ဘရန့်ဖို့ဒ်ဆီ ပြောင်းရွှေ့လာပြီးနောက် စိတ်လှုပ်ရှားပျော်ရွှင်နေတဲ့ တိုက်စစ်မှူး အီဂေါသီယာဂို
ပရီးမီးယားလိဂ်ပြိုင်ပွဲမှာ လန်ဒန်အခြေစိုက်ကလပ်အတွက် ပါဝင်ကစားပေးနိုင်ရေး ဘရန့်ဖို့ဒ်တိုက်စစ်မှူးသစ် အီဂေါသီယာဂို မစောင့်ဆိုင်းနိုင်တော့ပါဘူး။
ပြီးခဲ့တဲ့ဘောလုံးရာသီ၊ ဘယ်လ်ဂျီယံပြည်တွင်းလိဂ်မှာ ဘရုဂျက်အတွက် ၁၈ ဂိုးအထိ သွင်းယူပေးခဲ့တဲ့ တိုက်စစ်မှူးက အသင်းမှထွက်ခွာဖွယ်ရှိတဲ့ အိုင်ဗန်တိုနေးရဲ့နေရာ အတွက် အလားအလာရှိတဲ့ အစားထိုးမှုတစ်ခု ဖြစ်လာပါတယ်။ ဘရန့်ဖို့ဒ်ဆီ ကာလရှည်စာချုပ်တစ်ရပ်ဖြင့် ရောက်ရှိလာပြီးနောက် သီယာဂိုက ပရီးမီးယားလိဂ်လိုပြိုင်ပွဲကြီးမှာ တောက်ပခွင့်ရရှိဖို့ စိတ်လှုပ်ရှားမိခဲ့တယ်လို့ ဝန်ခံပြောဆိုလိုက်ပါတယ်။
ကလပ်အသင်းဝက်ဘ်ဆိုဒ်နဲ့တွေ့ဆုံချိန် သူက “ ဘရန့်ဖို့ဒ်အတွက် လက်မှတ်ရေးထိုးပြီး ဒီကလပ်အသင်းအကြောင်း သိခွင့်ရရှိလို့ ကျွန်တော် အရမ်းပျော်ရွှင်မိပါတယ်။ ပရီးမီးယားလိဂ်မှာ ဒီကလပ်အသင်းအတွက် ပါဝင်ကစားပေးရဖို့ဆိုတာ ကျွန်တော်တို့အတွက်တော့ တကယ့်ကို ကြီးမားတဲ့ ပျော်ရွှင်မှု အရင်းအမြစ်ကြီးတစ်ခုဖြစ်ပါတယ်။ ဒီအခိုက်အတန့်ကိုလည်း ကျွန်တော် တကယ်မျှော်လင့်နေပါတယ်။ ဒါက ကောင်းမွန်တဲ့ခရီးစဉ်တစ်ခု၊ ကောင်းမွန်တဲ့ ဘောလုံးရာသီတစ်ခု ဖြစ်လာလိမ့်မယ်ဆိုတာ ကျွန်တော်သိပါတယ်။ သေချာသလောက်ပါပဲ”လို့ ဆိုပါတယ်။
