လီဗာပူးနည်းပြသစ်အဖြစ် သတင်းထွက်နေမှုအပေါ် စိတ်မဝင်စားဘူးလို့ ဆိုလိုက်တဲ့ ပိုစတီကိုဂလူ
အန်ဂီပိုစတီကိုဂလူက တော့တင်ဟမ်နဲ့အတူ အလုပ်တွေ စတင်ရုံသာရှိသေးတယ်လို့ ပြောဆိုရင်း လီဗာပူးမှာ ယာဂန်ကလော့ပ်ရဲ့နေရာဆက်ခံသူဖြစ်လာမယ်ဆိုတဲ့ ထင်ကြေးတွေကို ပယ်ချလိုက်ပါတယ်။
ယာဂန်ကလော့ပ်က အခုဘောလုံးရာသီကုန်ဆုံးချိန် လီဗာပူးအသင်းမှ ထွက်ခွာတော့မယ်လို့ ပြီးခဲ့တဲ့လအတွင်း တရားဝင်ကြေညာခဲ့ပါတယ်။ ဒါကြောင့် မြောက်လန်ဒန်အရပ်မှာ အထင်ကြီးစရာစွမ်းဆောင်ရည်တွေကို ပြသနေတဲ့ ပိုစတီကိုဂလူက ရေပန်းအစားဆုံးဖြစ်နေတဲ့ အလွန်ဆိုနဲ့အတူ လီဗာပူးနည်းပြသစ်ဖြစ်လာနိုင်သူစာရင်းမှာ ပါဝင်လာပါတယ်။
လီဗာပူးကစားသမားဟောင်းက လက်ရှိမှာ လေဗာကူဆင်ကို ဘွန်ဒက်စ်လီဂါအမှတ်ပေးဇယားထိပ်ဆုံးနေရာဆီ ပို့ဆောင်ပေးထားပြီး လက်ရှိအလုပ်ကိုပဲ အာရုံစိုက်ထားတယ်လို့ အတိအလင်းပြောဆိုထားပါတယ်။
လီဗာပူးနဲ့ သူ့နာမည် ချိတ်ဆက်ဖော်ပြနေတဲ့သတင်းတွေကို ကြားသိထားလားလို့ မေးမြန်းလာချိန် ပိုစတီကိုဂလူက “ကျွန်တော်လည်း ဆန်ခါတင်စာရင်းမှာ ပါဝင်လာနိုင်ပေမယ့် ဒီအကြောင်းအရာကို ကျွန်တော်ကိုယ်တိုင် ဘာမှမပြောလိုဘူးလို့ ယူဆမိပါတယ်။ ဒီအကြောင်းအရာတွေက လက်ရှိအလုပ်အပေါ် အာရုံစိုက်နေတဲ့ ကျွန်တော့်ဦးနှောက်ရဲ့ နေရာလွတ်တွေဆီ ဝင်ရောက်လာနိုင်မယ်လို့လည်း မထင်ပါဘူး။ ကောင်းပြီ။ အခု ကျွန်တော်က တော့တင်ဟမ်နဲ့ အလုပ်စတင်လုပ်ရုံပဲ ရှိပါသေးတယ်။ ဒီအလုပ်ကို လက်ခံဖြစ်မယ်လို့လည်း ကျွန်တော်မခံစားရပါဘူး။ ကျွန်တော် ဒီနေရာကိုရောက်ရှိလာတာ ခုနစ်လပဲ ရှိပါသေးတယ်။ ဒါကြောင့် အလွယ်တကူနားလည်ပေးနိုင်ပါလိမ့်မယ်။ ကျွန်တော်ဖြစ်ချင်တဲ့အသင်း၊ ကျွန်တော်ကစားစေလိုတဲ့ ကစားဟန် ဖြစ်လာဖို့ အဝေးကြီးလိုသေးတယ်လို့ ပြောရတာ နာကျင်စရာကောင်းပါတယ်။ ကျွန်တော်တို့မှာ အပြုသဘောဆောင်တဲ့ အပြောင်းအရွှေ့ဈေးကွက်နှစ်ခု ရှိခဲ့ပါတယ်။ လက်ရှိမှာလည်း သင့်တော်ကောင်းမွန်တဲ့ ဘောလုံးရာသီတစ်ခု ရှိနေတယ်လို့ ကျွန်တော်ထင်ပါတယ်။ ဒါပေမယ့် ကျွန်တော်တို့တွေ ခရီးရှည်ကြီး ဆက်လျှောက်လှမ်းရဦးပါမယ်”လို့ ပြန်လည်ဖြေဆိုခဲ့ပါတယ်။
လာမယ့်ဘောလုံးရာသီ၊ တော့တင်ဟမ်အသင်းရဲ့ အရန်ခုံတန်းမှာ ရှိနေဦးမလားဆိုတဲ့ မေးမြန်းမှုကိုလည်း သူက “ဒါကိုပဲ ကျွန်တော် ပြောနေတာပါ။ နည်းပြတွေအကြောင်း ကျွန်တော်တို့ပြောကြတဲ့အခါ ရယ်စရာတစ်ခု ရှိပါတယ်။ အသင်းသာ အခြေအနေမကောင်းတော့ဘူးဆိုရင် ဒီအသင်းမှာ ရှိနေဦးမလားလို့ မေးကြတယ်။ အခြေအနေကောင်းနေပြန်ရင်လည်း ဒီအသင်းမှာ ရှိနေမှာလားဆိုပြီး မေးနေကြတုန်းပါပဲ။ တကယ့်အစစ်အမှန်က ဒါတွေအားလုံးဟာ ကျွန်တော်တို့ လက်ထဲမှာ ရှိမနေဘူးဆိုတာပါပဲ။ ဒီအတွက်ကြောင့် ကျွန်တော်ကိုယ်တိုင်လည်း ဘာမှမစိုးရိမ်မိပါဘူး။ ကျွန်တော့်ရဲ့ ၂၆ နှစ်ကြာ နည်းပြဘဝသက်တမ်းမှာ ကျွန်တော် ဘာတွေလုပ်ခဲ့သလဲဆိုတာကို ခင်ဗျားတို့ ရှင်းရှင်းလင်းလင်းမြင်တွေ့နိုင်ပါလိမ့်မယ်။ ကျွန်တော့်ရဲ့အတွေးတွေ ဘယ်လိုရှိသလဲဆိုတာကို ရှင်းပြဖို့ ကျွန်တော့်ရဲ့အတွေ့အကြုံတွေကိုပဲ ကိုးကားပါတယ်။ အခုဆိုရင်လည်း တော့တင်ဟမ်နဲ့အတူ ဘောလုံးရာသီကို အခိုင်မာဆုံးအဆုံးသတ်နိုင်ဖို့နဲ့ နောင်လာမယ့်နှစ်တွေအထိ အမှန်တကယ်ခိုင်မာတဲ့ အခြေခံအုတ်မြစ်ကို ထူထောင်နိုင်ဖို့ ကြိုးစားနေပါတယ်”
“ရာသီလက်ကျန်ပွဲစဉ်တွေကို အပြည့်အဝအာရုံစိုက်ထားနိုင်မှသာ ဒါတွေကလည်း ဖြစ်တည်လာပါလိမ့်မယ်။ လီဗာပူးနဲ့ချိတ်ဆက်တယ်ဆိုတဲ့ သတင်းတွေမှာ လူတွေကတော့ သူတို့ရဲ့ထင်ကြေးတွေ ထည့်နေကြတာပါပဲ။ ဒါတွေကို ဘယ်သူက ဂရုစိုက်နေဦးမှာလဲ? အတော်လေးရော ကြိုက်ကြလား? ဒါပေမယ့် တစ်နေ့တာကုန်ဆုံးချိန်မှာ ကျွန်တော်သာ အလုပ်ကို ကောင်းကောင်းလုပ်နေမယ်ဆိုရင် လူတွေက ကျွန်တော့်ကို အသိအမှတ်ပြုပေးကြလိမ့်မယ်လို့ပဲ မျှော်လင့်မိပါတယ်။ ဒါပေမယ့် ဒီသတင်းတွေအပေါ် ကျွန်တော် လုံးဝစိတ်မဝင်စားပါဘူး”လို့ တုံ့ပြန်ခဲ့ပါတယ်။
