ဂျာမနီအသင်းနည်းပြ နာဂယ်စမန်းက တာစတီဂျန်တစ်ယောက် မသေချာချိန်မှာ ဂိုးသမားနေရာအတွက် ရွေးချယ်ပြီးဖြစ်တယ်လို့ ပြောကြားလိုက်ပါတယ်။တာစတီဂျန်ဟာ ဒဏ်ရာရပြီးနောက် ဘာစီလိုနာအသင်းမှာနေရာမရတော့ပဲ လာမယ့်နှစ်ကမ္ဘာ့ဖလားအတွက် နိုင်ငံအသင်းမှာနေရာရဖို့ မသေချာတော့တာဖြစ်ပါတယ်။

နူအာတစ်ယောက် နိုင်ငံအသင်းကစားသမားဘဝကနေ အနားယူခဲ့ပြီးနောက် တာစတီဂျန်က စီနီယာအရ နံပတ် ၁ ဂိုးသမားဖြစ်လာမှာဖြစ်ပေမယ့် ပုံမှန်ကစားခွင့်မရတာကြောင့် လူစာရင်းမှာပါဝင်ဖို့ မသေချာသေးတာဖြစ်ပါတယ်။ဒါပေမယ့် နာဂယ်စမန်းက တာစတီဂျန်အစား ဟော့ဖန်ဟိမ်းဂိုးသမား ဘူမန်းကို ခေါ်ယူဖို့ ပြင်ဆင်နေပါတယ်။ ဒဏ်ရာကနေပြန်လာပြီးကတည်းက ဘာစီလိုနာစတားဟာ ခက်ခဲတဲ့အချိန်တွေကိုဖြတ်သန်းနေရပြီး ကနဦးတုန်းက ၃ လလောက်သာနားရမယ်လို့ ထင်ခဲ့ပေမယ့် ထင်ထားတာထက်ပိုကြာမြင့်ခဲ့တာဖြစ်ပါတယ်။

အသက် ၃၃ နှစ်သားအနေနဲ့ လာမယ့်ကမ္ဘာ့ဖလားမှာပါဝင်နိုင်ဖို့ ပုံမှန်ပွဲထွက်ခွင့်လိုအပ်နေပေမယ့် ဂါစီယာကြောင့် နေရာရဖို့မသေချာသေးတာဖြစ်ပါတယ်။ နာဂယ်စမန်းကတော့ အခုလာမယ့်နိုင်ငံတကာရက်သတ္တပတ်မှာ ဘူမန်းကို အစားထိုးခေါ်ယူထားခဲ့ပြီးဖြစ်ပါတယ်။ ZDF နဲ့အင်တာဗျူးမှာ ဘူမန်းနဲ့ပတ်သက်ပြီး နာဂယ်စမန်းက “ဘာလို့လဲဆိုတော့ သူက ကျွန်တော်တို့အတွက် အကောင်းဆုံးကစားပေးနိုင်မယ်လို့ ထင်ပါတယ်။ ပြီးခဲ့တဲ့နှစ်အနည်းငယ်တုန်းကလည်း ဘွန်ဒက်စ်လီဂါမှာ သူတည်ငြိမ်တဲ့စွမ်းဆောင်ရည်ပြသထားနိုင်ခဲ့ပါတယ်။ 

ဘူမန်းက ကောင်းမွန်တဲ့ဘောလုံးသမားဖြစ်သလို ကစားကွက်တည်ဆောက်ရာမှာလည်း ပါဝင်နိုင်ပါတယ်။ ပြီးတော့ သူ့မှာကောင်းမွန်တဲ့စရိုက်လက္ခဏာလည်းရှိပါတယ်။ သူ့အခွင့်အရေးနဲ့လည်း ထိုက်တန်ပါတယ်။ ဂိုးသမားနေရာအတွက် ကျွန်တော့်စိတ်ထဲမှာ အစီအစဉ်ရှိပြီးသားပါ။ တာစတီဂျန်အနေနဲ့လည်း ကြံ့ခိုင်နေမယ်ဆိုရင် သူပါဝင်ကစားနိုင်မှာပါ။ ကျွန်တော်တို့လက်ရှိမှာ သူကြံ့ခိုင်မှုပြည့်ဝအောင်ပဲ လုပ်ဆောင်နေပါတယ်။

အခြေအနေအရ သူ့အနေနဲ့ ဆောင်းရာသီမှာ ကြံ့ခိုင်မှုပြန်လည်ပြည့်ဝလာနိုင်ပါတယ်။ အခြေအနေတွေကို စောင့်ကြည့်ရပါမယ်။ မှန်ပါတယ်။ တာစတီဂျန်အနေနဲ့ ကစားရမှာပါ။ သူအဲ့တာကို သိပါတယ်။ နူအာပြန်လာနိုင်မလားဆိုတာကတော့ ဆက်လက်စောင့်ကြည့်နေပါတယ်။ သူကလပ်ကမ္ဘာ့ဖလားမှာ အရမ်းအရမ်းကောင်းအောင် စွမ်းဆောင်ထားနိုင်ပါတယ်။ ဒါကြောင့် သူနဲ့ပတ်သက်ပြီး အကောင်းမြင်ပါတယ်။ ဒါပေမယ့် ကျွန်တော့်အတွက်တော့ စိတ်ထဲမှာအစီအစဉ်ရှိပြီးသားပါ”လို့ ဖြေကြားခဲ့ပါတယ်။

ဂျာမနီအသင်းဟာ စက်တင်ဘာ ၄ ရက်နေ့မှာ ဆလိုဗက်ကီးယားနဲ့ကန်ရမှာဖြစ်ပြီး အဲ့နောက် စက်တင်ဘာ ၇ ရက်နေ့မှာ မြောက်အိုင်ယာလန်နဲ့ကန်ရမှာဖြစ်ပါတယ်။ လက်ရှိဂျာမနီလူစာရင်းမှာ ဂိုးသမားနေရာအတွက် စတုဂတ်စတား နူဘယ် နဲ့ အော့စ်ဘတ်ဂိုးသမား ဒါမန်းတို့ ပါဝင်နေပါတယ်။