ဝေဖန်မှုတွေကို ပြန်လည်တုံ့ပြန်လာခဲ့တဲ့ ယူနိုက်တက်ကြယ်ပွင့် ရက်ရှ်ဖို့ဒ်
မကြာသေးမီက ညံ့ဖျင်းတဲ့စွမ်းဆောင်ရည်တွေကြောင့် မီဒီယာတွေရဲ့ ပြင်းပြင်းထန်ထန် ဝေဖန်မှုကိုခံခဲ့ရတဲ့ မန်ချက်စတာယူနိုက်တက် တိုက်စစ်မှူး မားကက်ရက်ရှ်ဖို့ဒ်ဟာ အခုချိန်မှာတော့ ပြန်လည်တုံ့ပြန်မှုတွေပြုလုပ်လာခဲ့ပါတယ်။
ရက်ရှ်ဖို့ဒ်က “ကျွန်တော် မီဒီယာတွေရဲ့မှတ်ချက်တွေကို လိုက်ကြည့်ဖို့မကြိုးစားတော့ပါဘူး။ သူတို့ရဲ့ကစားနည်းကို ကျွန်တော် သဘောပေါက်ပါတယ်။ ကျွန်တော်ဆိုလိုချင်တာကို နားလည်လား။ သူတို့က ကျွန်တော့်ရဲ့ အဖြစ်မှန်တွေကို ရေးနေကြတာမဟုတ်ပါဘူး။ သူတို့က မားကက်ရက်ရှ်ဖို့ဒ်ဆိုတဲ့ ဇာတ်ကောင်အကြောင်းကိုရေးနေကြတာပါ။ အသက်-၂၆ နှစ် အရွယ်မှာ နိုက်ကလပ်တွေဘာတွေသွားတာ ကျွန်တော်တစ်ယောက်တည်းတော့မဖြစ်နိုင်ပါဘူး။ သူတို့က ကျွန်တော့်ရဲ့ကားက ဘယ်လောက်အထိတန်တယ်တို့၊ ကျွန်တော်တို့ရဲ့ လစာအကြောင်းတို့၊ လက်ဝတ်ရတနာအကြောင်းတို့ ယုတ်စွအဆုံး တက်တူးအကြောင်းတွေအထိပါ လိုက်ရေးနေကြတာပါ။ ပြီးတော့ ကျွန်တော့်ရဲ့ ခန္ဓာကိုယ်အမူအရာတွေသာမက ကျွန်တော့်ရဲ့စိတ်ဓာတ်ပိုင်း၊ မိသားစုနဲ့ အနာဂတ်အခြေအနေတွေအထိပါ မေးခွန်းထုတ်ကြပါတယ်“
“ဘောလုံးသမားတွေ တစ်ခါမှအမေးမခံရဖူးတဲ့ဟာတွေအထိပါအမေးခံရပါတယ်။ ဒါတွေ ထားလိုက်ပါတော့” “ကျွန်တော်က ပြီးပြည့်စုံတဲ့လူတစ်ယောက်မဟုတ်ပါဘူး။ ကျွန်တော်အမှားတစ်ခုလုပ်မိပြီဆို ကျွန်တော်ကိုယ်တိုင် အမှားကိုဝန်ခံပြီး နောက်တစ်ခါဒီထပ်ပိုကောင်းအောင်လုပ်မယ်လို့ ကတိပေးတတ်တဲ့လူတစ်ယောက်ပါ။ ယူနိုက်တက်အပေါ်မှာထားတဲ့ ကျွန်တော့်ရဲ့သစ္စာရှိမှုကို မေးခွန်းထုတ်စရာကိုမလိုပါဘူး။ ဒါက ကျွန်တော့်ကို ယောက်ျားတစ်ယောက်ဖြစ်ကြောင်း မေးခွန်းထုတ်နေသလိုပါပဲ။ ကျွန်တော် ဒီအသင်းကို ငယ်ငယ်ကတည်းက ရောက်လာခဲ့တာပါ။ ဒီမှာပဲကြီးပြီး ဒီမှာပဲကစားခဲ့ပါတယ်။ ကျွန်တော် ဒီအသင်းရဲ့အမှတ်တံဆိပ်ကို ဝတ်ဆင်နိုင်ခဲ့တာကြောင့် ကျွန်တော့်မိသားစုဘဝပြောင်းခဲ့တာပါ” လို့ရေးသားခဲ့ပါတယ်။
ဆက်လက်ပြီး ရက်ရှ်ဖို့ဒ်က သူဟာ ဒီအသင်းအမှတ်တံဆိပ်အတွက် ဘာမဆိုပေးဆပ်မယ့်အကြောင်းကို “ကျွန်တော် ဝေဖန်မှုတိုင်းကို ခံနိုင်ရည်ရှိပါတယ်။ သတင်းစာခေါင်းစီးမှာ ကျွန်တော့်အကြောင်းတွေပါလာရင်လည်း ဘာမှမဖြစ်ပါဘူး။ ဒါပေမယ့် ဒီကလပ်အပေါ်မှာထားတဲ့ ကျွန်တော့်ရဲ့ ချစ်ခြင်းမေတ္တာနဲ့ သစ္စာစောင့်သိမှုအတွက် လူသားဆန်တဲ့စိတ်လေး နည်းနည်းရှိဖို့တောင်းဆိုပါတယ်” လို့ ထပ်လောင်းရေးသားခဲ့ပါတယ်။
ယခုရာသီ ပရီးမီးယားလိဂ်မှာ ရက်ရှ်ဖို့ဒ်ဟာ ၅ ဂိုးသွင်းပြီး ဂိုးဖန်တီးမှု ၃ ကြိမ်သာ ပြုလုပ်ထားနိုင်ပါတယ်။ ယူနိုက်တက်ကလည်း အမှတ်ပေးဇယားရဲ့ အဆင့် ၆ နေရာမှာရပ်တည်နေပြီး အဆင့် ၄ နေရာက အက်စတွန်ဗီလာနဲ့ ၈ မှတ်အထိ ကွာဟနေတာကြောင့် ချန်ပီယံလိဂ်ဝင်ခွင့်ရဖို့ ရုန်းကန်နေရတာဖြစ်ပါတယ်။
လာမယ့်တနင်္ဂနွေနေ့မှာတော့ ယူနိုက်တက်ဟာ မန်ချက်စတာဒါဘီပွဲစဉ်အဖြစ် မန်စီးတီးကို အီတီဟတ်မှာသွားရောက်ယှဉ်ပြိုင်ရမှာဖြစ်ပါတယ်။
