ဂွါဒီယိုလာသည် နွေရာသီတွင် မန်ချက်စတာစီးတီးအသင်း၏ ကစားသမားအင်အားကို ပြန်လည်ဖွဲ့စည်းရန် အခွင့်အရေးကို ငြင်းပယ်ခဲ့ကြောင်း ဝန်ခံခဲ့ပြီး ယခုအခါ ဒဏ်ရာပြဿနာများကြောင့် ဒီနှစ်ရာသီ ရလဒ်ပိုင်းကို အနှောင့်အယှက်ဖြစ်စေခဲ့သော ဆုံးဖြတ်ချက်အတွက် နောင်တရနေသည်။ မန်စီးတီး၏ ဆုဖလားကာကွယ်ရေး ကြိုးပမ်းမှုရုန်းကန်နေရချိန်တွင် ဂွါဒီယိုလာက လက်ရှိကစားသမားအင်အားကို ၎င်း၏ ယုံကြည်မှုသည် နေရာလွဲမှားနေနိုင်ကြောင်း သတိမိပြုခဲ့သည်။

ကလပ်အသင်းမှ ငွေသုံးရန် အသင့်ရှိနေသော်လည်း နွေရာသီ အပြောင်းအရွှေ့ကာလတွင် ဆဗင်ဟိုနှင့် ပြန်လည်ရောက်ရှိလာသော အီလ်ကေးဂမ်ဒိုဂန် နှစ်ဦးသာ ခေါ်ယူခဲ့သည်။ 
ဂွါဒီယိုလာက ၎င်း၏ ဆုံးဖြတ်ချက်ကို ပြန်ပြောင်းပြောဆိုရာတွင်-“နွေရာသီမှာ ကျွန်တော် အမြဲပြောခဲ့ပါတယ်၊ ကလပ်အသင်းက  အပြောင်းအရွှေ့ လုပ်ဆောင်ဖို့ စဉ်းစားခဲ့ပါတယ်။ ကျွန်တော်က ‘မဟုတ်ဘူး၊ ကျွန်တော် ဘယ်ကစားသမားကိုမှ မခေါ်ချင်ဘူး’ လို့ ပြောခဲ့ပါတယ်။ ကျွန်တော် အသင်းကို အားကိုးပြီး သူတို့နဲ့ ဆက်နေချင်ခဲ့ပါတယ်။ ဒါပေမယ့် ဒဏ်ရာတွေရပြီးနောက် ဟုတ်တယ်၊ ဖြစ်နိုင်တာက ကျွန်တော်တို့ အပြောင်းအရွှေ့ လုပ်သင့်ခဲ့တာပါ” လို့ ပြောကြားခဲ့ပါတယ်။

ဇန်နဝါရီလ အပြောင်းအရွှေ့ကာလတွင် စီးတီးက တုံ့ပြန်ခဲ့ပြီး လန်းစ် နောက်ခံလူ အဘ်ဒူကိုဒီရ်ခူဆာနော့ဗ်အတွက် သဘောတူညီမှုရရှိခဲ့ပြီး ဖရန့်ဖတ် တိုက်စစ်မှူး အိုမာမာမို့ရှ်ကို ဆက်လက်ခေါ်ယူရန် ကြိုးပမ်းနေသည်။ မန်စီးတီးအသင်းခေါင်းဆောင် ကိုင်လီဝေါ်လ်ကာရဲ့ အနာဂတ်က မသေချာမရေရာဖြစ်နေဆဲဖြစ်ပြီး အေစီမီလန်က သူ့ကို ခေါ်ယူရန် ဦးဆောင်နေသည်။ 

အသက် ၃၄ နှစ်အရွယ် အင်္ဂလန် နောက်ခံလူတွင် စာချုပ်သက်တမ်း ၁၈ လ ကျန်ရှိနေသေးသော်လည်း ဂွါဒီယိုလာက- “ကိုင်လီက အခုအချိန်မှာ ကျွန်တော်တို့ရဲ့ ကစားသမားပါ၊ ဒါပါပဲ။ ဘာတွေဖြစ်လာမလဲဆိုတာ ကျွန်တော် မသိပါဘူး” လို့ ဝန်ခံခဲ့သည်။ ဂွါဒီယိုလာသည် ဂျာမနီမှ စိတ်ဝင်စားမှုများအကြား ဂျိမ်းစ် မက်အတီးကိုလည်း ဆက်လက်ထိန်းသိမ်းထားရန် ရုန်းကန်နေရပြီး-

“ကျွန်တော်က မက်ကာကို ဒီမှာ ရှိစေချင်တယ်လို့ ပြောခဲ့တဲ့သူပါ။ သူ အများကြီး မကစားရသေးပေမယ့် ဂျိမ်းစ်ကို ကျွန်တော်တို့နဲ့အတူ ရှိစေချင်ပါတယ်” လို့ ပြောကြားခဲ့သည်။