြစ် ဖူလ်ဟမ်ကို အဝေးကွင်းမှာ သွားရောက်ရင်ဆိုင်ရပါမယ်။