သတင်းတွေအရ ဘာစီလိုနာဂိုးသမား ဆက်ဇနီတစ်ယောက် စာချုပ်သစ်ချုပ်ဆိုဖို့ ဆုံးဖြတ်ခဲ့တယ်လို့ သိရပါတယ်။ ဘာစီလိုနာဘက်ကလည်း ဆက်ဇနီဟာ အခုရာသီအပြီးမှာလည်း ဆက်ကစားမှာဖြစ်တယ်လို့ အတည်ပြုခဲ့ပြီး ကစားသမားဘက်ကလည်း အသင်းမှာပျော်နေတာကြောင့် အခုလိုမျိုး ဖြစ်လာခဲ့တာဖြစ်ပါတယ်။

ဘာစီလိုနာ နဲ့ ကစားသမားတို့ကြား ၁+၁ စာချုပ်သစ်ချုပ်ဆိုဖို့ ဆွေးနွေးနေတာဖြစ်ပြီး မကြာခင်မှာ သဘောတူညီမှုရဖွယ်ရှိနေပါတယ်။ နည်းပြ ဖလစ်ကလည်း ဆက်ဇနီရဲ့စွမ်းဆောင်ရည်ကို ကျေနပ်နေပြီး အသင်းမှာဆက်ထိန်းထားချင်နေပါတယ်။ ဆက်ဇနီဟာ အဝတ်လဲခန်းထဲမှာလည်း ပီဒရီ ၊ ဂါဗီ ၊ ယာမဲလ် ၊ ကာဘာဆီစတဲ့လူငယ်တွေနဲ့ အဆင်ပြေနေတာဖြစ်ပါတယ်။

လက်ရှိမှာ အဓိကဂိုးသမား တာစတီဂျန်အခြေအနေကို ဆက်လက်တိုးတက်အောင် လုပ်ဆောင်နေရဆဲဖြစ်တာကြောင့် ဘာစီလိုနာအနေနဲ့ ဆက်ဇနီကို ဆက်လက်လိုအပ်နေဆဲဖြစ်ပါတယ်။ နည်းပြ ဖလစ်ကတော့ လာမယ့်ရာသီမှာ တာစတီဂျန်ပြန်လာနိုင်ခဲ့မယ်ဆိုရင် ဂိုးပေါက်ကို ဆက်ဇနီနဲ့တွဲဖက်ပြီး နေရာပေးဖွယ်ရှိနေပါတယ်။

ဂျာမန်သားက အသင်းခေါင်းဆောင်ဖြစ်တာကြောင့် ပွဲဦးထွက်ပါဝင်ခွင့်ရဖို့က သေချာသလောက်ရှိနေပေမယ့် ဒဏ်ရာကနေပြန်လာချိန်မှာ လက်စွမ်းပြနိုင်မလားဆိုတာကို စောင့်ကြည့်ရဦးမှာဖြစ်ပါတယ်။ ဆက်ဇနီပွဲထွက်ခွင့်ရတဲ့အချိန်ကာလတွေမှာ ဘာစီလိုနာဟာ ရှုံးပွဲလုံးဝမရှိခဲ့ပဲ ၁၄ ပွဲနိုင် ၂ ပွဲ  သရေကျထားခဲ့တာဖြစ်ပါတယ်။