မန်ချက်စတာယူနိုက်တက်နည်းပြရူဘင်အာမိုရင်က အသင်းရဲ့ကစားသမားတွေဟာ အဓိကရှယ်ယာရှင် ဆာဂျင်မ်ရက်ကလစ်ဖ်ရဲ့ဝေဖန်မှုတွေကို ပြင်းပြင်းထန်ထန်ခံထားရပေမယ့် တုံ့ပြန်ပြောဆိုဖို့ အခွင့်အရေးမရှိကြောင်း သတိပေးစကားဆိုလာခဲ့ပါတယ်။ ယခုတစ်ပတ်အတွင်းပြုလုပ်ခဲ့တဲ့အင်တာဗျူးမှာ ရက်ကလစ်ဖ်က ယူနိုက်တက်ကစားသမားအချို့ဟာ ဈေးကြီးပေးဝယ်ထားရပေမယ့် တန်ကြေးနဲ့ထိုက်တန်တဲ့ခြေစွမ်းမျိုး ပြသနိုင်ခြင်းမရှိကြောင်း ပွင့်ပွင့်လင်းလင်း ဝေဖန်ပြောဆိုထားခဲ့တာဖြစ်ပါတယ်။ 

ဗြိတိန်ဘီလီယံနာရဲ့ မှတ်ချက်တွေနဲ့ပတ်သက်ပြီး ဘယ်လိုသဘောရသလဲလို့ မေးမြန်းခဲ့ရာမှာ အာမိုရင်က “ကျွန်တော်တို့ ဒီလိုရိုးရိုးသားသားပြောပြီး အသင်းကိုတိုးတက်အောင်ပြုလုပ်ဖို့လိုပါတယ်။ ကျွန်တော်တို့အသင်းက ဒီရာမှာ တကယ်လည်း စွမ်းဆောင်ရည်မကောင်းပါဘူး။ ကျွန်တော်တို့ ဒါကိုပြောင်းလဲပစ်လို့တော့ရပါတယ်။ ဒီလိုပုံစံကောင်းမပြသနိုင်တဲ့အထဲမှာ ကျွန်တောလည်း တစ်ယောက်အပါအဝင်ပါပဲ။  ကျွန်တော်က ယူနိုက်တက်နဲ့ထိုက်တန်တဲ့နည်းပြမဟုတ်ဘူးလို့ လူတွေကထင်နေကြပါတယ်။ ဒါပေမယ့် ကျွန်တော်ကတော့ အခြေအနေတွေကို ပြောင်းလဲနိုင်မယ်လို့ ယုံကြည်ပါတယ်” လို့ပြောကြားခဲ့ပါတယ်။ 

ရက်ကလစ်ဖ်က အသင်းရဲ့ကစားသမားတွေဖြစ်တဲ့ ဂျေဒန်ဆန်ချို၊ အန်တိုနီ၊ ရက်စ်မွတ်စ်ဟွိုက်လန်း၊ အန်ဒရေအိုနာနာနဲ့ ကတ်စ်မဲရိုးတို့ကို တန်ကြေးနဲ့မထိုက်တန်တဲ့ကစားသမားတွေလို့ ပြောကြားခဲ့တာဖြစ်ပါတယ်။ ဆက်လက်ပြီး ပေါ်တူဂီသားနည်းပြက “ကတ်စ်မဲရိုးလိုကစားသမားတွေက အခုခြေစွမ်းထက် အများကြီးပိုကောင်းအောင်ကစားနိုင်ကြပါတယ်။ အာရုံစူးစိုက်မှုပဲလိုအပ်တာပါ။ သူ့ရဲ့စိတ်ဓာတ်ကိုပြောင်းလဲဖို့ပဲ လူတွေရဲ့စိတ်ဓာတ်ပိုပြောင်းလဲနိုင်ဖို့လိုပါတယ်” လို့ပြောကြားခဲ့ပါတယ်။ 

သောကြာနေ့နံနက်မှာ ယူနိုက်တက်ဟာ ယူရိုပါလိဂ်ရှုံးထွက် ၁၆ သင်းအဆင့် ဒုတိယအကျော့ပွဲစဉ်အဖြစ် ရီးရဲလ်ဆိုစီဒက်နဲ့ယှဉ်ပြိုင်သွားရမှာဖြစ်ပြီး အဆိုပါပွဲစဉ်ကို ဟယ်ရီမက်ဂွါရီနဲ့ လန်နီယိုရိုတို့ လွဲချော်သွားမှာဖြစ်ပါတယ်။ ကွင်းလယ်လူမေဆင်မောင့်က မကြာသေးမီမှာ လေ့ကျင့်ရေးအစီအစဉ်တွေပြုလုပ်ထားနိုင်တယ်လို့သိရပေမယ့် ယခုပွဲစဉ်မှာတော့ ပါဝင်နိုင်မှာမဟုတ်ပါဘူး။သို့သော်လည်း ယူနိုက်တက်ရဲ့နောက်ဆုံးပွဲစဉ် ၂ ပွဲကိုလွဲချော်ထားတဲ့ မန်နူရယ်ယူဂါတီကတော့ ဒီပွဲမှာ ပြန်လည်ပါဝင်နိုင်ဖို့ရှိနေပါတယ်။ 

အာမိုရင်က “မေဆင်မောင့်က အမြန်ဆုံးပြန်ကစားနိုင်တော့မှာပါ။ လန်နီကတော့ ဒီပွဲမှာမပါဝင်ပါဘူး။ မက်ဂွါရီကလည်း ဒီပွဲကိုလွဲချော်သွားမှာဖြစ်ပေမယ့် တနင်္ဂနွေနေ့မှာတော့ ပြန်ကစားနိုင်ဖို့မျှော်လင့်ပါတယ်။ ယူဂါတီက အသင်းရဲ့လူစာရင်းထဲမှာရောက်နေပါပြီ” လို့ပြောကြားခဲ့ပါတယ်။