မန်စီးတီးအသင်းကတော့ တတိယမြောက်ခေါ်ယူမှုအဖြစ် ဖရန့်ဖတ်စတား အိုမာမာမွတ်ရှ်ကို ခေါ်ယူနိုင်ခဲ့ပြီဖြစ်တယ်လို့ အတည်ပြုလိုက်ပါတယ်။ မာမွတ်ရှ်ဟာ ကူဆာနော့ဗ် နဲ့ ဗစ်တာတို့ပြီးနောက် စီးတီးရဲ့ဆောင်းရာသီဈေးကွက်မှာ တတိယမြောက်ခေါ်ယူမှုဖြစ်လာခဲ့ပါတယ်။

မာမွတ်ရှ်တစ်ယောက် စီးတီးအသင်းနဲ့ ၄ နှစ်ခွဲစာချုပ်ချုပ်ဆိုခဲ့ပြီး မန်ချက်စတာကိုမပြောင်းလာခင် ဖရန့်ဖတ်အတွက် ၆၇ ပွဲမှာ ၃၇ ဂိုးသွင်း ၊ ၂၀ ဂိုးဖန်တီးနိုင်ခဲ့ပါတယ်။ မာမွတ်ရှ်ရောက်လာတာကြောင့် စီးတီးတိုက်စစ်ပိုင်းက ပိုထက်မြက်လာဖွယ်ရှိနေပြီး ဂွါဒီယိုလာရဲ့အသင်းဟာ အခုရာသီမှာ ရုန်းကန်နေရတာဖြစ်ပါတယ်။

ဒါ့အပြင် ကြားရက်တုန်းက ချန်ပီယံလိဂ်မှာလည်း ပီအက်စ်ဂျီကို ၄-၂ နဲ့အရေးနိမ့်ခဲ့သလို နောက်တစ်ဆင့်တက်ရောက်နိုင်ဖို့အခြေအနေက ဆိုးဝါးလာခဲ့ပြီဖြစ်ပါတယ်။ “ဒီနေ့က ကျွန်တော်ဘယ်တော့မှမမေ့နိုင်တဲ့နေ့တစ်နေ့ပါ။ စီးတီးလိုကမ္ဘာ့အကောင်းဆုံးအသင်းတွေထဲကတစ်သင်းဆီကို ပြောင်းလာခွင့်ရခဲ့ပါပြီ။ တကယ်ကောင်းတဲ့ခံစားချက်ပါ။

ကျွန်တော် နဲ့ ကျွန်တော်မိသားစုလည်း ဝမ်းသာနေပါတယ်။ မန်ချက်စတာမှာ ကျွန်တော်တို့ အရမ်းပျော်နေပါတယ်။ ပက် နဲ့ ဝန်ထမ်းအဖွဲ့တွေအပြင် အသင်းရဲ့အသုံးအဆောင်တွေကလည်း ကမ္ဘာ့အဆင့်မီတွေပါ။ ဒီမှာကစားသမားတွေအတွက် လိုအပ်တာအကုန်ရှိပါတယ်။ ကျွန်တော် တော်တော်လေးစိတ်လှုပ်ရှားနေပါပြီ။ ကျွန်တော် ဆုဖလားအောင်မြင်မှုတွေရယူချင်တယ်ဆိုတာကို မငြင်းချင်ပါဘူး။ စီးတီးက အင်္ဂလန်မှာ နှစ်အတော်ကြာ ဆုဖလားအောင်မြင်မှုတွေရယူနိုင်ခဲ့တဲ့အသင်းပါ။

ဒါကြောင့် ကျွန်တော် အခုလိုအနိုင်ရတဲ့ပတ်ဝန်းကျင်ကို ပြောင်းလာခွင့်ရတာ ကျေနပ်စရာပါ။ ကျွန်တော် ဝန်ထမ်းတွေ နဲ့ အသင်းဖော်တွေဆီကနေ သင်ယူချင်ပါတယ်။ ဒီအသင်းအတွက်လည်း အရေးပါတဲ့သူဖြစ်လာချင်ပါတယ်။ မကြာခင်မှာ အခြားအသင်းဖော်တွေနဲ့တွေ့ဆုံပြီး စီးတီးပရိသတ်တွေကို ကျွန်တော် ဘာလုပ်နိုင်လဲဆိုတာကိုပြသချင်ပါတယ်”လို့ မာမွတ်ရှ်က ပြောကြားခဲ့ပါတယ်။

စီးတီးအားကစားဒါရိုက်တာ ဘီဂရစ်စတိန်းကလည်း အိုမာလိုကစားသမားမျိုးကို အသင်းထံခေါ်ယူနိုင်ခဲ့လို့ ဝမ်းသာမိတယ်လို့ ပြောကြားခဲ့ပါတယ်။ မန်စီးတီးဟာ လာမယ့်စနေနေ့မှာ ချဲလ်ဆီးအသင်းနဲ့ရင်ဆိုင်ရမှာဖြစ်ပြီး အဲ့နောက် ချန်ပီယံလိဂ်မှာ နောက်တစ်ဆင့်တက်ချင်တယ်ဆိုရင် ဘရုဂျက်အသင်းကိုအနိုင်ကန်ဖို့ လိုအပ်နေပါတယ်။