အယ်လ်ကလက်စီကိုနိုင်ပွဲရယူရန် ရီးရဲလ်မက်ဒရစ်ကို တိုက်တွန်းလိုက်တဲ့ ကီလီယန်အမ်ဘာပေ
ရီးရဲလ်မက်ဒရစ်အသင်းဟာ တနင်္ဂနွေနေ့မှာ ဘာစီလိုနာအသင်းနဲ့ကစားမယ့် အရေးပါတဲ့ပွဲစဉ်ကို အနိုင်ရရှိခဲ့မယ်ဆိုရင် လာလီဂါအမှတ်ပေးဇယားရဲ့ ထိပ်ဆုံးမှာ ၅ မှတ်အထိဖြတ်ပြီး ဦးဆောင်နိုင်မှာဖြစ်ပါတယ်။ ပြင်သစ်လက်ရွေးစင်အမ်ဘာပေက စပိန်မြို့တော်ကိုပြောင်းရွှေ့ခဲ့ပြီးနောက် ဘာစီလိုနာအသင်းကို ပထမဆုံးအကြိမ်အနိုင်ရရှိဖို့ ကြိုးစားနေပါတယ်။ အမ်ဘာပေနဲ့ ရီးရဲလ်မက်ဒရစ်အသင်းဟာ ပြီးခဲ့တဲ့ရာသီမှာ နည်းပြ ဟန်စီဖလစ်ခ်ရဲ့ပွဲဦးထွက်ရာသီမှာ ဘာစီလိုနာအသင်းကို ၄ ကြိမ်ရှုံးနိမ့်ခဲ့တာကြောင့် အဲဒီရာသီမှာ ပြည်တွင်းဖလား ၃ လုံးကို ဘာစီလိုနာအသင်းက ရရှိခဲ့ပါတယ်။
အခုတော့ နည်းပြ ဇာဘီအလွန်ဆိုလက်အောက်မှာ ရီးရဲလ်မက်ဒရစ်အသင်းက ဘာစီလိုနာနဲ့ ရင်ဆိုင်ရတဲ့ ပွဲစဉ်တွေကိုအနိုင်ရရှိဖို့ မျှော်လင့်နေပါတယ်။ ပြီးခဲ့တဲ့ရာသီမှာ ဘာစီလိုနာအသင်းကို ၅ ဂိုးသွင်းယူခဲ့တဲ့ အမ်ဘာပေက လာလီဂါရာသီအစရဲ့ အကြီးမားဆုံးပွဲစဉ်မှာ လက်ရှိစပိန်ချန်ပီယံတွေကို ဦးဆောင်နိုင်ဖို့အတွက် ဖိအားတွေရှိနေပါတယ်။ စက်တင်ဘာလအတွက် ရီးရဲလ်မက်ဒရစ်အသင်းရဲ့ တစ်လတာအကောင်းဆုံးကစားသမားဆုကို ရရှိခဲ့ပြီးနောက် အမ်ဘာပေက"ဒီတစ်ပတ်က ကျွန်တော်တို့အတွက် ပွဲကြီးတစ်ပတ်ပါပဲ။ ဂျူဗင်တပ်စ်နဲ့ကစားရတာ အရေးကြီးတဲ့ပွဲဖြစ်ခဲ့ပေမဲ့ တနင်္ဂနွေနေ့ပွဲကတော့ အထူးခြားဆုံးပါ။
"ပရိသတ်တွေအနေနဲ့ အမြဲတမ်းအားပေးနေကြသလိုပဲ ကျွန်တော်တို့ကိုနောက်ကနေထောက်ခံအားပေးဖို့ မျှော်လင့်ပါတယ်၊ ဒီပွဲကဘယ်လောက်အရေးကြီးတယ်ဆိုတာကို သူတို့သိပါတယ်။ ကျွန်တော်တို့လည်းသိပါတယ်။ ဒါဟာ ကစားပွဲကောင်းတစ်ခုဖြစ်လိမ့်မယ်လို့ မျှော်လင့်ပါတယ်။ ဒါကလူတိုင်းကြည့်ချင်တဲ့ပွဲပါ။ ကလပ်အသင်းအဆင့်မှာ ဒီထက်ပိုကြီးတဲ့ပွဲမရှိတော့ပါဘူး။ ကြီးမားတဲ့ချန်ပီယံလိဂ်ပွဲစဉ်နဲ့ပဲနှိုင်းယှဉ်လို့ရပါတယ်၊ ဒါပေမဲ့ လိဂ်ပွဲစဉ်တွေမှာတော့ ရီးရဲလ်မက်ဒရစ်နဲ့ဘာစီလိုနာပွဲလိုမျိုးမရှိတော့ပါဘူး။ ဒါပေမဲ့ ကျွန်တော်တို့က ကစားရုံသက်သက်မဟုတ်ဘဲ အနိုင်ရချင်ပါတယ်" လို့ ပြောကြားခဲ့ပါတယ်။
ရီးရဲလ်မက်ဒရစ်အသင်းဟာ ဒီရာသီမှာ ပြိုင်ပွဲအားလုံး ၁၂ ပွဲကစားရာမှာ ၁၁ ပွဲအထိအနိုင်ရရှိထားပါတယ်။ အမ်ဘာပေဟာ ဒီနှစ်ရာသီ မာယော့ကာ၊ ဂျူဗင်တပ်စ်အသင်းတို့နဲ့ပွဲစဉ်တို့ကလွဲရင် ရီးရဲလ်မက်ဒရစ်အသင်းအတွက် ဒီရာသီမှာ ၁၅ ဂိုးသွင်းယူနိုင်ခဲ့ပါတယ်။ "ကျွန်တော်အဆင်ပြေပါတယ်၊ အသင်းကိုအမြဲတမ်းကူညီပေးချင်ပါတယ်။ အဲဒါကဂိုးသွင်းယူပေးတာဖြစ်ရင်လည်း ကောင်းပါတယ်၊ တခြားနည်းလမ်းနဲ့ကူညီပေးရရင်လည်း ကောင်းပါတယ်။ ကျွန်တော်က အသင်းနဲ့အတူတူပါပဲ။ အသင်းက ကစားသမားတိုင်းရဲ့အကူအညီကို အမြဲတမ်းလိုချင်ပါတယ်၊ ကျွန်တော်အဲဒီလိုလုပ်ဖို့အမြဲတမ်းကြိုးစားပါတယ်။ ဘာပဲဖြစ်ဖြစ် ရင်ဆိုင်ဖို့အသင်းကအသင့်ရှိနေပါတယ်။ ဒီလကကျွန်တော်တို့အတွက် အရေးကြီးတဲ့လတစ်လပါပဲ။ ဒါကပွဲကြီးတစ်ပွဲပါ၊ ဒါပေမဲ့ ကျန်တဲ့လတွေကလည်းအရေးကြီးပါတယ်။ မက်ဒရစ်က တောင်းဆိုတဲ့အတိုင်း ကျွန်တော်တို့လုပ်ဆောင်သွားမှာပါ၊ အဲဒါကတော့ အနိုင်ရရှိရေးနဲ့ မက်ဒရစ်ပရိသတ်တွေအတွက် ကောင်းကောင်းကစားဖို့ပါပဲ"လို့ အမ်ဘာပေကပြောပါတယ်။
