ရီးရဲလ်မက်ဒရစ်အသင်းက ချန်ပီယံလိဂ်ဗိုလ်လုပွဲ အတွက် ကြာသပတေးနေ့မှာ လန်ဒန်မြို့ဆီ ခရီးထွက်ဖို့ ရှိနေပေမယ့် ဒီခရီးစဉ်မှာ အသင်းနဲ့အတူ ကစားသမားတစ်ဦး ပါဝင်လာဖွယ်မရှိဘူးလို့ သတင်းတွေမှာ ဖော်ပြလာပါတယ်။

လာမယ့်စနေနေ့၊ ဝင်ဘာလေကွင်းမှာ ဒေါ့မွန်နဲ့ရင်ဆိုင်ရချိန် ရီးရဲလ်မက်ဒရစ်က ကလပ်ဘောလုံးလောကရဲ့ အခမ်းနားဆုံး ဆုတံဆိပ်ကို ၁၅ ကြိမ်မြောက်အဖြစ် ရယူနိုင်ဖို့ ကြိုးပမ်းသွားပါလိမ့်မယ်။ ဒါပေမယ့် အခုသီတင်းပတ်အစောပိုင်းမှာ တုပ်ကွေးဝေဒနာခံစားခဲ့ရတဲ့ ဂိုးသမားလူနင်ကတော့ တစ်ဦးတည်းသီးသန့်ခရီးစဉ်ဖြင့် လန်ဒန်မြို့ဆီ ထွက်ခွာလာရလိမ့်မယ်လို့ The Sun သတင်းဌာနက ရေးသားဖော်ပြခဲ့ပါတယ်။

ကော်တိုရစ် ဒဏ်ရာကြောင့် အနားယူနေရလို့ လူနင်က အခုဘောလုံးရာသီ၊ ပွဲစဉ်အများစုမှာ အသင်းအတွက် ပါဝင်ကစားပေးရင်း လက်စွမ်းပြသနိုင်ခဲ့ပြီး မန်စီးတီးကို ပယ်နယ်တီအဆုံးအဖြတ်ဖြင့် အနိုင်ယူခဲ့တဲ့ပွဲစဉ်မှာ ဟီရိုးတစ်ဦး ဖြစ်ခဲ့ပါတယ်။ ရီးရဲလ်မက်ဒရစ်ကစားသမားတွေက ကြာသပတေးနေ့မှာပဲ လန်ဒန်မြို့ဆီ ရောက်ရှိလာပါလိမ့်မယ်။ ဒါပေမယ့် Marca သတင်းဌာနရဲ့အဆိုအရတော့ အဖျားကူးစက်နိုင်မှုရာခိုင်နှုန်းလျှော့ချနိုင်ဖို့ လူနင်က သောကြာနေ့အစောပိုင်း (သို့မဟုတ်) စနေနေ့မှသာ အင်္ဂလိပ်တွေရဲ့မြို့တော်ဆီ ရောက်ရှိလာလိမ့်မယ်လို့ သိရပါတယ်။

လူနင်ရဲ့ဇနီး တိုမာဇိုဗာကလည်း အခုသီတင်းပတ်အတွင်း နေအိမ်မှာ လေ့ကျင့်နေတဲ့ သူမရဲ့ခင်ပွန်းဖြစ်သူပုံရိပ်တွေကို မျှဝေပေးခဲ့ပြီး ဒီဂိုးသမားကို အသင်းလူစာရင်းမှာ ထည့်သွင်းမလား အန်ဆယ်လော့တီဆုံးဖြတ်ပေးဖို့ပဲ ကျန်ရှိနေပါတယ်။ ဗိုလ်လုပွဲမှာ လူနင်ကစားပေးနိုင်ဖို့ သေချာနေတယ်ဆိုရင်တောင် အခုလိုအရေးကြီးပွဲစဉ်မှာ ပွဲထွက်ခွင့်ရနိုင်မလားဆိုတာ မရေရာတဲ့အခြေအနေမှာပဲ ရှိနေပါသေးတယ်။

ရီးရဲလ်မက်ဒရစ်က လူနင်ကို ဖလားပွဲစဉ်တွေမှာ အသုံးချဖို့ ရည်မှန်းထားခဲ့ပေမယ့် ကော်တိုရစ်ရဲ့ အခုလဆန်းပိုင်းပြန်လာနိုင်မှုနဲ့အတူ လက်ရှိအချိန်မှာ အန်ဆယ်လော့တီအတွက် အကျပ်အတည်းနဲ့ ရင်ဆိုင်နေရပြန်ပါတယ်။ သူတို့နှစ်ဦးလုံးက ဗိုလ်လုပွဲကစားဖို့ ထိုက်တန်တာကြောင့် ရွေးချယ်ဖို့ အလွန်ခက်ခဲယ်လို့ ရီးရဲလ်မက်ဒရစ်နည်းပြက ဆိုပါတယ်။

“ရွေးချယ်ဖို့ အရမ်းခက်ခဲပါတယ်။ အမှန်ပါပဲ၊ တကယ့်ကို ခက်ခဲလွန်းတာပါ။ ဘာကြောင့်လဲဆိုတော့ သူတို့နှစ်ဦးလုံးက ဒီဗိုလ်လုပွဲမှာ  ကစားခွင့်ရရှိဖို့ ထိုက်တန်နေပါတယ်။ လူနင်က ကောင်းမွန်တဲ့ ဘောလုံးရာသီတစ်ခု ပိုင်ဆိုင်ခဲ့ရသလို ကော်တိုရစ်လည်း ပြန်လာပါပြီ”လို့ အန်ဆယ်လော့တီက ပြောဆိုခဲ့ပါတယ်။