ဘာစီလိုနာနည်းပြဟန်စီဖလစ်ခ်က ဂျီရိုနာကို လေးဂိုးပြတ်အနိုင်ယူခဲ့တဲ့ပွဲစဉ်အပြီး သူ့အသင်းရဲ့သွင်းဂိုးဆာလောင်မှုကို အလွန်နှစ်သက်မိတယ်လို့ ဖွင့်ဟခဲ့ပါတယ်။ အခုပွဲစဉ်ရလဒ်ပိုင်းနဲ့အတူ ဘာစီလိုနာက ၂၀၂၄-၂၀၂၅ ဘောလုံးရာသီမှာ ၄၅ ပွဲကစား၊ ၁၃၉ ဂိုးအထိ သွင်းယူထားပြီး လာလီဂါကလပ်အသင်းတစ်ခုအတွက် စံချိန်သစ်ဖြစ်လာခဲ့ပါတယ်။ ဟန်စီဖလစ်ခ်ကလည်း အသင်းနဲ့ပတ်သက်လို့ အကြိုက်ဆုံးအရာအဖြစ် သွင်းဂိုးဆာလောင်စိတ်ကို သတ်မှတ်ပေးခဲ့ပါတယ်။

ပွဲပြီးသတင်းစာရှင်းလင်းပွဲအတွင်း ဟန်စီဖလစ်ခ်က “ ဒါက ကျွန်တော်တို့အသင်းရဲ့စိတ်ကူးပါပဲ။ အမြဲတမ်းလိုလို တိုက်စစ်ဆင်နေပြီး အခွင့်အရေးတွေ ဖန်တီးချင်ပါတယ်။ ဂိုးသွင်းယူနိုင်ဖို့နဲ့ ကြိုးစားဖို့အတွက် အခွင့်အလမ်းတစ်ရပ်ရှိနေမယ်ဆိုရင် အမြဲတမ်းလိုလို ကြိုးစားပြီး ဂိုးသွင်းယူကြပါ။ ကျွန်တော့်အသင်းနဲ့ပတ်သက်လို့ ဒီအချက်ကိုတော့ အကြိုက်ဆုံးပါပဲ။ သူတို့တွေက အမြဲလိုလို ဂိုးတွေသွင်းယူချင်နေကြပါတယ်။

ကျွန်တော်တို့ရဲ့တန်ပြန်တိုက်စစ်ကစားပုံကိုလည်း မြင်ယောင်ကြည့်ကြပါ။တိုက်စစ်မှူးတွေသာမက ကွင်းလယ်တိုက်စစ်ကစားသမားတွေ၊ ဒီဂျောင်တို့လို မီတာ ၉၀ နီးပါး ပြေးလွှားကစားနေတဲ့သူတွေပါ လိုက်ပါကစားကြပါတယ်။ ဒါက စိတ်ဓါတ်ပိုင်း၊ အသင်းရဲ့ခံယူချက်လည်း ဖြစ်ပါတယ်။ ဒါ ကောင်းပါတယ်။သာမန်ထက်ပိုပြီး ဂိုးတွေမြင်ရတာကို ပရိသတ်တွေအပါအဝင် လူတိုင်းလည်း ကြိုက်နှစ်သက်မယ်လို့ ထင်ပါတယ်။ အခုအချိန်မှာတော့ လူတိုင်းပျော်ရွှင်နေကြပါတယ်”လို့ ပြောပါတယ်။

အခုပွဲစဉ်မှာ သွင်းဂိုးနှစ်ဂိုးရယူနိုင်ခဲ့တဲ့ လီဝန်ဒေါစကီးနဲ့ပတ်သက်လို့ တိုက်စစ်မှူးဟာ လာလီဂါရဲ့ ထိပ်တန်းဂိုးသွင်းရှင်အဖြစ် ရာသီပိတ်သိမ်းနိုင်ရန် ဆုံးဖြတ်ထားတယ်လို့ ဟန်စီဖလစ်ခ်က ပြောပါတယ်။ ဟန်စီဖလစ်ခ်က “ ဒီအချက်က ကောင်းပါတယ်။ ဒါကြောင့်ပဲ ကျွန်တော်တို့ လီဝန်ဒေါစကီးကို လိုအပ်နေတာပါ။ပီချီချီဆုကို သူလိုချင်တယ်ဆိုတာ ကျွန်တော် သိပါတယ်။ ဒီနေ့မှာလည်း သူ နှစ်ဂိုးသွင်းယူလို့ အရမ်းပျော်ရွှင်မိပါတယ်။ ဒါပေမယ့် အမြဲပြောခဲ့ဖူးသလိုပါပဲ၊ အရေးအကြီးဆုံးက အသင်းပဲဖြစ်ပါတယ်”လို့ ဆိုပါတယ်။

ကတ္တလန်အခြေစိုက်ကလပ်အသင်းက အခုသီတင်းပတ်၊ အက်သလက်တီကိုမက်ဒရစ်နဲ့ မက်ဒရစ်မြို့တော်မှာ ကိုပါဒယ်လ်ရေးဖလားဆီမီးဖိုင်နယ်အဆုံးအဖြတ်ပွဲစဉ်ကို ယှဉ်ပြိုင်ကစားပြီးနောက် သီတင်းပတ်ကုန်ပိုင်းမှာတော့ ဘက်တစ်နဲ့ လာလီဂါပွဲစဉ်ကို ဆင်နွှဲရပါမယ်။