မန်ချက်စတာယူနိုက်တက်ဟာ အသင်းရဲ့ကွင်းလယ်ကြယ်ပွင့် ကိုဘီမိုင်နိုးနဲ့ပတ်သက်ပြီး စာချုပ်သက်တမ်းတိုးမယ့်အစီအစဉ်ကို အလျင်စလိုပြုလုပ်ခြင်းမရှိတဲ့အပြင် ကစားသမားဘက်ကလည်း သဘောတူညီမှုကို အလျင်စလိုပြုလုပ်သွားမှာမဟုတ်ဘူးလို့ သိရပါတယ်။ 

ယခုရာသီမှာ အဲရစ်တန်ဟက်ရဲ့ ပထမလူစာရင်းထဲကို စတင်ထိုးဖောက်ဝင်ရောက်လာခဲ့တဲ့ မိုင်နိုးဟာ အသက်အရွယ်နဲ့မလိုက် ခြေစွမ်းကောင်းတွေကို တောက်လျှောက်ပြသနေပြီး ပွဲစဉ်တိုင်းလိုလိုမှာ ပွဲထွက်ခွင့်ရနေတာဖြစ်ပါတယ်။ 

အသက်-၁၈ နှစ်အရွယ်ကွင်းလယ်လူဟာ ယူနိုက်တက်အကယ်ဒမီထွက်ကစားသမားတစ်ဦးဖြစ်ပြီး ယခုအခါမှာတော့ အသင်းရဲ့ဂန္ထဝင်ကစားသမားတွေဖြစ်တဲ့ ပေါလ်စခိုးလ်၊ ဆီးဒေါ့ဖ်တို့နဲ့ နှိုင်းယှဉ်မှုတွေ ပြလုပ်ခံထားရပြီဖြစ်ပါတယ်။ 

ဒါ့အပြင် ကစားသမားဟာ ပြီးခဲ့တဲ့လက ဝုဗ်ကို ၃-၄ နဲ့အနိုင်ရခဲ့တဲ့ပွဲစဉ်မှာ ယူနိုက်တက်အတွက် အရေးပါတဲ့အနိုင်ဂိုးကို ပွဲကစားချိန် ၉၀+၇ မိနစ်မှာ သွင်းယူပေးခဲ့တာကြောင့် ပရိသတ်တွေအတွက် ဟီးရိုးဖြစ်လာခဲ့ပါတယ်။ 

မိုင်နိုးဟာ အရှိန်အဟုန်နဲ့ တိုးတက်မှုတွေကို အဆက်မပြတ်ပြသထားနိုင်ပေမယ့် ယူနိုက်တက်ဘက်ကတော့ ကစားသမားနဲ့ပတ်သက်ပြီး စာချုပ်စာတမ်းကိစ္စတွေမှာ အလျင်စလို ပြုလုပ်ခြင်းမရှိတဲ့အပြင် မိုင်နိုးကလည်း အေးအေးဆေးဆေးသာ ပြုလုပ်ဖို့ သဘောထားနေပါတယ်။ လက်ရှိစာချုပ်ရဲ့ သဘောတူညီချက်အရလည်း မိုင်နိုးရဲ့လစာဟာ သူ့ရဲ့စွမ်းဆောင်ရည်အပေါ်မူတည်ပြီး တိုးတက်နေတာကြောင့် နှစ်ဘက်စလုံးက အလျင်စလိုပြုလုပ်ဖို့ ဆန္ဒမရှိကြတာဖြစ်တယ်လို့သိရပါတယ်။ 

ယူနိုက်တက်နဲ့ မိုင်နိုးတို့ရဲ့စာချုပ်ဟာ ၂၀၂၇ ခုနှစ်အထိသက်တမ်းကျန်ရှိနေတဲ့အပြင် ကစားသမားအနေနဲ့ နောက်ထပ်အပို ၁ နှစ်ရွေးချယ်ခွင့်ရှိနေတာလည်းဖြစ်ပါတယ်။ 

လာမယ့်တနင်္ဂနွေနေ့မှာ ယူနိုက်တက်ဟာ မန်ချက်စတာဒါဘီပွဲစဉ်အဖြစ် မန်စီးတီးကို အီတီဟတ်မှာ သွားရောက်ရင်ဆိုင်ရမှာဖြစ်ပြီး ပွဲစဉ်မတိုင်ခင်မှာ ယူနိုက်တက် လူငယ်အသင်းနည်းပြ ဟတ်ဒယ်စတုန်းက မိုင်နိုးကို မန်စီးတီးကွင်းလယ်လူဟောင်း ယာယာတိုရေးနဲ့ နှိုင်းယှဉ်မှုတွေပြုလုပ်ခဲ့ပါတယ်။ 

ဟတ်ဒယ်စတုန်းက “ကျွန်တော် ကာရင်တန်(ယူနိုက်တက်လေ့ကျင့်ရေးကွင်း) ကိုပထမဆုံးရောက်တော့ လူငယ်တွေ လေ့ကျင့်နေတာကို မြင်တွေ့ခဲ့ပါတယ်။ အိမ်အပြန်လမ်းမှာ သူငယ်ချင်းနဲ့စကားစမြည်ပြောရင်း လေ့ကျင့်ရေးကွင်းမှာ အရည်အသွေးမြင့်မားတဲ့ ကလေး ၂ ယောက်ကိုမြင်ခဲ့တယ်လို့ ပြောခဲ့ပါတယ်။ အဲဒီကလေး ၂ ယောက်ထဲက ၁ ယောက်က မိုင်နိုးပါပဲ။ သူက ယာယာတိုရေးအငယ်စားလေးနဲ့ အရမ်းတူပါတယ်” လို့ပြောကြားခဲ့ပါတယ်။