ဂါဘရီရယ်မာတင်နယ်လီက ဘရာဇီးအသင်းဖော် ဗင်နီစီးယက်စ်ကို ဘော်လွန်းဒီအော်ဆုနဲ့ ထိုက်တန်တဲ့ ကစားသမားအဖြစ် ထောက်ခံလိုက်ပြီး တောင်ပံကစားသမားနဲ့အတူ တွဲကစားရတာ ဂုဏ်ယူမိကြောင်း ပြောခဲ့ပါတယ်။ ရီးရဲလ်မက်ဒရစ်နဲ့အတူ လာလီဂါနဲ့ ချန်ပီယံလိဂ်ဆုဖလားတွေ ဆွတ်ခူးခဲ့ပြီးနောက် ဗင်နီစီးယက်စ်ဟာ ဘရာဇီးနဲ့အတူ ကိုပါအမေရိကဖလားရယူနိုင်ဖို့ ပြင်ဆင်လျက် ရှိနေပါတယ်။

နေမာ ဒဏ်ရာကြောင့် မပါဝင်နိုင်တဲ့ အခြေအနေမှာ ၂၃နှစ်သားက ဘရာဇီးကို ဆုဖလားတွေ ပြန်ယူပေးဖို့အတွက် တာဝန်ရှိနေပါတယ်။ ဗင်နီစီးယက်စ်ဟာ ကလပ်အသင်း အောင်မြင်မှုတွေကြောင့် အသင်းဖော် ဘယ်လင်ဟမ်နဲ့အတူ ဘော်လွန်းဒီအော်ဆု ဆွတ်ခူးနိုင်ဖို့ ရေပန်စားနေပေမယ့် ကိုပါအမေရိကဖလားသာ ရယူနိုင်ခဲ့မယ်ဆိုရင် ကမ္ဘာ့အကောင်းဆုံးကစားသမားအဖြစ် နာမည်တပ်ခံရဖို့ နီးစပ်လာမှာ ဖြစ်ပါတယ်။ ဒါပေမယ့် အသင်းဖော် မာတင်နယ်လီကတော့ ဗင်နီစီးယက်စ်ဟာ လက်ရှိခြေစွမ်းတွေအရ ဘော်လွန်းဒီအော်ဆုနဲ့ ထိုက်တန်ကြောင်း ထောက်ခံပြောကြားခဲ့ပါတယ်။

မာတင်နယ်လီက "ဗင်နီစီးယက်စ်နဲ့အတူ တွဲကစားရတာ ဂုဏ်ယူစရာအရမ်းကောင်းပါတယ်။ နေ့စဉ်နေ့တိုင်း သူလုပ်ပြနေတဲ့ ထူးခြားတဲ့အရာတွေကို မြင်နေရပါတယ်။ ကျွန်တော် ဘရာဇီးသားတစ်ယောက်ဖြစ်ရတာ ပျော်သလို ဗင်နီတစ်ယောက် တောက်ပနေတာ မြင်ရတာလည်း ဝမ်းသာမိပါတယ်။ ကျွန်တော့်အမြင်အရဆိုရင် သူက ဘော်လွန်းဒီအော်ဆုရဖို့ ထိုက်တန်ပါတယ်။ သူနဲ့ ကွင်းထဲအတူ တွဲကစားရတာ ပျော်စရာကောင်းပါတယ်။"လို့ ပြောခဲ့ပါတယ်။