မန်ချက်စတာယူနိုက်တက်နောက်ခံလူ ဗစ်တာလင်ဒီလော့ဖ်က သူ့အနေနဲ့ နောက်ရာသီ အိုးလ်ထရက်ဖို့ဒ်မှာ ဆက်လက်ကစားဖို့ မသေချာကြောင်း ဖွင့်ဟပြောကြားလာခဲ့ပါတယ်။ ၂၀၁၇ ခုနှစ်ကတည်းက ဘင်ဖီကာမှ ယူနိုက်တက်သို့ ပေါင် ၃၁ သန်းနဲ့စတင်ပြောင်းရွှေ့လာခဲ့တဲ့ လင်ဒီလော့ဖ်ဟာ အသင်းသို့ရောက်ရှိနေသည်မှာ အချိန်အတော်ကြာပြီဖြစ်ပေမယ့် ပြိုင်ပွဲစုံ ၂၇၃ ပွဲသာကစားခွင့်ရထားခဲ့တာဖြစ်ပါတယ်။

အသက်-၃၀ နှစ်အရွယ်ဗဟိုနောက်ခံလူဟာ မန်နေဂျာဟောင်းအဲရစ်တန်ဟက်လက်အောက်မှာ ပွဲထွက်ခွင့်ရဖို့ ရုန်းကန်ခဲ့ရပြီး အက်ဖ်အေနဲ့ ကာရာဘောင်ဖလားပွဲစဉ်တွေမှာသာ ပုံမှန်ကစားခွင့်ရခဲ့တာဖြစ်ပါတယ်။ ဒါ့အပြင် တန်ဟက်နေရာမှာ အစားထိုးဝင်ရောက်လာတဲ့ နည်းပြသစ်ရူဘင်အာမိုရင်လက်အောက်မှာလည်း လင်ဒီလော့ဖ်ဟာ ကြံ့ခိုင်ရေးပြဿနာတွေကြောင့် ပုံမှန်ကစားခွင့်မရသေးပါဘူး။ 

လက်ရှိအချိန်မှာတော့ ဆွီဒင်လက်ရွေးစင်ဟာ ကြံ့ခိုင်မှုပြည့်ဝနေတာကြောင့် အာဆင်နယ်၊ လက်စတာတို့နဲ့ယှဉ်ပြိုင်ခဲ့တဲ့ ယူနိုက်တက်ရဲ့ပွဲစဉ်တွေမှာ ပါဝင်နိုင်ခဲ့သလို၊ လာမယ့်အပတ် နော်တင်ဟမ်ဖောရက်စ်နဲ့ပွဲစဉ်မှာလည်း ပွဲထွက်ကစားဖို့ သေချာတဲ့အခြေအနေမှာရှိနေပါတယ်။ လင်ဒီလော့ဖ်ဟာ ယူနိုက်တက်နဲ့ လာမယ့်ဇွန်လမှာ စာချုပ်သက်တမ်းကုန်ဆုံးမှာဖြစ်ပြီး အခုချိန်မှာ သက်တမ်းတိုးဖို့ တစ်စုံတစ်ရာသတင်းထွက်ပေါ်ထားခြင်းမရှိလို့ အိုးလ်ထရက်ဖို့ဒ်ကနေ ထွက်ခွာဖို့အလားအလာများနေပါတယ်။ 

အင်္ဂါနေ့ကပြုလုပ်ခဲ့တဲ့ အင်တာဗျူးတစ်ခုမှာ လင်ဒီလော့ဖ်က "ကျွန်တော့်အကြောင်းကို ကျွန်တော်တစ်ယောက်တည်းတွေးလို့မရပါဘူး။ မိသားစုလိုက် ဆုံးဖြတ်ချက်ချသွားရမှာပါ။ ကျွန်တော့်အတွက် ဘောလုံးကစားတာက အကောင်းဆုံးဆိုတာသိပါတယ်။ ဒါပေမယ့် မိသားစုအတွက်အဆင်ပြေဖို့လည်းလိုအပ်ပါသေးတယ်။ ကျွန်တော့်ရဲ့ဇနီးနဲ့အတူ ဆုံးဖြတ်ချက်ချသွားမှာပါ။လောလောဆယ်မှာတော့ မိသားစုနဲ့ ပျော်ပျော်ရွှင်ရွှင်နေနေပါတယ်"

"ကျွန်တော်ကတော့ ကိုယ့်ကိုယ်ကိုယ် အဆင့်အတန်းမြင့်တဲ့ကစားသမားတစ်ယောက်လို့ ခံစားနေရတုန်းပါ။ အမြင့်ဆုံးဘောလုံးအဆင့်မှာ ကစားချင်ပါသေးတယ်" လို့ပြောကြားခဲ့ပါတယ်။ 

ဆက်လက်ပြီး ဆွီဒင်သားက အသင်းဟောင်းဘင်ဖီကာနဲ့ ပြန်လည်ချိတ်ဆက်နိုင်ကြောင်းကို "ဘင်ဖီကာက ကျွန်တော့်အတွက် အများကြီးအဓိပ္ပာယ်ရှိတဲ့ကလပ်ပါ။ ဒီနေ့ ကျွန်တော် အခုလိုကစားသမားတစ်ယောက်အဖြစ်ရပ်တည်နိုင်အောင် သူတို့က ပုံသွင်းပေးခဲ့ပါတယ်။ ဘာတွေဖြစ်လာမလဲဆိုတာတော့ မသိရသေးပါဘူး။ ဒါပေမယ့် ဘင်ဖီကာက ကျွန်တော်အရမ်းကြိုက်တဲ့အသင်းပါ။ ဒီရာသီက ကျွန်တော်တို့အတွက်ခက်ခဲပါတယ်။ ကျွန်တော့်အနေနဲ့ ပွဲစဉ်တွေအများကြီးကစားရလေ့ရှိပေမယ့် ဒီရာသီမှာတော့ ဒဏ်ရာပြဿနာတွေကြုံတွေ့ခဲ့ရပါတယ်။ နဂိုပုံစံအတိုင်းပြန်ရဖို့ ကြိုးစားသွားရပါဦးမယ်" လို့ပြောကြားခဲ့ပါတယ်။