ဘာစီလိုနာကွင်းလယ်လူ ဖရန်ကီဒီဂျောင်က အသင်းဖော် လာမိုင်းယာမယ်လ်အား ကလပ်ဂန္ထဝင် လီယွန်နယ်မက်ဆီနဲ့ နှိုင်းယှဉ်ချက်တွေကို သဘောကျနှစ်သက်ခြင်းမရှိဘဲ အသက်-၁၇ နှစ်အရွယ်ကစားသမားဟာ ဘောလွန်းဒီအော် ၈ ဆုရှင်ကိုလိုက်မီဖို့ အများကြီးလိုအပ်နေသေးတယ်လို့ပြောကြားလာခဲ့ပါတယ်။ 

ဘာစီလိုနာအသင်းမှာသာမက နိုင်ငံ့လက်ရွေးစင်စပိန်အသင်းအတွက်ပါ အရေးပါတဲ့ကစားသမားအဖြစ်ရပ်တည်ထားတဲ့ ယာမယ်လ်ကို ကမ္ဘာ့ဘောလုံးလောကထဲမှ အတောက်ပဆုံးကြယ်ပွင့်ဖြစ်တဲ့ မက်ဆီနဲ့နှိုင်းယှဉ်မှုတွေ ပြုလုပ်နေကြတာဖြစ်ပါတယ်။ အသက်-၁၇ နှစ်သာရှိသေးပေမယ့် ယာမယ်လ်ဟာ တစ်ဦးချင်းဆုတံဆိပ်တွေသာမက စပိန်လက်ရွေးစင်အသင်းနဲ့အတူ ၂၀၂၄ ယူရိုချန်ပီယံဆုဖလားကိုပါ ဆွတ်ခူးရရှိထားတာလည်းဖြစ်ပါတယ်။ 
ဘာစီလိုနာရဲ့ နာမည်ကျော်အကယ်ဒမီ လာမာစီယာကနေ ဆင်းသက်လာခဲ့တဲ့ ယာမယ်လ်ဟာ အသက်-၁၅ နှစ်အရွယ်မှာပဲ ဘာစီလိုနာအသင်းကြီးအတွက် စတင်ပွဲထွက်ကစားခွင့်ရခဲ့ပြီး ခြေစွမ်းကောင်းကို တောက်လျှောက်ပြသထားနိုင်ခဲ့ပါတယ်။ မက်ဆီကလည်း လာမာစီယာအကယ်ဒမီကနေ ဆင်းသက်လာတာဖြစ်လို့ စပိန်သားကို မက်ဆီနဲ့ နှိုင်းယှဉ်မှုတွေက အတော်လေးကျယ်ပြန့်လာခဲ့တာဖြစ်ပါတယ်။ 

သို့သော်လည်း ဖရန်ကီဒီဂျောင်ကတော့ “ကျွန်တော်ကတော့ ယာမယ်လ်ကို မက်ဆီနဲ့နှိုင်းယှဉ်သင့်တယ်လို့မထင်ပါဘူး။ သူမှမဟုတ်ပါဘူး။ ဘယ်ကစားသမားကိုမှ မက်ဆီနဲ့မနှိုင်းယှဉ်သင့်ပါဘူး။ မက်ဆီနဲ့တူတဲ့ကစားသမားမျိုးက နောက်ထပ်ရှိလာမယ်လို့ကို ကျွန်တော်မထင်တာပါ” လို့ပြောကြားခဲ့ပါတယ်။  ဒီဂျောင်အနေနဲ့ ယာမယ်လ်ကို မက်ဆီနဲ့နှိုင်းယှဉ်တဲ့မှတ်ချက်တွေကို ကန့်ကွက်ခဲ့ပေမယ့် အသက်-၁၇ နှစ်သားကို ချီးကျူးပြောဆိုမှုတွေတော့ပြုလုပ်ခဲ့ပါတယ်။ နယ်သာလန်လက်ရွေးစင်က “သူ့ရဲ့အသက်အရွယ်လေးနဲ့ ဒီလောက်အထိစွမ်းဆောင်ထားနိုင်တာကတော့ မယုံနိုင်စရာကောင်းပြီး မြင်တွေ့ရခဲပါတယ်။ ဒါက သူ့ရဲ့ပင်ကိုယ်ပါရမီကြောင့်ပါပဲ။ ပွဲတစ်ပွဲအပေါ်သူ့ရဲ့နားလည်နိုင်စွမ်း၊ အသက်ငယ်ပေမယ့် ဆုံးဖြတ်ချက်ချနိုင်စွမ်းတွေက အတော်လေးအထင်ကြီးဖို့ကောင်းပါတယ်။ ဒီလိုပါရမီတွေက မွေးကတည်းက ပါလာတတ်တဲ့အရာတွေပါ။ ဒါပေမယ့် ကံကောင်းစွာပဲ ယာမယ်လ်မှာလည်း အဲဒီလိုပါရမီမျိုး ပါလာပါတယ်” လို့ပြောကြားခဲ့ပါတယ်။ 

လက်ရှိအချိန်မှာတော့ ဘာစီလိုနာအသင်းဖော်တွေဖြစ်တဲ့ ယာမယ်လ်နဲ့ ဒီဂျောင်တို့ဟာ လက်ရွေးစင်အသင်းတွေနဲ့အတူ ပြိုင်ဘက်တွေနဲ့ရင်ဆိုင်နေရပြီး နေရှင်းလိဂ်ကွာတားဖိုင်နယ် ပထမအကျော့ပွဲစဉ်မှာ စပိန်နဲ့ နယ်သာလန်တို့ဟာ ၂-၂ နဲ့သရေကျထားခဲ့ကာ လာမယ့်တနင်္ဂနွေနေ့မှာတော့ ဒုတိယအကျော့ကို စပိန်မြေမှာ ကစားသွားရပါမယ်။