မန်ချက်စတာစီးတီးနည်းပြပက်ဂွါဒီယိုလာက မကြာသေးမီက အသင်းနဲ့ ၁၀ နှစ်သက်တမ်းရှိကာလရှည်စာချုပ် ချုပ်ဆိုခဲ့တဲ့ တိုက်စစ်မှူး အာလင်းဟာလန်းအနေနဲ့ အသင်းအတွက် ပေးဆပ်သွားရမယ်လို့ ပြောကြားလာခဲ့ပါတယ်။ နော်ဝေးလက်ရွေးစင်ကစားသမားဟာ မန်စီးတီးကနေပြောင်းရွှေ့တော့မယ်လို့ ကောလာဟလတွေထွက်ပေါ်နေခဲ့ပေမယ့် ယခုအခါတော့ ကာလရှည်စာချုပ်သစ်ချုပ်ဆိုခဲ့ပြီဖြစ်တာကြောင့် အီတီဟတ်မှာ နောက်ထပ် ၁၀ နှစ်အထိ ဆက်လက်နေထိုင်ဖို့ သေချာစေခဲ့ပြီဖြစ်ပါတယ်။ 

အသက်-၂၄ နှစ်အရွယ်ကစားသမားဟာ မန်စီးတီးမှာ ၂၀၃၄ ခုနှစ်အထိနေထိုင်သွားမှာဖြစ်ပြီး မကြာသေးမီက အသင်းနဲ့ ၂ နှစ်သက်တမ်းရှိစာချုပ်ကိုချုပ်ဆိုခဲ့တဲ့ ဂွါဒီယိုလာနဲ့သေချာပေါက် လက်တွဲသွားရဦးမှာဖြစ်ပါတယ်။ အစ်ဆွစ်ချ်နဲ့ယှဉ်ပြိုင်သွားရမယ့် ပရီးမီးယားလိဂ်ပွဲစဉ်မတိုင်မီ ပွဲကြိုသတင်းစာရှင်းလင်းပွဲမှာ ဂွါဒီယိုလာက “သူ့ရဲ့စာချုပ်သစ်နဲ့ပတ်သက်ပြီး ကျွန်တော်အရမ်းဝမ်းသာပါတယ်။ ကျွန်တော် ဒီအသင်းနဲ့အတူ ပွဲပေါင်း ၅၀၃ ပွဲအထိ ကျော်ဖြတ်ခဲ့ပြီးပါပြီ။ အဲဒီထဲက ၄၈၅ ပွဲလောက်မှာ ကျွန်တော်တို့ အရမ်းကောင်းတဲ့အသင်းဖြစ်ခဲ့ပါတယ်”

“ဒါပေမယ့် ပြီးခဲ့တဲ့ ၁၂ ပွဲ ၁၃ ပွဲလောက်မှာတော့ ကျွန်တော်တို့ မျှော်လင့်ထားသလိုမဖြစ်ခဲ့ပါဘူး။ အခုချိန်မှာ ဟာလန်းအနေနဲ့ အသင်းအတွက်ပေးဆပ်ပြီး အသင်းရဲ့ကစားသမားတွေလည်း တစ်ဦးနဲ့တစ်ဦးတွန်းအားပေးသွားရပါမယ်။ အသင်းက ပြီးပြည့်စုံမှုမရှိသေးလို့ အကောင်းဆုံးကြိုးစားသွားရပါမယ်။ ကလပ်မှာရှိတဲ့ လူတိုင်းက ပျော်ရွှင်နေကြပါတယ်” လို့ပြောကြားခဲ့ပါတယ်။ 

ဟာလန်းရောက်ရှိလာတဲ့ ၂ နှစ်ခွဲတာကာလအတွင်းမှာ မန်စီးတီးဟာ ပရီးမီးယားလိဂ်ဖလား ၂ ကြိမ်၊ အက်ဖ်အေဖလား ၁ ကြိမ်၊ ချန်ပီယံလိဂ် ၁ ကြိမ်နဲ့ ဥရောပစူပါဖလား ၁ ကြိမ်တို့ကို ဆွတ်ခူးနိုင်ခဲ့ပါတယ်။ ဒါ့အပြင် ဟာလန်းအနေနဲ့လည်း အသင်းအတွက် ၂ နှစ်ခွဲအတွင်းမှာ ဂိုးပေါင်း ၁၀၀ ကျော်သွင်းယူပြီး တစ်ဦးချင်းဆုတံဆိပ်တွေလည်း ဆွတ်ခူးနိုင်ခဲ့တာဖြစ်ပါတယ်။ 

ဆက်လက်ပြီး ဂွါဒီယိုလာက သူ့အနေနဲ့ ဟာလန်း ဒဏ်ရာရသွားမှာ စိုးရိမ်ကြောင်းကိုလည်း “ဒဏ်ရာပြဿနာတွေက ဒီအားကစားရဲ့ တစ်စိတ်တစ်ပိုင်းပါပဲ။ ကျွန်တော်တို့ ဟာလန်းကို သေချာဂရုစိုက်ထားပါတယ်။ ဒဏ်ရာပြဿနာမကြုံတွေ့ရဖို့တော့ မျှော်လင့်ပါတယ်”လို့ထပ်လောင်းပြောကြားခဲ့ပါတယ်။