ကိုဒီဂတ်ပိုက လီဗာပူးအသင်းမှာ အနာဂတ်မရေမရာဖြစ်နေပြီး ကောလာဟလပေါင်းစုံအကြား ရောက်ရှိနေတဲ့ မိုဆာလက်ဆီ သတင်းစကားတစ်ခု ပေးပို့လိုက်ပါတယ်။ လီဗာပူးအသင်းနဲ့ စာချုပ်သက်တမ်းနောက်ဆုံးနှစ်ဆီ ရောက်ရှိနေတဲ့ မိုဆာလက်က လာမယ့်ရက်ပိုင်းမှာပဲ အင်္ဂလန်ပြင်ပကလပ်အသင်းတွေနဲ့ အပြောင်းအရွှေ့ကိစ္စ လွတ်လွတ်လပ်လပ်ဆွေးနွေးခွင့် ရရှိလာပါလိမ့်မယ်။ လီဗာပူးအသင်းဘက်ကတော့ အီဂျစ်ကြယ်ပွင့်ကို အသင်းမှာဆက်ထိန်းထားဖို့ စိတ်အားထက်သန်နေပေမယ့် မိုဆာလက်ကိုယ်တိုင် သူ့ရဲ့အနာဂတ်နဲ့ပတ်သက်လို့ ဆုံးဖြတ်ချက်မချရသေးပါဘူး။

မိုဆာလက်က အခုဘောလုံးရာသီမှာ ပြိုင်ပွဲစုံ ၁၈ ဂိုးသွင်း၊ ၁၅ ကြိမ်ဂိုးဖန်တီးပေးကာ ထူးထူးခြားခြား ခြေစွမ်းပြသနေပါတယ်။ ပြီးခဲ့တဲ့တနင်္ဂနွေနေ့၊ တော့တင်ဟမ်ကို ၆-၃ ဂိုးဖြင့် အနိုင်ရရှိတဲ့ပွဲစဉ်မှာလည်း သူက နှစ်ဂိုးသွင်း၊ နှစ်ဂိုးဖန်တီးပေးခဲ့ပါတယ်။
ကလပ်အသင်းဝက်ဘ်ဆိုဒ်နဲ့တွေ့ဆုံချိန်မှာတော့ ဂတ်ပိုက မိုဆာလက်ကို လီဗာပူးအသင်းမှာ ကာလရှည်ဆက်ရှိနေလိမ့်မယ်လို့ မျှော်လင့်မိထားတဲ့အကြောင်း ထုတ်ဖော်ပြောဆိုရင်း သတင်းစကားတစ်ခု ပေးပို့ခဲ့ပါတယ်။

ဂတ်ပိုက “ဒါက ကျွန်တော်တို့အားလုံးမြင်တွေ့ချင်နေတဲ့ အထူးစပါယ်ရှယ်ကိစ္စတစ်ခုပါ။ မိုဆာလက်က ဂိုးတွေ အများကြီးသွင်းယူနိုင်သလို ဂိုးဖန်တီးပေးမှုတွေလည်း လုပ်နိုင်ပါတယ်။ သူကစားနေတဲ့နည်းလမ်းနဲ့အတူ ပြိုင်ဘက်အတွက်  အန္တရာယ်ပေးနိုင်ပုံတွေ၊ အသင်းဖော်တွေ ဂိုးသွင်းယူနိုင်ဖို့အတွက် သူရဲ့ကူညီပေးပုံတွေက ထိပ်တန်းအဆင့်မှာ ရှိနေပါတယ်။

ကျွန်တော်တို့အတွက်ရော၊ သူ့အတွက်ပါ အခုလိုမျိုး ကာလရှည်ဆက်လက်လုပ်ဆောင်နိုင်ဖို့ ကျွန်တော်မျှော်လင့်ထားပါတယ်။ သူရှိနေတာ ကျွန်တော်တို့အသင်းအတွက် ကံကောင်းလွန်းပါတယ်။ သူ့ရဲ့အသင်းဖော်ဖြစ်နေသလို သူ့လိုပဲ ပိုကောင်းလာအောင် ကြိုးစားနိုင်နေလို့ ကျွန်တော်တို့ ဂုဏ်ယူမိပါတယ်။ ပြီးတော့ သူကိုယ်တိုင်ကလည်း ကျွန်တော်တို့ကို ပိုကောင်းလာအောင် အကောင်းဆုံး ကြိုးစားပေးနေပါတယ်”လို့ ပြောပါတယ်။

အနီးဆုံးပြိုင်ဘက် ချဲလ်ဆီးထက် တစ်ပွဲလျော့ကစားကာ အမှတ်ပေးဇယားကို လေးမှတ်ဖြတ်ဦးဆောင်နေတဲ့ အန်းစလော့ရဲ့အသင်းက Boxing Day ပွဲစဉ်အဖြစ် အိမ်ကွင်းအန်ဖီးလ်မှာ လက်စတာကို ဧည့်ခံကစားရပါမယ်။