အခုနွေရာသီ၊ အန်ဖီးလ်မှထွက်ခွာနိုင်တယ်ဆိုတဲ့ ထင်ကြေးပေးမှုတွေ ဆက်လက်ထွက်ပေါ်နေခြင်းကြောင့် ယမန်နေ့ညပိုင်း၊ အေစီမီလန်နဲ့ခြေစမ်းပွဲစဉ်ကို လူးဝစ်ဒီယက်ဇ်လွဲချော်ခဲ့တယ်လို့ လီဗာပူးနည်းပြအန်းစလော့က အတည်ပြုခဲ့ပါတယ်။

ESPN ရဲ့သတင်းရင်းမြစ်တစ်ဦးအဆိုအရ ကိုလံဘီယာလက်ရွေးစင်ကစားသမားဟာ အခုနွေရာသီအပြောင်းအရွှေ့ဈေးကွက်မှာ လီဗာပူးမှထွက်ခွာဖို့အပြင် ယူရို ၆၇ သန်းတန်ကမ်းလှမ်းမှုအပေါ် ပရီးမီးယားလိဂ်ချန်ပီယံတွေရဲ့ပယ်ချမှုအပြီး ထပ်မံတိုးမြှင့်ထားတဲ့ ကမ်းလှမ်းမှုတစ်ခုနဲ့အတူ ဘိုင်ယန်မြူးနစ်အသင်း ပြန်လာနိုင်ဖို့ မျှော်လင့်နေတယ်လို့ သိရပါတယ်။

အာရှဒေသရာသီကြိုခရီးစဉ်အတွက် လီဗာပူးအသင်းရဲ့ကစားသမား ၂၉ ဦးစာရင်းမှာ ပါဝင်လာပေမယ့် ဒီယက်ဇ်က အေစီမီလန်ကို ၄-၂ ဂိုးဖြင့် အရေးနိမ့်ခဲ့တဲ့ဟောင်ကောင်မြေခြေစမ်းပွဲကိုတော့ မကစားနိုင်ခဲ့ပါဘူး။

သတင်းစာရှင်းလင်းပွဲအတွင်း အန်းစလော့က “ မကြာသေးမီကပဲ ဒီယက်ဇ်နဲ့ပတ်သက်တဲ့ ကောလာဟလတွေ အများကြီးထွက်ပေါ်လာခဲ့ပါတယ်။ ကျွန်တော်ကတော့ အဲ့ဒီလိုအရှုပ်အထွေးဆီ မပါဝင်ချင်ပါဘူး။ သူက ကျွန်တော်တို့နဲ့ အကောင်းဆုံးလေ့ကျင့်ပြင်ဆင်နေပေမယ့် အခုအချိန်မှာ သူ့ကို ပွဲကစားချိန်မပေးဖို့ ကျွန်တော်တို့ ဆုံးဖြတ်ထားပါတယ်”လို့ ပြောပါတယ်။

အခုအခြေအနေနဲ့ပတ်သက်လို့ ဒီယက်ဇ်နဲ့ စကားပြောဖြစ်ခဲ့တယ်လို့ အန်းစလော့က အတည်ပြုပါတယ်။ သူက “ ကျွန်တော့်ရဲ့ကစားသမားအများစုနဲ့ ပုံမှန်လိုလို စကားပြောဖြစ်ပါတယ်။ ကျွန်တော်ပြောခဲ့သလိုပါပဲ၊ ဒီယက်ဇ်က အကောင်းဆုံးလေ့ကျင့်ပြင်ဆင်နေပေမယ့် လတ်တလောကစားနေတဲ့ပွဲစဉ်တွေမှာ မပါဝင်စေဖို့ ကျွန်တော်တို့ ဆုံးဖြတ်ခဲ့ပါတယ်။ ဒါနဲ့ပတ်သက်လို့ အခုထက်ပိုပြီးမှတ်ချက်ပေးစရာ မရှိပါဘူး”လို့ ဆက်ပြောပါတယ်။

ဒီယက်ဇ်ထွက်ခွာသွားနိုင်သလားဆိုတဲ့ မေးခွန်းကိုလည်း အန်းစလော့က “ ဒါကိုဖြေကြားပေးရမယ့်သူက ကျွန်တော်မဟုတ်ပါဘူး”လို့ တုံ့ပြန်ခဲ့ပါတယ်။ ဒီယက်ဇ်က ပြီးခဲ့တဲ့ဘောလုံးရာသီ၊ လီဗာပူးအသင်းရဲ့ပရီးမီးယားလိဂ်ချန်ပီယံခရီးလမ်းမှာ သွင်းဂိုး ၁၇ ဂိုးနဲ့အတူ ပါဝင်ကူညီပေးခဲ့ပါတယ်။ ဒါပေမဲ့ အသက်-၂၈ နှစ်အရွယ်ကစားသမားက အသင်းတာဝန်ရှိသူတွေဆီ အသင်းပြောင်းရွှေ့လိုကြောင်း တရားဝင်တင်ပြထားတယ်လို့ သတင်းရင်းမြစ်တစ်ဦးက ပြောပြပါတယ်။

လီဗာပူးအသင်းက အခုနွေရာသီကာလအစောပိုင်းမှာ ဘာစီလိုနာအသင်းရဲ့ကမ်းလှမ်းမှုတစ်ခုကိုလည်း ပယ်ချခဲ့ဖူးပါတယ်။