လီဗာပူးနည်းပြအန်းစလော့က အာနိုးလ်အနေဖြင့် ကာရာဘောင်းဖလားဗိုလ်လုပွဲကို လွဲချော်ဖို့ရှိနေပေမယ့် ရာသီမကုန်ခင်ပြန်ကစားနိုင်ရန် မျှော်လင့်ရတယ်လို့ ပြောပါတယ်။ ပီအက်စ်ဂျီကိုရှုံးနိမ့်ခဲ့တဲ့ ချန်ပီယံလိဂ်ပွဲစဉ်အတွင်း ဒဏ်ရာရရှိခဲ့တဲ့ လီဗာပူးညာအစွန်နောက်ခံလူဟာ အခုသီတင်းပတ်ကုန်၊ နယူးကာဆယ်နဲ့ရင်ဆိုင်ရမယ့် ဗိုလ်လုပွဲကို ပါဝင်ကစားပေးနိုင်ဖို့ မရှိဘူးလို့ ကြိုးကြာနီနည်းပြအန်းစလော့က ပြောခဲ့ပါတယ်။ ဒါပေမယ့် ဒတ်ချ်လူမျိုးနည်းပြက အခုနွေရာသီ၊ စာချုပ်သက်တမ်းပြည့်မြောက်မယ့် အသက်-၂၆ နှစ်အရွယ်ကစားသမားအနေဖြင့် ကလပ်အသင်းအတွက် နောက်ဆုံးပွဲစဉ်မကစားပေးရသေးဘူးလို့ ယုံကြည်နေပါတယ်။

သောကြာနေ့၊ သတင်းထောက်တွေနဲ့တွေ့ဆုံချိန် အန်းစလော့က “ အာနိုးလ် မကစားနိုင်သေးပါဘူး။ ဗိုလ်လုပွဲမှာ အသင်းနဲ့အတူ သူရှိနေမှာမဟုတ်ပါဘူး။ ဒါပေမယ့် သူ့ရဲ့အခြေအနေ ဘယ်လောက်အထိ ကြာရှည်နိုင်မလဲဆိုတာ အကဲဖြတ်ဖို့တော့ ကျန်ရှိနေပါသေးတယ်။ ရာသီမကုန်ခင် သူပြန်ကစားနိုင်ဖို့အတွက် မျှော်လင့်မိပါတယ်”လို့ ပြောပါတယ်။ အာနိုးလ်က လီဗာပူးအသင်းအတွက် အဓိကကစားသမားအဖြစ် ငါးနှစ်ကျော်ကြာရပ်တည်ခဲ့ပြီး အခုအချိန်မှာတော့ ရီးရဲလ်မက်ဒရစ်ရဲ့ချိတ်ဆက်မှုနဲ့အတူ ငယ်ဘဝကလပ်သင်းကိုစွန့်ခွာဖို့ အလားအလာတွေ မြင့်မားလာခဲ့ပါတယ်။ အသင်းနဲ့လမ်းခွဲရမယ်ဆိုရင်လည်း ကစားသမားအနေဖြင့် အသင်းအတွက် မကစားပေးနိုင်ဘူးဆိုရင်တောင် အနည်းဆုံးတော့ ပရီးမီးယားလိဂ်နဲ့ ကာရာဘောင်းချန်ပီယံဆုတို့ကို ဆွတ်ခူးသွားနိုင်ဖို့ မျှော်လင့်နေပါလိမ့်မယ်။ လီဗာပူးအသင်းအနေဖြင့် သူတို့ရဲ့ကာရာဘောင်းဖလားလက်ရှိချန်ပီယံဘွဲ့ကို ထိန်းသိမ်းနိုင်ဖို့ မနက်ဖြန်၊ ဝင်ဘာလေကွင်းမှာ နယူးကာဆယ်နဲ့ ရင်ဆိုင်သွားရပါမယ်။