အခုသီတင်းပတ် ပရီးမီးယားလိဂ်ပွဲစဉ် ကိုင်တွယ်ခွင့် ပိတ်ပင်ခံထားရတဲ့ တီယာနေး
လွန်ခဲ့တဲ့သီတင်းပတ်၊ လီဗာပူးက နော်တင်ဟမ်ဖောရက်စ်ကို အနိုင်ရရှိတဲ့ပွဲစဉ်မှာ အမှားတစ်ခု ကျူးလွန်မိပြီးနောက် ကွင်းလယ်ဒိုင်ပေါလ်တီယာနေးက အခုသီတင်းပတ်ကုန်မှာ ယှဉ်ပြိုင်ကစားရမယ့် ပရီးမီးယားလိဂ်ပွဲစဉ်တစ်ခုကို ကွင်းလယ်ဒိုင်အဖြစ် ကြီးကြပ်ခွင့် ဆုံးရှုံးသွားပါတယ်။
အဆိုပါပွဲစဉ်ရဲ့နာကျင်အချိန်ပို မိနစ်တွေအတွင်း နော်တင်ဟမ်ဖောရက်စ်အသင်း ဘောလုံးပိုင်ဆိုင်ထားချိန် လီဗာပူးခံစစ်မှူးကိုနာတေး ဦးခေါင်းဒဏ်ရာကြောင့် လဲကျနေလို့ တီယာနေးက ပွဲကို ရပ်ဆိုင်းလိုက်ပါတယ်။ ပွဲကို ပြန်လည်စတင်ချိန်မှာတော့ သူက လီဗာပူးဂိုးသမားကလယ်ဟာဆီ ဘောလုံးတည်ကန်ခွင့်ပေးအပ်ခဲ့ပြီး မကြာမီမှာပဲ ဒါဝင်နူနက်ဇ်က လီဗာပူးအတွက် အနိုင်ဂိုး သွင်းယူခဲ့ပါတယ်။
ဒါဝင်နူနက်ဇ်ရဲ့သွင်းဂိုးက ဧည့်သည်တွေအတွက် ဝ-၁ ဂိုးဆိုတဲ့ရလဒ်ဖြင့် အဖိုးတန်အဝေးကွင်းနိုင်ပွဲကို ပေါ်ပေါက်စေခဲ့ပါတယ်။ ဒီသွင်းဂိုးက ကိုနာတေးဖြစ်ရပ်အပြီး ပွဲကိုပြန်လည်စတင်လာပြီးနောက် ၁ မိနစ်နဲ့ ၅၀ စက္ကန့်အကြာ၊ ပွဲချိန် ၉၉ မိနစ်မှာ ပေါ်ပေါက်လာခဲ့တာ ဖြစ်ပါတယ်။
အပြည်ပြည်ဆိုင်ရာဘောလုံးအဖွဲ့ချုပ်ဘုတ်အဖွဲ့(IFAB)ရဲ့စည်းမျဉ်းတွေအရ ဂိုးဧရိယာအပြင်ဘက် နော်တင်ဟမ်ဖောရက်စ်အသင်း ဘောလုံးပိုင်ဆိုင်မှု ရယူထားတဲ့နေရာမှာသာ ပွဲစဉ်ကို ပြန်လည်စတင်သင့်တယ်လို့ သိရပါတယ်။
ဒီဆုံးဖြတ်ချက်က လီဗာပူးရဲ့အနိုင်ဂိုးနဲ့ တိုက်ရိုက်ပတ်သတ်မှုမရှိပေမယ့် ဒါဝင်နူနက်ဇ် သွင်းဂိုးမရယူခင် ဘောလုံးပိုင်ဆိုင်ခွင့်ရှိသူမှာ နော်တင်ဟမ်ဖောရက်စ်အသင်းသာ ဖြစ်ပါတယ်။
ပွဲပြီးဆုံးချိန်မှာ ဖောရက်စ်ကစားသမားတွေနဲ့ ဝန်ထမ်းတွေက တီယာနေးကို အပြင်းအထန်ကန့်ကွက်ခဲ့လို့ ကွင်းလယ်ဒိုင်က ဖောရက်စ်နည်းပြအဖွဲ့ဝင်စတီဗင်ရိဒ်ကို တိုက်ရိုက်အနီကတ်ပြသခဲ့ပါတယ်။
ဖောရက်စ်အသင်းပိုင်ရှင်မရင်နာကစ်ကလည်း ကွင်းလယ်ဒိုင်ရုံးခန်းအထိ လိုက်ပါသွားပြီး တာဝန်ရှိသူတွေကို ကန့်ကွက်ခဲ့ပြန်ပါတယ်။ ဒီနောက်မှာတော့ သက်ဆိုင်ရာ တာဝန်ရှိသူတွေက တီယာနေးကို အခုသီတင်းပတ်၊ ပရီးမီးယားလိဂ်ပွဲစဉ်တွေမှာ ကွင်းလယ်ဒိုင်အဖြစ် တာဝန်မပေးဖို့ ဆုံးဖြတ်ခဲ့ပါတယ်။
ဒါပေမယ့် တီယာနေးက လာမယ့်စနေနေ့၊ အာဆင်နယ်-ဘရန့်ဖို့ဒ်ပွဲစဉ်မှာ VAR ဒိုင်အဖြစ် တာဝန်ယူသွားပါလိမ့်မယ်။
