ပြီးခဲ့တဲ့နွေရာသီအပြောင်းအရွှေ့ကာလအတွင်း လီဗာပူးက သူတို့ရဲ့ ကွင်းလယ်အင်ဂျင်ခန်းကို အလုံးစုံပြုပြင်ပြောင်းလဲဖို့ ရည်ရွယ်ချက်ဖြင့် ကြယ်ပွင့်ကစားသမားသစ်တွေကို ခေါ်ယူခဲ့ရာမှာ အသစ်ရောက်ရှိလာသူတွေအနက် တစ်ဦးကိုတော့ ပြောင်းရွှေ့ကြေးသုံးစွဲရမှုများပြားလွန်းတယ်လို့ အဲ့ဒီအချိန်တုန်းက အားကစားဒါရိုက်တာအဖြစ်တာဝန်ယူခဲ့သူ ရှမတ်တီကီက ယူဆခဲ့ပါတယ်။

နောက်ဆုံးဖွင့်လှစ်ခဲ့တဲ့ အပြောင်းအရွှေ့ဈေးကွက်နှစ်ခုကိုသာ ကိုင်တွယ်လှုပ်ရှားပေးဖို့ တာဝန်ပေးခံရတဲ့ ဂျာမန်သားက ဇန်နဝါရီအပြောင်းအရွှေ့ဈေးကွက်ပြီးဆုံးချိန်မှာပဲ အသင်းမှ ထွက်ခွာသွားပါတယ်။ လီဗာပူးအသင်း အားကစားဒါရိုက်တာဘ၀ ရှမတ်တီကီရဲ့ဗွေဆော်ဦးအပြောင်းအရွှေ့ဈေးကွက်ကတော့ ယာဂန်ကလော့ပ်ရဲ့ ကွင်းလယ်ပိုင်းပြုပြင်ပြောင်းလဲမှုတွေနဲ့အတူ အလုပ်များခဲ့ရပါတယ်။

ဂျော်ဒန်ဟန်ဒါဆန်၊ ဂျိမ်းစ်မီလ်နာနဲ့ ဖာဘင်ဟိုတို့ ထွက်ခွာသွားချိန်မှာပဲ မက်အယ်လစ္စတာ၊ ဆိုဘိုဆလိုင်း၊ ဂရာဗန်ဘတ်ချ်နဲ့ အန်ဒိုတို့ အန်ဖီးလ်ဆီ ဝင်ရောက်လာပါတယ်။ လိုက်ပ်ဇစ်ထံမှ ယူရိုသန်း ၇၀ ဖြင့် ခေါ်ယူခဲ့ရတဲ့ ဆိုဘိုဆလိုင်းကိုတော့ ကနဦးမှာ ရှမတ်တီကီက အလွန်ဈေးကြီးလွန်းတဲ့ ကစားသမားလို့ ထင်မြင်ယူဆခဲ့ပါတယ်။

ဒီကွင်းလယ်လူနဲ့ပတ်သက်လို့ ရှမတ်တီကီက “လီဗာပူးမှာ တာဝန်ယူနေစဉ် ကျွန်တော်တို့တွေ ဆိုဘိုဆလိုင်းအတွက် ယူရိုသန်း ၇၀ အသုံးပြုကာ လိုက်ပ်ဇစ်ထံမှ ခေါ်ယူခဲ့ပါတယ်။ အဲ့ဒီအချိန်တုန်းကဆိုရင် ကျွန်တော်က တော်တော်ဈေးကြီးတာပဲလို့တောင် ပြောခဲ့ပါသေးတယ်။ ဒီနေ့ရှုထောင့်ဘက်မှ ကြည့်မယ်ဆိုရင် ဒါက ကျွန်တော့်ရဲ့တော်တော်လွဲမှားတဲ့ ကောက်ချက်တစ်ခုဆိုတာ တွေ့ရပါမယ်။ ဒီကောင်လေးက အသင်းဆီ ရောက်လာချိန် ပထမဆုံးနေ့ရက်မှာပဲ အရေးပါတဲ့ကစားသမားတစ်ဦး ဖြစ်လာခဲ့ပါတယ်”လို့ ပြောပါတယ်။

မတည်ငြိမ်တဲ့ကာလအချို့ရှိခဲ့ပေမယ့် လွှမ်းခြုံကြည့်လိုက်မယ်ဆိုရင် ဆိုဘိုဆလိုင်းက အန်ဖီးလ်မှာ အောင်မြင်မှုကြီးတစ်ခုအဖြစ် ရောက်ရှိလာခဲ့ပါပြီ။ ဟန်ဂေရီကြယ်ပွင့်က ယာဂန်ကလော့ပ်ရဲ့အသင်းမှာ ချက်ချင်းအံဝင်ခွင်ကျဖြစ်ခဲ့ပြီး ခြေစွမ်းပြခဲ့ပါတယ်။

ကွင်းလယ်လူက အခုဘောလုံးရာသီ၊ လီဗာပူးအတွက် ၂၈ ပွဲကစား၊ ငါးဂိုးသွင်း၊ ဂိုးဖန်တီးမှုလေးကြိမ် စွမ်းဆောင်ပေးထားပြီး ကြံ့ခိုင်မှုပြည့်ဝနေရင် ကလော့ပ်အတွက် အငြင်းပွားဖွယ်မရှိပွဲထွက်ခွင့်ပေးရမယ့် ကစားသမားဖြစ်နေပါတယ်။ လက်ရှိမှာ ယူရိုသန်း ၇၀ ဆိုတဲ့ ပမာဏက ကစားသမားအတွက် များပြားလွန်းပေမယ့် အသက်-၂၃ နှစ်သာ ရှိသေးလို့ ဆိုဘိုဆလိုင်းရဲ့တန်ကြေးက ဒီထက်ပိုမိုမြင့်မားလာနိုင်ပါတယ်။

ဟန်ဂေရီလက်ရွေးစင်က အန်ဖီးလ်မှာ ကြီးမားတဲ့အနာဂတ်တစ်ခုအဖြစ် ရှိနေပြီး ပရီးမီးယားလိဂ်ထိပ်သီးကလပ်နဲ့အတူ အောင်မြင်တဲ့ကစားသမားဘဝတစ်ခု တည်ထောင်နိုင်ဖို့ မျှော်လင့်နေပါလိမ့်မယ်။