အီဆက်ခ်အတွက် လီဗာပူးရဲ့အလားအလာရှိတဲ့ကမ်းလှမ်းမှုမတိုင်ခင်မှာပဲ တိုက်စစ်မှူးနစ်ဝေါ်တီမိတ်ကို ခေါ်ယူနိုင်ဖို့နီးစပ်နေခြင်းအတွက် နယူးကာဆယ်ကို အန်းစလော့က ချီးကျူးဂုဏ်ပြုလိုက်ပါတယ်။သတင်းတွေအရ ငှက်ကျားတွေက အသင်းသမိုင်းတလျှောက် အကြီးမားဆုံးပြောင်းရွှေ့ကြေးသုံးစွဲမှုအဖြစ် စတုဂတ်ရဲ့ဂျာမန်တိုက်စစ်မှူးကို ပေါင် ၇၄ သန်းဖြင့်ခေါ်ယူဖို့ အတော်လေးနီးစပ်နေပြီလို့ သိရပါတယ်။ နစ်ဝေါ်တီမိတ်ရောက်ရှိလာမှုက ဂေါ်ဒွန်ပွဲပယ်ခံရမှုနဲ့ အီဆက်ခ်ရဲ့အနာဂတ်မရေမရာဖြစ်နေချိန် ဟိုဝီရဲ့လူစာရင်းပိုင်းအတွက် အရေးပါတဲ့အခိုက်အတန့်တစ်ခု ဖြစ်လာနိုင်ပါတယ်။

အီဆက်ခ်နဲ့ လီဗာပူးဇာတ်လမ်းက နွေရာသီကာလတလျှောက်လုံးကို အတော်လေးစိုးမိုးထားခဲ့ပေမယ့် အခုသီတင်းပတ်အတွင်းမှာတော့ မီးကုန်ယမ်းကုန်အရှိန်မြင့်တက်လာဖွယ် ရှိပါတယ်။ ပြီးခဲ့တဲ့တစ်လဝန်းကျင်ခန့်တုန်းက အီဆက်ခ်အတွက် ပရီးမီးယားလိဂ်ချန်ပီယံတွေရဲ့မက်လောက်စရာ ပေါင်သန်း ၁၁၀ တန်ကနဦးကမ်းလှမ်းမှုတစ်ခုကို ငှက်ကျားတွေ ပယ်ချခဲ့ပါတယ်။ သတင်းတွေအရ အပြောင်းအရွှေ့ဈေးကွက်ပိတ်သိမ်းဖို့ ရက်ပိုင်းအလိုမှာပဲ လီဗာပူးက နယူးကာဆယ်တိုက်စစ်မှူးအတွက် ဗြိတိန်စံချိန်တင်ပြောင်းရွှေ့ကြေးပေါင်သန်း ၁၃၀ ဖြင့် ကမ်းလှမ်းဖို့ပြင်ဆင်နေပြီလို့ သိရပါတယ်။

အန်းစလော့က အီဆက်ခ်ရဲ့အပြောင်းအရွှေ့ဇာတ်လမ်းနဲ့ပတ်သက်လို့ အသေးစိတ်ပြောပြရမယ့်အရေးကို ရှောင်လွှဲခဲ့ပေမယ့် နယူးကာဆယ်ရဲ့အပြောင်းအရွှေ့လှုပ်ရှားမှုကိုတော့ ဂုဏ်ပြုပေးဖို့ အဆင်သင့်ရှိနေခဲ့ပါတယ်။ သတင်းထောက်တွေနဲ့တွေ့ဆုံချိန် အန်းစလော့က “ အထောင်တိုက်စစ်မှူးတစ်ဦးကို နယူးကာဆယ်အသင်း ခေါ်ယူနိုင်ခဲ့လို့ ဒါက ဟိုဝီအတွက် အရမ်းကောင်းတဲ့သတင်းတစ်ခု ဖြစ်လာပါလိမ့်မယ်။ ဂေါ်ဒွန်ပွဲပယ်ခံရမှုအပြင် အီဆက်ခ်လည်း အသင်းနဲ့လေ့ကျင့်ခန်းမဆင်းနိုင်သေးလို့ ဒါက ဟိုဝီအတွက် အရမ်းကောင်းတဲ့သတင်းပါ။ ဒါကြောင့် အထောင်တိုက်စစ်မှူးတစ်ဦးရှိလာတာ အရမ်းကောင်းပါတယ်။ ပြီးခဲ့တဲ့တနင်္လာနေ့တုန်းကလည်း ပွဲအပေါ်သက်ရောက်မှုရှိစေဖို့ လူစားလဲလှယ်မှုတစ်ခု ကျွန်တော်ကိုယ်တိုင် ပြုလုပ်နိုင်ခဲ့ပါတယ်”လို့ ဆိုပါတယ်။

ဆက်လက်ပြီး အန်းစလော့က ဝေါ်တာမိတ်ရောက်ရှိလာမှုနဲ့အတူ အပြောင်းအရွှေ့ဈေးကွက်မှာ လီဗာပူးအတွက် မျက်နှာသာရလာတာမျိုးဖြစ်ကောင်းဖြစ်နိုင်တယ်လို့ အရိပ်အမြွက်ပြောကြားခဲ့ပါတယ်။ ဒတ်ချ်လူမျိုးနည်းပြက “ ကျွန်တော်တို့အသင်းအပေါ် ကူညီပေးနိုင်မယ့် ကစားသမားတွေကို ခေါ်ယူဖို့ အမြဲတမ်းကြိုးစားနေပေမယ့် နောက်ထပ်နှစ်ပွဲလောက်ကစားပြီးချိန်ကျရင် ဒီအကြောင်းအရာကို ထပ်ပြီးစဉ်းစားစရာ မလိုတော့ပါဘူး။ ကျွန်တော်တို့က မှန်ကန်တဲ့ကစားသမားတစ်ဦးကို မှန်ကန်တဲ့ဈေးနှုန်း ရရှိမယ်ဆိုရင် အင်အားဖြည့်တင်းဖို့အတွက် အမြဲတမ်းကြိုးစားပါတယ်။  ဈေးကွက်ပိတ်ဖို့လည်း ရက်အနည်းငယ်ပဲ ကျန်ပါတော့တယ်။ ဒါကြောင့် စောင့်ကြည့်သွားကြတာပေါ့။ သုံးလေးရက်လောက်ပဲ ကျန်တော့တယ်ဆိုတော့ ကျွန်တော်တို့ တစ်ခုခုလုပ်နိုင်မလားဆိုတာ စောင့်ကြည့်ကြမယ်လေ”လို့ ပြောပါတယ်။

အခုလိုအပြောင်းအရွှေ့ဆူညံသံတွေ ကျယ်လောင်နေချိန်မှာပဲ လီဗာပူးအသင်းက လာမယ့်တနင်္ဂနွေနေ့၊ အာဆင်နယ်ကို ဧည့်ခံကစားရမယ့် စူပါဟဲဗီးဝိတ်ပွဲစဉ်ဆီ အဓိကအာရုံစိုက်နေပါလိမ့်မယ်။ နယူးကာဆယ်နဲ့ပွဲစဉ်ကို လွဲချော်ခဲ့တဲ့ မက်အယ်လစ္စတာ လေ့ကျင့်ခန်းပြန်ဆင်းနိုင်မှုနဲ့အတူ ဘရက်ဒ်လေလည်း ကြံ့ခိုင်မှုပြည့်ဝလာလို့ အန်းစလော့အတွက် အကူအညီတွေ တိုးပွားလာနေပါတယ်။