ရီးရဲလ်မက်ဒရစ်ရဲ့စိတ်ဝင်စားမှုရရှိထားခဲ့ချိန်မှာပဲ မက်အယ်လစ္စတာက လီဗာပူးမှာ အလွန်ပျော်ရွှင်နေသလို ကလော့ပ်ကိုယ်တိုင်လည်း သူ့ကို အန်ဖီးလ်မှာ ဆက်ရှိနေဖို့ အကြံဉာဏ်ပေးခဲ့တယ်လို့ ထုတ်ဖော်ပြောဆိုလိုက်ပါတယ်။

ပြီးခဲ့တဲ့နွေရာသီကာလအတွင်း ဘရိုက်တန်မှ ပေါင် ၅၅ သန်းဖြင့် ပြောင်းရွှေ့လာတဲ့ အသက်-၂၅ နှစ်အရွယ်ကွင်းလယ်ကစားသမားက လီဗာပူးနဲ့ပွဲဦးထွက်ဘောလုံးရာသီမှာပဲ အထင်ကြီးလောက်စရာစွမ်းဆောင်ရည်မျိုး ပြသနိုင်ခဲ့ပါတယ်။အာဂျင်တီးနားမှလာတဲ့သတင်းတွေအရ ရီးရဲလ်မက်ဒရစ်ဟာ လီဗာပူးကွင်းလယ်လူကို နွေရာသီအပြောင်းအရွှေ့ကာလအတွင်း ခေါ်ယူသွားဖို့ စဉ်းစားနေတယ်လို့ သိရပါတယ်။ ဒါပေမယ့် မက်အယ်လစ္စတာကတော့ အန်းစလော့ရဲ့အသင်းဆီမှ အဝေးဆီထွက်ခွာသွားဖို့အတွက် မစဉ်းစားထားပါဘူး။

မက်ဒရစ်အခြေစိုက်ကလပ်နဲ့ အပြောင်းအရွှေ့ချိတ်ဆက်မှုသတင်းထွက်ပေါ်လာမှုအပေါ် သူ့ရဲ့အမြင်ကို မေးမြန်းချိန် မက်အယ်လစ္စတာက “ဂုဏ်ယူစရာကိစ္စတစ်ခုဆိုတာ သိသာထင်ရှားပါတယ်။ ခင်ဗျားတို့ပြောခဲ့သလိုပါပဲ၊ သူတို့တွေက ကမ္ဘာ့အကောင်းဆုံးကလပ်အသင်းတွေထဲမှာ ပါဝင်နေသလို ကျွန်တော် အရမ်းလေးစားရတဲ့ ကလပ်အသင်းတစ်ခုလည်း ဖြစ်ပါတယ်။ ဒါပေမယ့် ကျွန်တော် ပြောခဲ့သလိုပါပဲ၊ ကျွန်တော်ကိုယ်တိုင်က ကောလာဟလတွေအကြောင်း ပြောဆိုဆွေးနွေးရတာ သဘောမတွေ့လှပါဘူး။

အမှန်ပါပဲ၊ တကယ့်အစစ်အမှန်သာဆိုရင် သူတို့တွေ လီဗာပူးနဲ့ စကားပြောဆိုဆွေးနွေးပြီး ကျွန်တော့်ဆီ ဘာပဲဖြစ်ဖြစ် အသိပေးလာပါလိမ့်မယ်။ ဒါပေမယ့် လက်ရှိအချိန်မှာတော့ ကျွန်တော်က လီဗာပူးအသင်းအပေါ် လေးစားမှုအပြည့်ရှိပါတယ်။ ကျွန်တော်ကိုယ်တိုင်လည်း လီဗာပူးအသင်းမှာ အရမ်းပျော်ရွှင်နေပြီး ဒီလိုကောလာဟလတွေ မဖြစ်ပေါ်လာသင့်ဘူးလို့ ယူဆမိပါတယ်”လို့ တုံ့ပြန်ပြောဆိုခဲ့ပါတယ်။

ဒါ့အပြင် ကလော့ပ်ကိုယ်တိုင်လည်း သူ့ကို လီဗာပူးမှာဆက်ရှိနေဖို့ လိုလားနေတယ်လို့ မက်အယ်လစ္စတာက ထုတ်ဖော်ပြောဆိုပါတယ်။ မက်အယ်လစ္စတာက “ ကျွန်တော့်အတွက် တိုးတက်လာဖို့ အသင့်လျော်ဆုံး၊ အမှန်ကန်ဆုံးအသင်းမှာ ရှိနေတယ်လို့ ကလော့ပ်က ပြောခဲ့ပါတယ်။ သူ ထွက်ခွာသွားချိန် ကျွန်တော့်ကို ပွေ့ဖက်ခဲ့ပြီး အတူရှိနေတဲ့အချိန်တွေ နည်းပါးခဲ့တာ ဝမ်းနည်းစရာပါပဲလို့ ပြောခဲ့ပါတယ်။ ကျွန်တော် လီဗာပူးမှာ ပျော်ရွှင်နေသလို အရမ်းသက်သောင့်သက်သာ ရှိနေပါတယ်”လို့ ဆိုပါတယ်။