ဘာစီလိုနာအသင်းနောက်ခံလူ ကွန်ဒီက အိုဆာဆူနာကိုအနိုင်ရပြီးနောက် လာလီဂါ နဲ့ စပိန်ဘောလုံးအဖွဲ့ချုပ်ကို ဝေဖန်လိုက်ပါတယ်။ အဆိုပါပွဲကို အခုလအစောပိုင်းတုန်းကကန်ဖို့ စီစဉ်ခဲ့ပေမယ့်  ဘာစီလိုနာအသင်းရဲ့ဆရာဝန် ဂါစီယာကွယ်လွန်မှုကြောင့် ရွှေ့ဆိုင်းခဲ့တာဖြစ်ပါတယ်။ မူလက ၂၇ ရက်နေ့မှာ ပြန်လည်ကန်မယ်လို့ သတ်မှတ်ခဲ့ပေမယ့် ၂ သင်းစလုံးအဆင်မပြေတာကြောင့် ပယ်ဖျက်ခဲ့ပါတယ်။ 

ဘာစီလိုနာအတွက် နောက်ထပ်ဆိုးဝါးစရာတစ်ခုက အိုလ်မိုတစ်ယောက် ပွဲအတွင်း ကြွက်သားဒဏ်ရာရရှိခဲ့ပြီး လာမယ့်ပွဲတွေကို လွဲချော်တော့မှာဖြစ်ပါတယ်။ ကွန်ဒီက အဆိုပါပွဲအခြေအနေနဲ့ပတ်သက်ပြီး အင်တာဗျူးမှာ “ကျွန်တော် ပွဲရက်နဲ့ပတ်သက်ပြီး စိတ်ဆိုးပါတယ်။ အဲ့တာက သာမန်မဟုတ်ပါဘူး။ ကျွန်တော်တို့ ပြက္ခဒိန်အကြောင်း အများကြီးပြောဖြစ်ပါတယ်။ကျွန်တော်တို့ ပွဲအများကြီးကန်ရပါမယ်။ အဲ့တာကို နားမလည်တဲ့သူတွေရှိတယ်ဆိုတာ ကျွန်တော်သိပါတယ်။ အခုလိုမျိုးအနေအထားက အသင်းကို လေးစားမှုမရှိသလိုပါပဲ။

ကျွန်တော် အိုဆာဆူနာအကြောင်းလည်းပြောချင်ပါတယ်။ သူတို့မှာ ဘူဒီမာလိုကစားသမားမျိုးက နိုင်ငံအသင်းမှာမပါဝင်တာကြောင့် အနားယူဖို့ မလိုအပ်ပါဘူး။ အဲ့တာက အသင်းပြဿနာမဟုတ်ပါဘူး။ အခုအခြေအနေက အသင်းကိုတင်မလေးစားတာမဟုတ်ပဲ ကစားသမားတွေကိုပါ မလေးစားသလိုပါပဲ။

ကျွန်တော်တို့ စက်တွေမဟုတ်ပါဘူး။ ပွဲကောင်းတစ်ပွဲကန်ဖို့ အနားယူဖို့ လိုအပ်ပါတယ်။ လာလီဂါတင်မဟုတ်ပဲ အဖွဲ့အစည်းအားလုံး အဲ့တာကို နားလည်ဖို့ လိုအပ်ပါတယ်”လို့ ကွန်ဒီက ပြောကြားခဲ့ပါတယ်။ ဘာစီလိုနာအတွက်တော့ နိုင်ပွဲရခဲ့ပေမယ့် အိုလ်မိုတစ်ယောက် ဒဏ်ရာရရှိခဲ့တာကြောင့် နစ်နာခဲ့ရတာဖြစ်ပါတယ်။