လက်စတာနဲ့ ၁ နှစ်စာချုပ်သစ် ချုပ်ဆိုလိုက်တဲ့ တိုက်စစ်မှူး ဗာဒီ
လက်စတာအသင်းဟာ တိုက်စစ်မှူး ဗာဒီကို ၁ နှစ်စာချုပ်သစ် ချုပ်ဆိုလိုက်တယ်လို့ သိရပါတယ်။ ဗာဒီဟာ ၂၀၁၂ ကတည်းက လက်စတာအသင်းအတွက် ကစားပေးနေတာဖြစ်ပြီး ၄၆၄ ပွဲမှာ ၁၉၀ ဂိုးအထိ သွင်းယူထားနိုင်ခဲ့ပါတယ်။
အသက် ၃၇ နှစ်သားဟာ ၂၀၁၅ - ၁၆ ရာသီတုန်းက လက်စတာနဲ့အတူ ပရီးမီးယားလိဂ်ချန်ပီယံဆုရယူထားနိုင်ခဲ့ပါတယ်။ ဒါ့အပြင် နောက်ခံလူ ဗက်စတာဂတ်ကိုလည်း ၂၀၂၇ နွေရာသီမတိုင်ခင်အထိ စာချုပ်သစ်ချုပ်ဆိုခဲ့ပါတယ်။
အယ်လ်ဘရိုက်တန် ၊ အီနာချို ၊ ပရက်တ်တို့ကတော့ အလွတ်နဲ့ထွက်ခွာမှာဖြစ်ပါတယ်။ အင်္ဂလန်စတားဟောင်းဟာ အက်ဖ်အေဖလားအပြင် ကွန်မြူနတီဖလား နဲ့ ချန်ပီယံရှစ်ဖလား ၂ လုံးလည်းရယူနိုင်ခဲ့ပါတယ်။
“ကျွန်တော်အမြဲပြောသလို အသက်အရွယ်က ဂဏန်းတစ်ခုပါပဲ။ ကျွန်တော့်ခြေတွေကောင်းနေသလို ဆက်ကန်မှာဖြစ်ပြီး လုံးဝမရတော့ဘူးဆိုမှ လက်လျှော့မှာပါ။ အဲ့တာက အချိန်တစ်ခုကြာရင်ဖြစ်လာနိုင်ပါတယ်။ ဒါပေမယ့် အခုတော့ အချိန်ကောင်းမဟုတ်သေးပါဘူး။ ပရီးမီးယားလိဂ်မှာ နောက်တစ်ရာသီဆက်လက်စောင့်ကြည့်ရပါဦးမယ်။ ပြီးတော့ ဘာလုပ်နိုင်မလဲဆိုတာ ကြည့်ရပါမယ်။ ပရီးမီးယားလိဂ်က ၁၀၀% ကမ္ဘာ့အကောင်းဆုံးလိဂ်ပါ။ ဒါကြောင့် ဒီလိဂ်မှာကစားချင်တာပါ”လို့ ဗာဒီက ပြောကြားခဲ့ပါတယ်။
ဗာဒီဟာ အင်္ဂလန်အသင်းအတွက် ၂၆ ပွဲအထိ ပါဝင်ကစားပေးခဲ့ကာ ၂၀၁၈ က နောက်ဆုံး ပါဝင်ခွင့်ရခဲ့တာဖြစ်ပါတယ်။ဆောက်သမ်တန်ကနေပြောင်းလာတဲ့ ဗက်စတီဂတ်ကတော့ ပြီးခဲ့တဲ့ရာသီတုန်းက ချန်ပီယံရှစ်မှာ ၄၂ ပွဲအထိ ပါဝင်ကစားခဲ့ပါတယ်။
အယ်လ်ဘရိုက်တန်က လက်စတာနဲ့ ၁၀ နှစ်ဖြတ်သန်းခဲ့တာဖြစ်ပြီး ပွဲပေါင် ၃၁၃ ပွဲအထိ ပါဝင်ကစားခဲ့ကာ အီနာချိုကတော့ ၇ နှစ်တာကာလအတွင်း ၆၁ ဂိုးအထိ သွင်းယူနိုင်ခဲ့ပါတယ်။ ပရက်တ်ကတော့ အသင်းအတွက် ၁၀၇ ပွဲအထိ ပါဝင်ကစားခဲ့ပါတယ်။ လက်စတာအသင်းကတော့ အန်ဒီဒီကို စာချုပ်သစ် ချုပ်ဆိုဖို့ ဆွေးနွေးနေပါတယ်။
