ယူနိုက်တက်စတားဟောင်း ရွိုင်ကိန်းက အယ်လ်ဘေးနီးယားကို ၂-၀ နဲ့အနိုင်ရခဲ့တဲ့ပွဲအပြီးမှာ ဖိုဒန်အနေနဲ့ တူချယ်လက်အောက်မှာ နေရာပျောက်နိုင်တယ်လို့ သတိပေးလိုက်ပါတယ်။ အင်္ဂလန်ဟာ တူချယ်ရဲ့ပထမဆုံးပွဲမှာ အယ်လ်ဘေးနီးယားကို စကယ်လီ ၊ ဟယ်ရီကိန်းတို့ရဲ့ဂိုးတွေနဲ့ အနိုင်ရရှိခဲ့တာဖြစ်ပါတယ်။ ဒါပေမယ့်လည်း ပွဲအပြီးမှာ တူချယ်က ဖိုဒန် နဲ့ ရက်ရှ်ဖို့ဒ်တို့ဆီကနေ ပိုလိုချင်တယ်လို့ ဝန်ခံပြောကြားခဲ့ပါတယ်။ အင်္ဂလန်ဟာ လာမယ့်တနင်္လာနေ့ညနေခင်းမှာ ကမ္ဘာ့ဖလားခြေစစ်ပွဲအဖြစ် လက်ဗီးယားနဲ့ရင်ဆိုင်ရမှာဖြစ်ပါတယ်။

သောကြာနေ့ညနိုင်ပွဲအပြီးမှာ အီယန်ရိုက်က ဖိုဒန် နဲ့ ရက်ရှ်ဖို့ဒ်တို့ ကံကောင်းခဲ့တာလို့ ထောက်ပြခဲ့ပါတယ်။ “ကျွန်တော့်ဆီကနေ ဘယ်လိုအသံမျိုးကြားချင်တာလဲ။ နောက်တန်းကနေ ပေးပို့မှုအများအပြားရခဲ့သလို ဖိုဒန်လည်း အများကြီးရခဲ့ပါတယ်။ မားကပ်စ်ကလည်း ပြေးလွှားခဲ့ပေမယ့် အဆင်မပြေပါဘူး။ သူတို့ ၂ ယောက် အင်္ဂလန်အသင်းလူစာရင်းမှာ ပါဝင်လာတာက ကံကောင်းတာလို့ ကျွန်တော်ထင်ပါတယ်။ မားကပ်စ်က ဗီလာမှာ ပြန်လည်တောက်ပလာတာကြောင့် ပါဝင်လာတာပါ။ ဒါပေမယ့် ဒီနေ့သူတို့ကစားပုံကိုကြည့်ရတာ ကျွန်တော် အင်္ဂလန်ပြင်ပကစားသမားတစ်ဦးရဲ့အမြင်နဲ့ဆိုရင် အဆင်မပြေဘူးလို့ ထင်ပါတယ်”လို့ ရိုက်က ပြောကြားခဲ့ပါတယ်။

ကိန်းကလည်း ဖိုဒန်ရဲ့စွမ်းဆောင်ရည်ကို ဝေဖန်ထောက်ပြခဲ့ပြီး အသက် ၂၄ နှစ်သားဆီနေက ဘာမှမမြင်ခဲ့ရဘူးလို့ ဆိုပါတယ်။ “ခင်ဗျားက တိုက်စစ်အားသန်ကစားသမားတစ်ဦးဖြစ်မယ်ဆိုရင် အယ်လ်ဘေးနီးယားလိုအသင်းမျိုးနဲ့ပွဲမှာ စွမ်းဆောင်ရည်ကောင်းပြသနိုင်ခဲ့သင့်ပါတယ်။

နည်းပြအသစ်လက်အောက်မှာ ခင်ဗျားက သူယုံကြည်အောင်လုပ်ဆောင်ရမှာပါ။ ရက်ရှ်ဖို့ဒ် နဲ့ ဖိုဒန်တို့ ဒီညမှာ ဘာမှလုပ်မပြနိုင်ခဲ့ပါဘူး။ ဖိုဒန်က ယုံကြည်မှုပျောက်ဆုံးနေတာဖြစ်ပြီး ကလပ်အသင်းစွမ်းဆောင်ရည်ကလည်း ကျဆင်းနေပါတယ်။

သူ့မှာ အရည်အချင်းကောင်းတွေရှိတယ်ဆိုတာ ကျွန်တော်တို့ သိပါတယ်။ ဒါပေမယ့် ဒီနေ့ညမှာတော့ သူ့ဆီကနေ ဘာမှမမြင်ခဲ့ရပါဘူး။ နားထောင်ပါ။ ဖိုဒန်အနေနဲ့ဒီနေ့ညလိုမျိုးသာကစားမယ်ဆိုရင် သူ့အတွက် ပြဿနာဖြစ်လာနိုင်သလို နေရာပျောက်လာနိုင်ပါတယ်”လို့ ကိန်းက ပြောကြားခဲ့ပါတယ်။