မန်ချက်စတာယူနိုက်တက်နည်းပြ ရူဘင်အာမိုရင် ချဲလ်ဆီးနဲ့ နာပိုလီတို့ရဲ့ချိတ်ဆက်မှုတွေကြုံတွေ့နေရတဲ့ တောင်ပံကစားသမား အလီဂျန်ဒရိုဂါနာချိုအနေနဲ့ အသင်းမှာ ပိုကောင်းမွန်တဲ့ခြေစွမ်းတွေ ပြသလာနိုင်ဖို့ရှိနေကြောင်း အခိုင်အမာပြောကြားလာခဲ့ပါတယ်။ 

ချဲလ်ဆီးနဲ့ နာပိုလီတို့ရဲ့ စိတ်ဝင်စားမှုတွေရှိနေပေမယ့် ယနေ့နံနက်က ရိန်းဂျားစ်ကို ၂-၁ နဲ့အနိုင်ရခဲ့တဲ့ ယူရိုပါလိဂ်ပွဲစဉ်မှာ ဂါနာချိုဟာ ယူနိုက်တက်အတွက် ပွဲထွက်ကစားသမားအဖြစ် ပါဝင်ကစားခဲ့တာဖြစ်ပါတယ်။ အာဂျင်တီးနားသားကို ချဲလ်ဆီးဟာ ယခုဇန်နဝါရီအပြောင်းအရွှေကာလမကုန်ဆုံးခင်မှာပဲ ခေါ်ယူနိုင်ဖို့ ကြိုးစားနေတာဖြစ်ပေမယ့် အာမိုရင်ကတော့ အသင်းမှာပဲ ဆက်လက်ထားရှိလိုပုံရပါတယ်။ 

ယခုပွဲစဉ်မှာ ဂါနာချိုဟာ နိုဝင်ဘာလနောက်ပိုင်း ယူနိုက်တက်အတွက် ပထမဆုံးအကြိမ် ဂိုးပြန်သွင်းနိုင်ဖို့ အခွင့်အရေးရခဲ့ပေမယ့် ကန်ချက်က တိုင်ထိခဲ့လို့ သွင်းဂိုးနဲ့လွဲချော်ခဲ့ပါတယ်။ ယူနိုက်တက်အနေနဲ့ အသင်းရဲ့ဘဏ္ဍာရေးအခြေအနေကိုထိန်းညှိဖို့ ဂါနာချိုကိုရောင်းချနိုင်ချေရှိတယ်လို့ သတင်းတွေထွက်ပေါ်နေပြီး အာဂျင်တီးနားသားဟာ ယူနိုက်တက်ရဲ့ တန်ဖိုးကြီးကစားသမားအနည်းငယ်ထဲမှ တစ်ဦးဖြစ်ပါတယ်။ 

ဂါနာချိုဟာ နည်းပြသစ်အာမိုရင်နဲ့ အစောပိုင်းအချိန်တွေမှာ အဆင်မပြေမှုတချို့ရှိခဲ့ပေမယ့် ယခုအခါမှာတော့ ပွဲထွက်ကစားသမားအဖြစ်နဲ့ပင် နေရာပေးခံနေရပြီဖြစ်ပါတယ်။ ပြီးခဲ့တဲ့ ဒီဇင်ဘာလက ကစားသမားဟာ လေ့ကျင့်ရေးအစီအစဉ်အတွင်း စွမ်းဆောင်ရည်မပြည့်မီခဲ့တာကြောင့် မန်စီးတီးကိုအနိုင်ရခဲ့တဲ့ ပွဲစဉ်အတွက် လူစာရင်းမှ အသင်းဖော်မားကပ်စ်ရက်ရှ်ဖို့ဒ်နဲ့အတူ ချန်လှပ်ခံခဲ့ရပါတယ်။ ရက်ရှ်ဖို့ဒ်အနေနဲ့ အဆိုပါအချိန်ကတည်းက အခုထိ ယူနိုက်တက်အတွက် ကစားခွင့်ပြန်မရသေးပေမယ့် ဂါနာချိုကတော့ ပြန်လည်ပါဝင်လာနိုင်ခဲ့တာဖြစ်ပါတယ်။ 

ရိန်းဂျားစ်ကိုအနိုင်ရပြီးနောက် ဂါနာချိုရဲ့အပြောင်းအရွှေ့အလားအလာနဲ့ပတ်သက်ပြီး မေးမြန်းမှုပြုလုပ်ခဲ့ရာမှာ အာမိုရင်က “ကျွန်တော်ကတော့ ပွဲတွေအပေါ်မှာပဲ အာရုံစိုက်ထားပါတယ်။ သူက ယူနိုက်တက်ရဲ့ကစားသမားတစ်ယောက်ပါ။ ဒီနေ့ပွဲမှာလည်း ကျွန်တော်တို့အတွက် အလွန်အရေးပါခဲ့ပြီး လာမယ့်ပွဲစဉ်တွေမှာလည်း စောင့်ကြည့်ရပါမယ်၊။ တိုးတက်မှုတွေရှိလာတယ်လို့ထင်ပါတယ်။ ဒီနေ့မှာတော့ သူအတွင်းထဲမှာကစားတာက အပြင်မှာကစားတာထက်ပိုကောင်းခဲ့ပါတယ်။ နေရာယူပုံလည်း ကောင်းခဲ့ပြီး ကိုယ့်နေရာကိုယ်လည်း အချိန်မီပြန်ရောက်နေပါတယ်။ တစ်ခါတလေမှာတော့ စိတ်ပျက်စရာကောင်းတဲ့ အခိုက်အတန့်တွေလုပ်မိပေမယ့် ဒါကလည်း သူ့ရဲ့တိုးတက်ချင်တဲ့စိတ်ဓာတ်ကြောင့်ပါပဲ။ ကျွန်တော့်အမြင်မှာတော့ သူက ယူနိုက်တက်မှာ ပိုကောင်းတဲ့ကစားသမားဖြစ်လာမယ်လို့ထင်ပါတယ်။ ကျွန်တော်ကစားစေချင်တဲ့ပုံစံကိုလည်း သူရှင်းရှင်းလင်းလင်းနားလည်ပါတယ်။ ကျွန်တော့်အနေနဲ့ အသင်းရဲ့ကစားသမားတွေကို ကူညီချင်ပေမယ့် သူတို့တိုးတက်ဖို့ကတော့ သူတို့ကိုယ်တိုင်ကြိုးစားသွားရမှာပါ” လို့ပြောကြားခဲ့ပါတယ်။ 

ဆက်လက်ပြီး ပေါ်တူဂီသားက သူ့အနေနဲ့ အပြောင်းအရွှေ့ဈေးကွက်အတွင်း အသင်းရဲ့ကစားသမားတွေကို ဖိအားပေးဖို့သက်သက်နဲ့ ကစားသမားသစ်ခေါ်ယူမှာမဟုတ်ကြောင်းကို “ယူနိုက်တက်ရဲ့ကစားသမားတွေက အခြားနည်းပြတွေရဲ့ ကစားသမားတွေမဟုတ်ပါဘူး။ ကျွန်တော့်ရဲ့ကစားသမားတွေပါ။ ကလပ်ရဲ့အခြေအနေကို အားလုံးသိကြပါတယ်။ ဘာပဲလုပ်လုပ်ရှင်းရှင်းလင်းလင်းပဲလုပ်သွားမှာပါ။ ကျွန်တော့်ရဲ့အာရုံက လာမယ့်ပွဲစဉ်အပေါ်မှာပဲရှိနေပါတယ်။ မီဒီယာတွေရဲ့မေးခွန်းတွေကိုနားလည်ပေမယ့် လောလောဆယ်မှာ ကျွန်တော့်ရဲ့ကစားသမားတွေက အရေးကြီးဆုံးပါပဲ” လို့ပြောကြားခဲ့ပါတယ်။ 

ရိန်းဂျားစ်ကိုအနိုင်ရခဲ့တာကြောင့် ယူနိုက်တက်ဟာ ယူရိုပါလိဂ်အုပ်စုအမှတ်ပေးဇယားရဲ့ အဆင့် ၄ နေရာသို့တက်လှမ်းနိုင်ခဲ့ပြီး ရှုံးထွက် ၁၆ သင်းအဆင့်သို့ ထိပ်ဆုံး ၈ သင်းအနေနဲ့ တိုက်ရိုက်တက်လှမ်းနိုင်ဖို့ အခွင့်အရေးကောင်းကို ပိုင်ဆိုင်ထားပါတယ်။ လာမယ့်တနင်္လာနေ့မှာတော့ ယူနိုက်တက်ဟာ ပရီးမီးယားလိဂ်ပွဲစဉ်အဖြစ် ဖူလ်ဟမ်ကို အဝေးကွင်းမှာသွားရောက်ရင်ဆိုင်ရမှာဖြစ်ပြီး အမှတ်ပေးဇယား အဆင့် ၁၃ နေရာကနေ တက်လှမ်းနိုင်ဖို့ နိုင်ပွဲရရှိအောင်စွမ်းဆောင်သွားရမှာဖြစ်ပါတယ်။