The network connection is lost.

Banner Image

နိုင်ပွဲရရှိဖို့ ယုံကြည်မှုအပြည့်ရှိခဲ့တယ်လို့ ဖွင့်ဟလာတဲ့ ပြင်သစ်ကြယ်ပွင့်အမ်ဘာပေ

ပြင်သစ်လက်ရွေးစင်အသင်းကြယ်ပွင့် အမ်ဘာပေက ခရိုအေးရှားအသင်းကို ပထမအကျော့ရှုံးကြွေး ပြန်လည်ပေးဆပ်နိုင်မှုနဲ့အတူ ပယ်နယ်တီအဆုံးအဖြတ်ဖြင့် စိတ်လှုပ်ရှားဖွယ်အနိုင်ယူကာ နေးရှင်းလိဂ်ဆီမီးဖိုင်နယ်အဆင့်ဆီ တက်လှမ်းနိုင်ခဲ့လို့ ပျော်ရွှင်ကျေနပ်မိတယ်လို့ ပြောကြားခဲ့ပါတယ်။

အမ်ဘာပေက “ကျွန်တော်တို့အသင်းက အကောင်းဆုံးစွမ်းဆောင်ရည်တွေ ပြသမယ်ဆိုတဲ့ စိတ်ကူးစိတ်သန်းနဲ့ အခုပွဲစဉ်ကို ပြတ်ပြတ်သားသားစတင်ခဲ့ပါတယ်။ ပထအကျော့မှာ နောက်ကောက်ကျခဲ့ပေမယ့် Comeback လုပ်ပြနိုင်မယ့် ကိုယ့်ရဲ့အရည်အသွေးကို ယုံကြည်မှုအပြည့်အဝရှိနေခဲ့ပါတယ်။ ကျွန်တော်တို့အတွက် ကွင်းတွင်းမှာ ဒီလိုစွမ်းဆောင်ရည်မျိုးပြသနိုင်ဖို့ပဲ လိုအပ်တာပါ။ ခရိုအေးရှားအတွက် အခွင့်အရေးတစ်ခုတစ်လေတောင် မပေးချင်ခဲ့ပါဘူး။ကျွန်တော်တို့လည်း အခွင့်အရေးအချို့ လွဲချော်ခဲ့ပေမယ့် အိုလီစီက ဖရီးကစ်မှတဆင့် အရမ်းကောင်းမွန်တဲ့ဂိုးကို သွင်းယူပေးခဲ့သလို ဒမ်ဘီလီရဲ့တိုက်စစ်ကစားဟန်ကလည်း အရမ်းထိရောက်ခဲ့ပါတယ်။

ပယ်နယ်တီအဆုံးအဖြတ်မှာ မတူကွဲပြားမှုတစ်ခုကို လုပ်ဆောင်နိုင်စွမ်းရှိတဲ့ ဂိုးသမားတစ်ဦးကို ကျွန်တော်တို့ ပိုင်ဆိုင်ထားခဲ့တယ်ဆိုတာ ကိုယ်တိုင်လည်း သိရှိထားခဲ့ပါတယ်။ မိုင်ဂနန် အရမ်းကောင်းခဲ့ပါတယ်။ ဒါက ကျွန်တော်တို့အတွက် နောက်ထပ်အားသာချက်တစ်ခုကို ဖန်တီးပေးခဲ့ပါတယ်။ကျွန်တော်တို့ရဲ့ရည်မှန်းချက်က ဆီမီးဖိုင်နယ်တက်ရောက်နိုင်ဖို့ဖြစ်ပြီး ဒီရည်မှန်းချက်အတိုင်းအောင်မြင်အောင်လုပ်ဆောင်ဖို့ ကိုယ့်ရဲ့အရည်အသွေးကိုလည်း ယုံကြည်မှုအပြည့်ရှိနေခဲ့ပါတယ်။

အသင်းပရိသတ်တွေရဲ့အားပေးထောက်ခံမှု ပြန်လည်ရရှိဖို့ အခုလိုမျိုးပွဲစဉ်တစ်ခု လိုအပ်ခဲ့ပါတယ်။ ခရိုအေးရှားမြေမှာကစားရတဲ့ ပထမအကျော့ပွဲစဉ်လိုမဟုတ်ဘဲ တက်နိုင်သမျှ စိတ်လှုပ်ရှားစရာအကောင်းဆုံး ဖြစ်စေမယ့် ပတ်ဝန်းကျင်တစ်ခုတည်ဆောက်နိုင်ဖို့ ကြိုးစားခဲ့ပါတယ်။ ကိုယ့်ရဲ့အိမ်ကွင်းမှာကစားရသလိုမျိုး ခရိုအေးရှားမြေမှာ မခံစားခဲ့ရပါဘူး။

အခုတော့ ကျွန်တော်တို့တွေ ဆီမီးဖိုင်နယ်ရောက်ရှိသွားပါပြီ။ ဆုဖလားနဲ့လည်း နီးကပ်လာပြီဖြစ်လို့ အကောင်းဆုံးကြိုးစားသွားဖို့ပဲ ကျန်ပါတော့တယ်”လို့ ပြောပါတယ်။