မန်ချက်စတာယူနိုက်တက်ဟာ နည်းပြ အဲရစ်တန်ဟက်ရဲ့အနာဂတ်နဲ့ ပတ်သက်ပြီး ယခုအချိန်အထိ တစ်စုံတစ်ရာဆုံးဖြတ်ချက်မပြုလုပ်ရသေးတဲ့အပြင် ဆုံးဖြတ်ချက်ကို ထပ်မံရွှေ့ဆိုင်းဖို့စီစဉ်နေတယ်လို့သိရပါတယ်။

ယခုအခါမှာတော့ အားကစားဒါရိုက်တာ ဒေ့ဗ်ဘရေးစ်ဖို့ဒ်ဦးဆောင်တဲ့ ယူနိုက်တက်နည်းပြအဖွဲ့ဟာ ပြီးခဲ့တဲ့လက မန်စီးတီးကိုအနိုင်ရပြီး အက်ဖ်အေဖလားကို ဆွတ်ခူးပေးခဲ့ပြီးနောက် တန်ဟက်ရဲ့စွမ်းဆောင်ရည်နဲ့ပတ်သက်ပြီး ရာသီကုန်သုံးသပ်ချက်တစ်ခုကိုပြုလုပ်နေပြီဖြစ်ပါတယ်။ တန်ဟက်ရဲ့အနာဂတ်နဲ့ပတ်သက်ပြီး ယခုတစ်ပတ်အတွင်းမှာ ဆုံးဖြတ်ချက် ပြတ်ပြတ်သားသားချမှတ်တော့မယ်လို့ ယူဆထားခဲ့သော်လည်း ဆွေးနွေးမှုများ ဆက်လက်ပြုလုပ်နေဆဲဖြစ်တာကြောင့် နှောင့်နှေးကြန့်ကြာမှုတွေ ဖြစ်ပေါ်နေဆဲဖြစ်ပါတယ်။

တန်ဟက်ဟာ အိုးလ်ထရက်ဖို့ဒ်မှာ စာချုပ်သက်တမ်း ၁ နှစ်ကျန်ရှိနေသေးပေမယ့် ပြီးခဲ့တဲ့ရာသီက စွမ်းဆောင်ရည် ညံ့ဖျင်းခဲ့တာကြောင့် အသင်းကနေ ထုတ်ပယ်ခံရနိုင်တဲ့ အလားအလာနဲ့ရင်ဆိုင်နေရတာဖြစ်ပါတယ်။ ယူနိုက်တက်ဟာ ပရီးမီးယားလိဂ်အမှတ်ပေးဇယားကို အဆင့် ၈ နေရာမှာ ရပ်တည်နိုင်ခဲ့ပြီး အဆိုပါရပ်တည်မှုအဆင့်ဟာ ၁၉၉၀ ခုနှစ်နောက်ပိုင်း အဆိုးဝါးဆုံးမှတ်တမ်းဖြစ်ခဲ့ပါတယ်။

သို့သော်လည်း တန်ဟက်ဟာ မေလမှာတုန်းကတော့ ပရီးမီးယားလိဂ် ၄ နှစ်ဆက် ချန်ပီယံမန်စီးတီးကို အံ့အားသင့်ဖွယ် ၂-၁ နဲ့ အနိုင်ရရှိကာ အက်ဖ်အေဖလားကို ဆွတ်ခူးပေးနိုင်ခဲ့ပြီး ပြီးခဲ့တဲ့ရာသီကလည်း ကာရာ‌ဘောင်ဖလားကို ဆွတ်ခူးပေးနိုင်ခဲ့တာကြောင့် ယူနိုက်တက်အနေနဲ့ နှစ်တိုင်း ဖလားဆွတ်ခူးပေးနိုင်တဲ့ နယ်သာလန်သားကို ထုတ်ပယ်ဖို့ ခက်ခဲနေပုံပေါ်ပါတယ်။

မကြာသေးမီကတော့ ယူနိုက်တက်ဟာ တန်ဟက်ရဲ့နေရာမှာ နည်းပြသစ်အစားထိုးတော့မယ်လို့ သတင်းတွေထွက်ပေါ်ခဲ့ပြီး ဆန်ခါတင်စာရင်းထဲမှာ သောမတ်စ်တူချယ်၊ မော်ရီစီယိုပိုချက်တီနို၊ သောမတ်စ်ဖရန့်ခ်၊ ဂရေဟမ်ပေါ်တာ၊ ကီရန်မက်ကင်နာနဲ့ ရော်ဘတ်တိုဒီဇာဘီတို့ပါဝင်ခဲ့ပါတယ်။ ဒါ့အပြင် သတင်းတွေအရ ယူနိုက်တက်ဟာ ယူရို ၂၀၂၄ ပြိုင်ပွဲအတွက် အင်္ဂလန်အသင်းနဲ့အတူ ပြင်ဆင်မှုတွေပြုလုပ်နေတဲ့ ဂါရတ်ဆောက်ဂိတ်ကိုလည်း ပစ်မှတ်ထားနေတယ်လို့သိရပါတယ်။

တန်ဟက်ကတော့ ယူနိုက်တက်မှာ ဆက်လက်နေထိုင်ဖို့စိတ်ပိုင်းဖြတ်ထားတာကြောင့် ဘိုင်ယန်မြူးနစ်ရဲ့ ဖြစ်နိုင်ချေရှိတဲ့ကမ်းလှမ်းချက်ကို ငြင်းပယ်ခဲ့တယ်လို့ သတင်း‌တွေက ဖော်ပြထားပါတယ်။ ယူနိုက်တက်ရဲ့ ရာသီကြိုခရီးစဉ်ဟာ အမေရိကန်သို့ မသွားမီ ဇူလိုင်လ ၁၅ ရက်နေ့မှာ နော်ဝေနိုင်ငံသို့သွားရောက်ကာ ရိုဆန်ဘော့အသင်းနဲ့ ပထမဆုံး ခြေစမ်းပွဲစဉ်ကစားသွားရမှာဖြစ်ပါတယ်။