မန်စီးတီးမှာပဲ ဒီဘရိုင်းကို ကစားသမားဘဝအဆုံးသတ်စေလိုတဲ့ ပက်ဂွါဒီယိုလာ
ပက်ဂွါဒီယိုလာက လာမယ့်ဘောလုံးရာသီမှာလည်း ဒီဘရိုင်းကို မန်စီးတီးမှာ ဆက်ရှိနေစေဖို့ လိုလားပေမယ့် ဆော်ဒီမြေဆီ ပြောင်းရွှေ့ဖို့ကလည်း သူ့ရဲ့ကွင်းလယ်လူအပေါ် စွဲဆောင်မှုတစ်ခု ဖြစ်ကောင်းဖြစ်လာနိုင်တယ်လို့ ဝန်ခံလိုက်ပါတယ်။
ဒီဘရိုင်းက အီတီဟတ်ကွင်းကြီးနဲ့ ၂၀၂၅ ခုနှစ်အထိ စာချုပ်သက်တမ်းရှိထားပေမယ့် ဒီလိုအချက်တွေက ဆော်ဒီမြေဆီ ပြောင်းရွှေ့လာဖို့ လှုပ်ရှားမှုတွေကိုတော့ ရပ်တန့်မသွားစေပါဘူး။ ပြီးခဲ့တဲ့နွေရာသီမှာပဲ အသက်-၃၂ နှစ်အရွယ်ကစားသမား အတွက် စိတ်ဝင်စားမှုတွေ ရှိခဲ့ဖူးသလို လာမယ့်အပြောင်းအရွှေ့ဈေးကွက်မဖွင့်လှစ်ခင် ဆော်ဒီကလပ်တွေရဲ့ အစီအစဉ်တွေမှာ မန်စီးတီးစတားလည်း ပါဝင်လာခဲ့ပါတယ်။
ပက်ဂွါဒီယိုလာက “ဒီဘရိုင်းအတွက် မေးခွန်းတစ်ခုရှိပါတယ်။ ကျွန်တော်ကတော့ သူ့ကို အသင်းမှာ ဆက်ရှိနေစေချင်ပေမယ့် ဘာတွေဖြစ်လာမလဲဆိုတာ ကျွန်တော်လည်း မသိပါဘူး။ ချိတ်ဆက်မှုအချို့ရှိတယ်လို့ ကြားခဲ့ပေမယ့် ကမ်းလှမ်းမှုတစ်ခု ရှိသလားဆိုတာ ကျွန်တော် မသိပါဘူး။ ဆော်ဒီဘက်က သူ့ကို လိုချင်သလားဆိုတာလည်း ကျွန်တော်မသိပါဘူး။ ကျွန်တော်ကတော့ ကစားသမားဘ၀ ကုန်ဆုံးချိန်အထိ ဒီဘရိုင်းကို ဒီကလပ်အသင်းမှာ ဆက်ရှိနေဖို့ လိုလားပေမယ့် လူတိုင်းက ကိုယ့်ကိစ္စနဲ့ကိုယ်ပါပဲ”လို့ ပြောပါတယ်။
မနက်ဖြန်မနက်ပိုင်းမှာ လူတန်တောင်းနဲ့ အက်ဖ်အေဖလား ပဉ္စမအဆင့်ပွဲစဉ်ကို ရင်ဆိုင်ရတော့မယ့် ပက်ဂွါဒီယိုလာက တပည့်ဟောင်း ဇာဘီအလွန်ဆိုကိုလည်း ချီးကျူးစကားဆိုလိုက်ပါတယ်။ အလွန်ဆိုက လတ်တလောမှာ ယာဂန်ကလော့ပ်နေရာ ဆက်ခံမယ့်သူအဖြစ် ရေပန်စားနေပါတယ်။
ပက်ဂွါဒီယိုလာလက်အောက် ဘိုင်ယန်မြူးနစ်မှာ ၂၀၁၄ ခုနှစ်မှ ၂၀၁၆ ခုနှစ်အထိ ကစားခဲ့ဖူးတဲ့ အလွန်ဆိုက ၂၀၂၂ ခုနှစ်မှာ လေဗာကူဆင်အသင်းနည်းပြအဖြစ် စတင်တာဝန်ယူခဲ့ပါတယ်။ သူက အခုဘောလုံးရာသီမှာတော့ ဂျာမန်ကလပ်ကို ဘွန်ဒက်စ်လီဂါအမှတ်ပေးဇယားထိပ်ဆုံးနေရာဆီ ပို့ဆောင်ပေးထားပါတယ်။
လေဗာကူဆင်မှာ အလွန်ဆိုစွမ်းဆောင်ပြနေမှုနဲ့ပတ်သက်ပြီး မေးမြန်းလာချိန်မှာတော့ ပက်ဂွါဒီယိုလာက “ဝိုး…. အခုဘောလုံးရာသီ၊ ပြိုင်ပွဲစုံမှာ ရှုံးပွဲမရှိသေးတဲ့ တစ်ခုတည်းသောအသင်းဖြစ်သလို ဘိုင်ယန်မြူးနစ်နဲ့လည်း ယှဉ်ပြိုင်နေရပါတယ်။ အခုအချိန်မှာ သူတို့က ဘောလုံးရာသီရဲ့အကောင်းဆုံးအချိန်ကို ပိုင်ဆိုင်ထားပါတယ်။ လူတိုင်းက ဘွန်ဒက်စ်လီဂါပြိုင်ပွဲကြီးကို ပြီးဆုံးသွားပြီလို့ ယူဆနေတာကြောင့် ဘွန်ဒက်စ်လီဂါချန်ပီယံဆုကို လက်ဝယ်မရရှိသေးချိန်မှာ ချန်ပီယံဆုကို ဆုံးရှုံးရနိုင်ခြေလည်း ရှိနေပါသေးတယ်။ ဒါက အခက်ခဲဆုံး အရာဖြစ်ပါတယ်။ အလုပ်ကို အပြီးတိုင်မလုပ်ရသေးခင်အထိ အလုပ်ပြီးပြီလို့ ပြောလို့မရပါဘူး။ သူတို့အသင်း ကစားပုံတင်မဟုတ်ပါဘူး။ သူတို့တွေက ယူရိုပါလိဂ်၊ ပိုက်ကယ်လ်ဖလားနဲ့ ဘွန်ဒက်စ်လီဂါပြိုင်ပွဲတွေမှာ ရှုံးပွဲမရှိသေးပါဘူး။ အလွန်ဆိုနဲ့ ရှိနေခဲ့လို့ ကျွန်တော်ကိုယ်တိုင် အရမ်းကံကောင်းဖူးတဲ့ အခိုက်အတန့်တွေ ရှိခဲ့ပါတယ်။ သူက အဲ့ဒီလိုမျိုး ထက်မြက်တဲ့ကစားသမားတစ်ဦးပါ”လို့ ပြောပါတယ်။
