အန်းစလော့က ဘောလုံးသမားတစ်ဦးအတွက် အကောင်းဆုံးအစိတ်အပိုင်းဆိုတာ ဘောလုံးကစားနေရခြင်းသာ ဖြစ်တယ်လို့ အတိအလင်းပြောဆိုရင်း အက်ကရင်တန်စတန်လေနဲ့ အက်ဖ်အေဖလားပွဲစဉ်မှာ လီဗာပူးကစားသမားဘဝအဖွင့်ဂိုးရရှိခဲ့တဲ့ ချီယေဆာအတွက် ဖြစ်နိုင်ခြေရှိတဲ့ အပြောင်းအရွှေ့အလားအလာတွေကို လမ်းဖွင့်ပေးသွားခဲ့ပါတယ်။

အီတလီလက်ရွေးစင်ကစားသမားက အန်ဖီးလ်မှာ အက်ကရင်တန်စတန်လေကို ၄-၀ ဂိုးဖြင့် အနိုင်ရရှိခဲ့တဲ့ ပွဲစဉ်အတွင်း လီဗာပူးကစားသမားဘဝပထမဆုံးဂိုးကို သွင်းယူနိုင်ခဲ့ပါတယ်။ ချီယေဆာက အခုပွဲစဉ်ကို ဒုတိယပိုင်းစတင်ချိန်မှသာ ပါဝင်ကစားခဲ့ပြီး ဂိုးသွင်းယူနိုင်ခဲ့တာပါ။

အန်းစလော့ကတော့ ချီယေဆာဟာ အဖျားဝေဒနာကြောင့် ပြီးခဲ့တဲ့နှစ်ရက်တာကာလကို လေ့ကျင့်ခန်းမဆင်းနိုင်ခဲ့ဘဲ ဒီလိုမှမဟုတ်ရင် ပွဲထွက်ပါဝင်ကစားပေးနိုင်လိမ့်မယ်လို့ ပြောခဲ့ပါတယ်။

ပွဲစဉ်အပြီးသတင်းစာရှင်းလင်းပွဲအတွင်း ဒတ်ချ်လူမျိုးနည်းပြက “အခုတော့ သူ ၄၅ မိနစ်လောက် ကစားနိုင်ပါပြီ။ ကျွန်တော်တို့တွေ ဆိုဘိုဆလိုင်းကို ၄၅ မိနစ်ကစားစေခဲ့ပြီး ချီယေဆာနဲ့ လူစားလဲလှယ်ခဲ့ပါတယ်။ ပွဲဦးထွက်ပါဝင်ကစားရတာ ပျော်စရာကောင်းပါတယ်။ နောက်ပြီး အိမ်ကွင်းပရိသတ်ရှေ့မှောက် ဂိုးသွင်းယူချင်မှာ အမှန်ပါပဲ။ ဒါကိုပဲ အခုအချိန်မှာ ချီယေဆာ လုပ်ဆောင်ပြခဲ့တာပါ။ ဒါကြောင့် ကောင်းမွန်တဲ့ နောက်တစ်ဆင့်တက်လှမ်းမှုဖြစ်ပါတယ်။

အက်ကရင်တန်ရဲ့ကစားပုံကို ကျွန်တော် ကြိုက်နှစ်သက်ပေမယ့် သိပ်တော့စိတ်လှုပ်ရှားစရာ မကောင်းခဲ့ပါဘူး။ လိဂ်တူးကလပ်အသင်းတစ်ခုဖြစ်နေတာလည်း ပါတာပေါ့လေ။ ဒါပေမယ့် ဂိုးပါသွင်းယူနိုင်ခဲ့လို့ ချီယေဆာအတွက် ကောင်းမွန်တဲ့နောက်တစ်ဆင့်တက်လှမ်းနိုင်မှုဖြစ်မယ်ဆိုတာ သေချာပါတယ်”လို့ ပြောပါတယ်။

အခုဇန်နဝါရီဈေးကွက်အတွင်း နာပိုလီဆီ ချီယေဆာပြောင်းရွှေ့ဖို့ ချိတ်ဆက်မှုတစ်ခု ရှိခဲ့ပြီး စီးရီးအေထိပ်သီးကလပ်အသင်းကလည်း အသင်းမှထွက်ခွာတော့မယ့် ခဗာရက်စ်ခီလီယားနေရာမှာ အစားထိုးဖို့ ကစားသမားသစ် ရှာဖွေနေပါတယ်။

အန်းစလော့ကတော့ ချီဆေယာရဲ့သွင်းဂိုးဟာ အကောင်းမွန်ဆုံးယုံကြည်မှုတိုးမြှင့်နိုင်မှုတစ်ခုဖြစ်ခဲ့ပေမယ့် အန်ဖီးလ်မှာ အီတလီသားရဲ့ပွဲကစားချိန်တွေဟာ ဒုတိယရာသီဝက်အတွင်း သိသိသာသာတိုးမြှင့်လာဖို့ မရှိသေးဘူးလို့ ဆွေးနွေးခဲ့ပါတယ်။

အန်းစလော့က “ဟုတ်ပါတယ်၊ အဲ့ဒါတော့ သေချာပါတယ်။ ဒါပေမယ့် ကစားသမားတစ်ဦးက ကြံ့ခိုင်မှု ပြည့်ဝနေပြီး သူ့ရဲ့အရည်အချင်းတွေကို ပြသနိုင်ဖို့ အခွင့်အရေးမရရှိဘူးဆိုရင် စိတ်ပျက်စရာ ကောင်းလာပါလိမ့်မယ်။

ဘောလုံးသမားတစ်ဦးအတွက် အကောင်းဆုံးအစိတ်အပိုင်းဆိုတာ ဘောလုံးကစားနေရပြီး အကောင်းဆုံးလုပ်ဆောင်နိုင်ဖို့၊ အနိုင်ရရှိနေဖို့ပဲ ဖြစ်ပါတယ်။ နည်းပြရဲ့မတူကွဲပြားတဲ့ဆုံးဖြတ်ချက်တစ်ခုကြောင့်ဖြစ်စေ၊ မင်းကိုယ်တိုင်မပါဝင်နိုင်လို့ပဲဖြစ်စေ ပွဲမကစားရဘူးဆိုရင် ဒါက ကစားသမားတိုင်းအတွက် အမြဲတမ်းလိုလို ခက်ခဲလေ့ရှိပါတယ်။ ဘာကြောင့်လဲဆိုတော့ ကစားသမားတိုင်းက သူတို့ကြိုက်နှစ်သက်တဲ့အရာကို လုပ်ချင်နေလို့ပဲ ဖြစ်ပါတယ်။

 ကျွန်တော်တောင် ဘောလုံးကို ဆက်ကစားချင်သေးပေမယ့် ကံမကောင်းစွာနဲ့ဘဲ ဘယ်လိုနည်းနဲ့မှ မဖြစ်နိုင်တော့ပါဘူး”လို့ ပြောပါတယ်။ အန်ဖီးလ်မှာ ချီယေဆာရဲ့စာချုပ်သက်တမ်းက ၂၀၂၈ ခုနှစ်အထိ ရှိနေပါတယ်။