ရီးရဲလ်မက်ဒရစ်ကြယ်ပွင့် ကီလီယန်အမ်ဘာပေဟာ အလာဗက်စ်အသင်းနဲ့ ကစားရင်း မတော်တဆ ဖျက်ထုတ်မှုတစ်ခုကြောင့် အနီကတ်ပြခံလိုက်ရပါတယ်။ ပွဲကစားနေရင်းမှာ အမ်ဘာပေဟာ အလာဗက်စ်ကစားသမား အန်တိုနီယို ဘလန်ကိုကို ပြင်းထန်စွာဖျက်ထုတ်ခဲ့တာကြောင့် တိုက်ရိုက် အနီကတ်ပြသခံခဲ့ရပြီး အသင်းအတွက်တော့ အတော်လေး ထိခိုက်စေခဲ့ပါတယ်။

ပွဲကစားချိန် ၃၈ မိနစ်မှာတင် အနီကတ်ပြခံလိုက်ရတဲ့အတွက် အမ်ဘာပေဟာ စောစောစီးစီး ထွက်ခွာခဲ့ရပါတယ်။ ပွဲအပြီးမှာတော့ အမ်ဘာပေက အသင်းဖော်တွေရော၊ ဖျက်ထုတ်ခံခဲ့ရတဲ့ ဘလန်ကိုပါ တောင်းပန်ခဲ့ပါတယ်။ AS သတင်းဌာနရဲ့အဆိုအရ အမ်ဘာပေဟာ အသင်းဖော်တွေကိုလည်း ပွဲကစားချိန်မှာ လူတစ်ယောက်လျော့သွားစေခဲ့တဲ့အတွက် စိတ်မကောင်းဖြစ်ခဲ့တယ်လို့ သိရပါတယ်။ 

အသက် ၂၅ နှစ်အရွယ် ကစားသမားဟာ ဒီကိစ္စနဲ့ပတ်သက်ပြီး ဘာဆင်ခြေမှမပေးခဲ့ဘဲ သူ့ရဲ့လုပ်ရပ်အတွက် အတော်လေးကို စိတ်မကောင်းဖြစ်နေခဲ့တယ်လို့လည်း ဆိုပါတယ်။ တစ်ယောက်လျော့နဲ့ ကစားခဲ့ရပေမယ့် ရီးရဲလ်မက်ဒရစ်အသင်းကတော့ ကာမာဗင်ဂါရဲ့ဂိုးနဲ့ အနိုင်သုံးမှတ်အပြည့်အဝ ရယူနိုင်ခဲ့ပါတယ်။ ပွဲအပြီးမှာ အန်တိုနီယို ဘလန်ကိုက အမ်ဘာပေက သူ့ကိုကိုယ်တိုင်လာရောက်တောင်းပန်ခဲ့တယ်လို့ ပြောပြခဲ့ပါတယ်။ 

"ဒါက ပြင်းထန်တဲ့ ဖျက်ထုတ်မှုတစ်ခုပါ။ ကျွန်တော်ကီလီယန်နဲ့ စကားပြောခဲ့ပါတယ်။ သူတောင်းပန်ခဲ့ပြီး ဘာပြဿနာမှမရှိပါဘူး။ ဒါတွေက ဘောလုံးပွဲမှာ ဖြစ်တတ်တဲ့သဘောပါပဲ" လို့ ဘလန်ကိုက ပြောခဲ့ပါတယ်။ အခုဆိုရင် အမ်ဘာပေဟာ အနီကတ်ပြစ်ဒဏ်ကြောင့် လာလီဂါမှာ သုံးပွဲအထိ ပွဲပယ်ခံရဖို့ရှိပါတယ်။ ဒါပေမဲ့ ဧပြီလ ၂၆ ရက်နေ့မှာ ကစားမယ့် ဘာစီလိုနာအသင်းနဲ့ စပိန်ဘုရင့်ဖလားဖိုင်နယ်ပွဲစဉ်မှာတော့ ပါဝင်ကစားခွင့်ရရှိမှာဖြစ်ပါတယ်။