ဘာစီလိုနာစတား ပီဒရီက အသင်းဖော် ယာမဲလ်ဟာ မိမိတို့အသင်းသားတွေထံ မက်ဆီလိုမျိုး တူညီတဲ့ခံစားချက်မျိုး ယူဆောင်လာတယ်လို့ အခိုင်အမာပြောကြားလိုက်ပါတယ်။ ယာမဲလ်ဟာ ဘာစီလိုနာ နဲ့ စပိန်အသင်းမှာ တောက်ပလာနေပြီး တစ်ပတ်ပြီးတစ်ပတ် မက်ဆီ နဲ့ ခိုင်းနှိုင်းခံရမှုတွေရှိနေပါတယ်။

အသက် ၁၇ နှစ်သာရှိသေးပေမယ့် ယာမဲလ်ဟာ ဘာစီလိုနာဂန္ထဝင်ဟောင်းရဲ့အမှတ်တရတွေကို ပြန်လည်သတိရစေတာဖြစ်ပြီး ၂ ဦးစလုံးက ဘယ်ခြေအားသန်ကစားသမားတွေလည်း ဖြစ်နေတာဖြစ်ပါတယ်။ ကွင်းလယ်လူ ပီဒရီကလည်း အသင်းဖော် ယာမဲလ်နဲ့ပတ်သက်ပြီး “လာမိုင်းက မက်ဆီလိုမျိုးတူညီတဲ့ခံစားချက်ကို အသင်းထံယူဆောင်လာပါတယ်။ သူပါဝင်လာရင် တစ်စုံတစ်ခုကောင်းတာဖြစ်တော့မယ်ဆိုတာ သိနေပါတယ်”လို့ ဖြေကြားခဲ့ပါတယ်။

ပီဒရီကတော့ ယာမဲလ်နည်းတူ တောက်ပလာနိုင်ချေရှိခဲ့သလို ဥရောပရဲ့အကောင်းဆုံးကွင်းလယ်လူတွေထဲကတစ်ယောက်ဖြစ်လာနိုင်တယ်လို့ ထင်ကြေးပေးခံခဲ့ရတာဖြစ်ပါတယ်။ ဒါပေမယ့်လည်း ပြီးခဲ့တဲ့ရာသီတွေက ဒဏ်ရာပြဿနာတွေကြောင့် စပိန်သားရဲ့တိုးတက်မှုနှုန်းက နှေးကွေးလာခဲ့တာဖြစ်ပါတယ်။ ဒီရာသီမှာမှ စပိန်သားဟာ ပုံစံကောင်းပြန်လည်ရှာဖွေလာနိုင်ခဲ့ပြီး ဘာစီလိုနာရဲ့ကွင်းလယ်မှာ အဓိကကစားသမားဖြစ်လာခဲ့ပါတယ်။

ဘော်လွန်းဒီအော်ဆုနဲ့ပတ်သက်ပြီး ပီဒရီက “ဇာဗီ ၊ ဘက်စ်ကွက်တို့က အဲ့ဆုနဲ့ထိုက်တန်ပါတယ်။ ရိုဒရီကလည်း ဒီဆုနဲ့ထိုက်တန်ပါတယ်။ လာမယ့်နှစ်တွေမှာ အဲ့တာက အသုံးဝင်လာဖို့ မျှော်လင့်ပါတယ်။ ဒီကမ္ဘာပေါ်က ဘယ်ကစားသမားမဆို ဘော်လွန်းဒီအော်ဆုလိုချင်လားမေးရင် လိုချင်တာပဲပြောမှာပါ။ ဒါပေမယ့် တစ်ဦးချင်းဆုတံဆိပ်ထက် ကျွန်တော်ကတော့  အသင်းနဲ့အတူ ဆုဖလားအောင်မြင်တာပဲလိုချင်ပါတယ်”လို့ ပီဒရီက ဖြေကြားခဲ့ပါတယ်။

မက်ဆီထွက်ခွာသွားတာကြာပေမယ့်လည်း ဘာစီလိုနာအနေနဲ့ သူ့နေရာမှာဆက်ခံမယ့်ကစားသမားမျိုးကို ပြန်လည်ရရှိခဲ့တာဖြစ်ပါတယ်။ ယာမဲလ်ရဲ့ဖန်တီးနိုင်စွမ်း ၊ ထိတ်လန့်မှုမရှိတာ ၊ နည်းစနစ်ပိုင်းကျွမ်းကျင်တာက ဘာစီလိုနာအတွက် အဖိုးမဖြတ်နိုင်တဲ့အရာတွေဖြစ်ပါတယ်။ ယာမဲလ်ရဲ့အသက်အရွယ်ဟာ ငယ်ရွယ်သေးတာကြောင့် စံချိန်တွေ ထပ်ချိုးနိုင်ဖို့ များနေသလို ပီဒရီကလည်း ဘာစီလိုနာရဲ့ကွင်းလယ်မှာ အဓိကျလာဖွယ်ရှိနေပါတယ်။